Ақмола облысында жаңа сүт зауыты ашылды
Бұл Астананың Азық-түлік белдеуіне енген 60 жобаның және холдингтің инвестициялық портфеліндегі ауылдарда жүзеге асырылатын 263 инвестициялық жобаның бірі.
Астана. 12-желтоқсан. Kazakhstan Today - Ақмола облысында жаңа сүт зауыты ашылды, деп хабарлайды Kazakhstan Today агенттігінің тілшісі.
"ҚазАгро" ұлттық басқарушы холдингі қаржыландырған кезекті нысан өнім шығаруды жолға қойды. Бұл Астананың Азық-түлік белдеуіне енген 60 жобаның және холдингтің инвестициялық портфеліндегі ауылдарда жүзеге асырылатын 263 инвестициялық жобаның бірі.
Ақмола облысының Целиноград ауданындағы "Агрофирма "Родина" ЖШС тұрғызған жаңа сүт зауытында 3 мың тоннаға жуық сүт қайта өңделді. Заманауи қайта өңдеуші кешен шамамен жеті өнім түрін шығаруды жолға қойды, соның ішінде - айран, қаймақ, ірімшік, сары май бар. Табиғи сүт шикізатының негізіндегі экологиялық таза өнім Астанаға және елорданың азық-түлік белдеуіне бағдарланған.
Тәулігіне 50 000 литр сүтті (18 000 тонн/жыл) қайта өңдеуге бағдарланған маңызды нысанның құрылысы "ҚазАгро" ұлттық басқарушы холдингі құрылымындағы еншілес компания "ҚазАгроҚаржы" АҚ қаржыландырды.
Қазіргі заманға лайық сүт зауытының құрылысы ірі тауарлы сүт фермасын құру жөніндегі инвестициялық жобаның жалғасы екенін айта кету қажет, оны қаржыландыруды отандық лизинг компаниясы 2007 жылы бастаған. Онда жобаның шеңберінде "ҚазАгроҚаржы" АҚ Канадада селекцияланған голштино-фриз тұқымды 700 бастан астам ІҚМ сатып алуды қаржыландырды және 909,5 млн.теңге сомасына фермаға арналған жоғары технологиялық жабдық пен техниканы сатып алды. Жобаны іске асырудың арқасында 30 жұмыс орны құрылды. Қазіргі уақытта сүт-тауарлы фермасында бір мыңнан астам голштино-фриз тұқымды мал бар. Сүт-тауарлы ферма жобалық қуатқа шықты. Қазіргі таңда "Родина" сауда маркасымен шығатын сүт өнімдері елорданың нарығында әйгілі.
Жалпы, қазіргі уақытта "ҚазАгро" ұлттық холдингі компаниясы тобының инвестициялық қоржынында жалпы құны 199,9 млрд.теңгенің 263 инвестициялық жобасы бар. Оның қатарындағы 55 жоба ауылшаруашылық өнімдерін қайта өңдеу саласына қатысты. Олардың жалпы құны 37,5 млрд. теңгені құрайды. Қазіргі уақытта "ҚазАгро" холдингі 8403,4 млн. теңгеге құсты қайта өңдеуге байланысты 3 жоба бойынша құрылыс пен технологиялық жабдықтарды, астықты қайта өңдеу бойынша жалпы құны 12,7 млрд.теңгенің 20 жобасын, 3911,5 млн. теңгеге етті қайта өңдеу бойынша 13 жобаны, 3346,6 млн. теңгеге өсімдік майының өндірісі бойынша 4 жобаны, 1793 млн. теңгеге сүтті қайта өңдеу бойынша 6 жобаны, 5721 млн. теңгеге қызанақты қайта өңдеу бойынша 3 жобаны, 99,5 млн.теңгеге күрішті өңдеу бойынша 2 жобаны қаржыландырады.
Астана қаласының айналасында азық-түлік белдеуін құру шеңберінде "ҚазАгро" ұлттық холдингі 60 жобаны іске асыруда, оның жалпы қаржыландыру сомасы 33,4 млрд. теңгені құрайды. Елорданың азық-түлік белдеуі жобаларының ішінде - 8 жоба жұмыртқа және ет бағытындағы құс фабрикасын салу және жаңарту бойынша жоба, ол жалпы жылдық өндіріс қуаты 14,4 мың тонна құс еті және 355,9 млн. дана жұмыртқа шығарады: сүт-тауарлы фермасын құру және жаңарту бойынша 6 жоба, жылдық қуаты 45,5 мың тоннаға дейінгі сүт және сүт өнімдерінің өндірісі; 6 көкөніс қоймасы, бір мезгілдегі сақтау сыйымдылығы 20,8 тоннаға дейінгі қуатпен; жылыжай кешендерін құру бойынша 4 жоба, жалпы алаңы 17,57 га және 10,1 мың тоннаға дейінгі көкөніс өндірісімен.
Қазіргі таңда 60 жобаның ішінде жалпы құны 28 млрд.теңгенің 56 жобасы пайдалануға берілді және жұмыс істеп тұр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.