Алматы метросының бірінші кезегінің құрылыс жұмыстары тек қана 64%-ға аяқталды - газет
Алматы. 9 наурыз. Kazakhstan Today - Алматы метросының бірінші кезегінің құрылыс жұмыстары тек қана 64%-ға аяқталды, деп хабарлайды Kazakhstan Today "Время" газетіне сілтеме жасап.
"Алматы метросының бірінші кезегінің құрылыс жұмыстары тек қана 64%-ға аяқталды. Ал метроны пайдалануға беру мерзімі төрт жылға кейінге шегерілген. 2009 жылдың қазан-қараша айларында бюджет қаржысының пайдаланылуына тексеру жүргізген Республикалық бюджеттің атқарылуын бақылау жөніндегі есеп комитеті осындай тұжырымға келді ", - деп жазады басылым.
Есеп комитетінің ақпаратына сәйкес, "метро құрылысының барысын ұйымдастыруда жіберілген кемшіліктер анықталды. Алматы жолаушылар транспорты басқармасы 2009 жылы "Алматыметроқұрылыс" АҚ мен "Метропроект" ЖШС-іне жиынтық қаржыландыру жоспарында қарастырылғаннан да артық көлемде, тиісінше 191,5 млн теңге және 23,5 млн теңге көлемінде қаржы бөлген. Алайда байқау өткізілмеуге байланысты қаржы игерілмей қалды. Сөйтіп, жабдықтаушылар тарапынан міндеттемелер орындалмады".
"Бізге бөлінген қаржыдан артық көлемде қалай аудара аламыз? Бюджет жан-жақты есептеледі емес пе. Біз олармен (есеп комитетінің қызметкерлерімен) тәжікелесіп жатпау үшін қарсылық білдірмедік! Бұл -ақымақтық! Метроға аударатын мұндай ақшаны біз қайдан алар едік? Тапсырыс беруші - біз бен салынып жатқан метроның дирекциясы түрінде мердігер аласында шарт бар. Бұл шарт Қазақстан Республикасының Қазынашылық мекемесінде тіркеледі. Бірақ қазынашылық мекемесі ақша жоқ болса немесе ол артық болса шартты ешқашан тіркемейді. Сол себепті ондай тұжырымның қалай жасалғанын мен түсінбеймін. Ал қаржының игеруілуіне келсек, құрылыс басталған сәттен бастап 2010 жылдың 1 қаңтарына дейін 162 млрд теңгенің 108 млрд теңгесі игерілді. Бұл - жалпы көлемнің шамамен 70%-ы ", - деді Алматы қалалық жолаушылар транспорты басқармасының бастығы Владимир Меренков.
Метроның пайдалануға берілу мерзімі туралы сөз қозғаған ол : "құрылыс жұмыстары қаржыландыруға байланысты", деді. "Ақша соңғы үш жылда беріліп жатыр, ал оған дейін олай болған емес. 2006 жылға дейін мүлдем қаржыландырылған жоқ. Иманғали Тасмағамбетовтың тапсырмасына сәйкес, метроны 2008 жылы пайдалануға беру жоспарланды, одан кейін 2009-шы жылға шегердік", - деді ол.
"Егер бізге өзіміз сұраған 34 млрд теңгені жаздың ортасына дейін беретін болса, онда биыл бітеді. Егер бөлінбесе, онда келесі жылға қалады деген сөз. Есеп комитетінің отырысына мен тікелей қатыстым, олардың алдында есеп бердім. Іс жүзінде барлығы да бәрін түсінді. Олар үкімет тарапынан шара қолданылуы, қаржыландыру мерзімін созбауы үшін жазып жатырмыз деген. Неге десеңіз, құрылыс басталғалы тіпті 22 жыл өтті емес пе", - деді В. Меренков.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.