Атырау және Батыс Қазақстан облыстары мәслихаттарының тексеру комиссиялары жергілікті бюджеттердің атқарылуына сыртқы бақылау жүргізбеген
Атырау және Батыс Қазақстан облыстары мәслихаттарының тексеру комиссиялары жергілікті бюджеттердің атқарылуына сыртқы бақылау жүргізбеген
Астана. 27 мамыр. Kazakhstan Today - Атырау және Батыс Қазақстан облыстары мәслихаттарының тексеру комиссиялары Мемлекеттік қаржылық бақылау стандарттарының талаптарын сақтамауда, деп хабарлайды Kazakhstan Today Есеп комитетінің баспасөз қызметіне сілтеме жасап.
Баспасөз қызметінің ақпаратына сәйкес, 2007 жылғы қыркүйектен бастап Атырау және Батыс Қазақстан облыстық мәслихаттарының тексеру комиссиялары бірде-бір бақылау шарасын өткізбеген. Жергілікті бюджеттердің атқарылуына сыртқы бақылау жүргізілмеген. Атырау және Батыс Қазақстан облыстық әкімдіктері алған нысаналы трансферттердің, бюджеттік кредиттер мен мемлекет активтерінің жұмсалу тиімділігіне кәсіби бағалауды жүзеге асырмаған.
Есеп комитетінің хабарлауынша, "Құпиялылық" стандартының талаптары бұзылған. Мысалы, Батыс Қазақстан облысы Зеленовский аудынының, Атырау облысы Махамбет ауданының мәслихаттарының тексеру комиссияларында бақылаудың қорытындысы бойынша материалдар тексеру комиссиялары төрағаларының кабинеттерінде сақталып келген. Ақпаратқа, соның ішінде бақылау объектісінің коммерциялық және басқа да құпиясын қамтитын мәліметтерге қол жеткізуге шектеу қою жөнінде шаралар қабылданбаған. Есеп формальды түрде жүргізіліп отырған.
Сондай-ақ, "Құзыреттілік" стандартының талаптары сақталмаған. Тексеру комиссияларының мүшесі болып сайланған адамдардың көп жағдайда бақылау-тексеру жұмысы саласында тәжірибесі болмаған. Атырау қалалық мәслихатының тексеру комиссиясы төрағасының лауазымы 2008 жылғы сәуірден бері бос тұр.
Бұған қоса "Жоспарлау" стандартының талаптары сақтала бермеген. Мысалы, 2008-2009 жылдары Орал қаласы мәслихатының тексеру комиссиясы белгіленген тәртіппен бекітілген бақылау бағдарламалары мен жеке жұмыс жоспарларынсыз 52 бақылау шарасын өткізген. Нәтижесінде бақылау актілері сапасыз дайындалған және қандай да бір бағалау фактілерін өзінде қамти алмаған.
"Атырау және Батыс Қазақстан облыстары мәслихаттарының тексеру комиссияларының қызметі экономикалық нәтиже бермей отырғанын атап өтуге болады. Мысалы, 2008-2009 жылдары Атырау облысы Махамбет аудандық мәслихатының тексеру комиссиясы 68 мың теңге көлемінде қаржылық бұзушылықтар анықтаған. Ал осы кезең ішінде тек қана мәслихаттың тексеру комиссиясының төрағасына 1,8 млн теңге мөлшерінде жалақы төленген",- делінген хабарламада.
Баспасөз қызметінің ақпаратына сәйкес, Есеп комитеті Атырау және Батыс Қазақстан облыстары мәслихаттарының тексеру комиссияларына мемлекеттік қаржылық бақылау стандарттарының талаптарын мүлтіксіз сақтауды, сондай-ақ жергілікті бюджеттер қаражатының пайдалануына тиімді сыртқы бақылауды қамтамасыз етуді ұсынды. Сонымен қатар, жұмысты тиісті түрде ұйымдастырмаған Атырау және Батыс Қазақстан облыстары тексеру комиссиялары төрағаларының тәртіптік жауапкершілігін мәслихаттың сессиясында қарау жөнінде ұсыныс берілді.
Мәслихаттардың тексеру комиссиялары - жергілікті деңгейдегі сыртқы мемлекеттік қаржылық бақылау органдары.
Есеп комитеті ҚР президентіне тікелей бағынатын және есеп беретін мемлекеттік қаржылық бақылаудың жоғары органы болып табылады. Сыртқы бақылауды жүзеге асырады және республикалық бюджеттің атқарылуын, орталық мемлекеттік органдардың стратегиялық жоспарының, мемлекеттік бағдарламалардың іске асырылуын бағалайды. Квазимемлекеттік сектор субъектілеріне бөлінген мемлекеттік қаржы ресурстарының пайдаланылуын бақылайды. Мемлекеттің гранттары мен активтерінің, мемлекет кепілдік берген қарыздардың пайдаланылу тиімділігін талдайды, сондай-ақ Ұлттық банк активтерінің пайдалану сәйкестігіне бақылауды жүзеге асырады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.