Қазақстан ЕАЭО елдеріне ауыл шаруашылығына ЖИ енгізуді ұсынды
Қазақстан Еуразиялық экономикалық одақ (ЕАЭО) елдеріне ауыл шаруашылығында жасанды интеллектіні бірлесіп қолдануды ұсынды. Бастама ЕАЭО-ның Агроөнеркәсіптік саясат жөніндегі кеңесінің отырысында талқыланды.
Қазақстан өсімдік және мал шаруашылығында ЖИ қолданылатын пилоттық жобаларды іске қосып, кейін табысты шешімдерді Одақтың басқа елдеріне таратуды ұсынды.
Ұсынылған мәліметтерге сәйкес, бүгінде еліміздегі ауыл шаруашылығы мақсатындағы жерлердің 100%-ы цифрландырылған, ал аграршыларға мемлекеттік қолдау электрондық форматта көрсетіледі. ЕАЭО аясында фитосанитариялық сертификаттар бойынша деректер алмасу электрондық форматта жолға қойылған. Қазақстан мен Ресейдің ақпараттық жүйелерін интеграциялау ЕЭК алаңында халықаралық сынақтардан сәтті өтті.
Отырысқа қатысушылар азық-түлік қауіпсіздігі мәселесін талқылады. Ресейдің Ауыл шаруашылығы министрі Оксана Луттың мәліметінше, өткен жылдың қорытындысы бойынша ЕАЭО-ның өзін-өзі қамтамасыз ету деңгейі 94%-ды құрады.
"Одақ аясындағы ғылыми әлеуетті шоғырландыру - заманауи агроөнеркәсіптік кешеннің инновациялық негізін қалыптастырудың қажетті шарты. Аграрлық ғылымды дамыту бағытындағы бірлескен жұмыс озық әзірлемелерді енгізуге және бүкіл саланың тиімділігін арттыруға қажетті нәтиже береді", - деп атап өтті Оксана Лут.
Тараптар АӨК-тегі бірлескен жұмысты кооперациялық жобаларды іске асыру, тұқым шаруашылығы мен селекцияны дамыту, инвестициялық және өндірістік кооперация, сондай-ақ 2026-2030 жылдарға арналған ғылыми зерттеулер мәселелерін де талқылады.
Қойма куәліктері жүйесі тағы бір талқыланған тақырып болды. Тиісті келісім 2026 жылғы 1 шілдеде күшіне енді. Ол астық пен басқа да ауыл шаруашылығы өнімдерін несие алу үшін кепіл ретінде пайдалануға мүмкіндік береді.
Сонымен қатар, қатысушылар ЕАЭО-да халал өнімдерді өзара тану туралы келісімді дайындау мәселесін талқылады. Бастаманы Қырғызстан ұсынды. Ортақ ережелер әкімшілік кедергілерді азайтып, өзара сауданы жеңілдетеді деп күтілуде.
"Біздің елдерімізде өндірістік, инвестициялық және ғылыми әлеует айтарлықтай жоғары. Келесі кезеңнің міндеті - осы мүмкіндіктерді барынша тиімді біріктіру. Бірлескен жобалар жаңа қосылған құн жасауға, азық-түлік қауіпсіздігін нығайтуға, өткізу нарықтарын кеңейтуге және ЕАЭО өнімдерінің бәсекеге қабілеттілігін арттыруға тиіс", - деп атап өтті министр.
Келесі жылы ЕАЭО Агроөнеркәсіптік саясат жөніндегі кеңесіне төрағалық ету Қырғыз Республикасына өтеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстандықтар әлем бойынша QR-код арқылы қашан төлем жасай алады - Ұлттық банктің жауабы
Сурет: ЖИ
Қазақстан ұлттық төлем жүйесін шет мемлекеттердің төлем жүйелерімен интеграциялау бағытында кезең-кезеңімен жұмыс жүргізіп жатыр. Бұл туралы ҚР Ұлттық банкі төрағасының орынбасары Бинұр Жәленов мәлімдеді, деп хабарлайды агенттік тілшісі.
"Кейбір елдермен пилоттық жобаларды, тестілеуді биылғы жылдың соңында бастаймыз. Мысалы, Қытай Халық Республикасымен. Егер тестілеу сәтті өтсе, келесі жылдың өзінде қазақстандықтар Қытайда кез келген банк қосымшасы арқылы QR-кодпен төлем жасай алады деп үміттенеміз. Бұл мүмкіндік кері бағытта да қолжетімді болады", - деді спикер.
Оның айтуынша, қазір 11 мемлекетпен, атап айтқанда Қытай, БАӘ, Өзбекстан, Қырғызстан және Үндістан елдеріммен жұмыс жүргізіліп жатыр. Әр елмен интеграцияның жеке кезеңдері белгіленген.
Ұлттық банк төрағасының орынбасары әр елмен жұмыс жеке жол картасы бойынша жүргізіліп жатқанын атап өтті. Кейбір мемлекеттермен трансшекаралық QR-төлемдер келесі жылы іске қосылуы мүмкін, ал басқа елдермен бұл үдеріс көбірек уақытты қажет етеді.
"Барлық он бір мемлекет немесе кейін қосылатын басқа да елдер бойынша нақтырақ жағдай қалыптасқан кезде, міндетті түрде жеке ақпарат жариялаймыз", - деді Бинұр Жәленов.
Бұған дейін Қазақстанда мобильді аударымдар лимиті 1 млн теңгеге дейін ұлғайтылатыны хабарланған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда мобильді аударымдар лимиті 1 млн теңгеге дейін ұлғайтылады
Банкаралық мобильді төлемдер жүйесі аясында телефон нөмірі бойынша аударымдар лимитін екі есе ұлғайту жоспарланып отыр, деп мәлім етті ҚР Ұлттық банкі төрағасының орынбасары Бинұр Жәленов Үкіметте өткен брифингте.
Тиісті нормативтік құқықтық актінің жобасы талқылауға шығарылды.
"Біздің жүйе аясында бекітілетін базалық лимиттер бар. Бүгінде біз жобаны "Ашық НҚА" порталында талқылауға шығардық. Бір транзакция бойынша бұл лимит 500 мың теңгеден 1 млн теңгеге дейін ұлғайтылды", - деп мәлім етті спикер.
Оның айтуынша, жаңа ережелер қазан айының соңында күшіне енуі мүмкін.
Бұл ретте банктер өздерінің тәуекел саясатын ескере отырып, клиенттер үшін жеке лимиттер белгілеуге құқылы. Сондай-ақ, пайдаланушы банктің мобильді қосымшасында қолжетімді лимиттерді өзі белгілей алады.
Ұлттық банк төрағасының орынбасары "бірыңғай QR" деп аталатын банкаралық мобильді төлемдер жүйесі Қазақстанда 19 шілдеде іске қосылғанын еске салды. QR арқылы төлем жасаумен қатар, жүйе телефон нөмірі бойынша ақша аударуға мүмкіндік береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ұлттық банк QR-төлемдерді ҚҚС-тан босату ұсынысын түсіндірді
Сурет: Depositphotos
Ұлттық банк төрағасының орынбасары Бинұр Жәленов Үкіметтегі баспасөз мәслихатында жуықта Үкіметте айтылған QR-төлемдерін ҚҚС-тан босату туралы ұсынысқа қатысты шешімнің нәтижесі қандай болуы мүмкін екендігі туралы ойымен бөлісті, деп хабарлайды агенттік тілшісі.
Бұл мәселе журналистердің QR-төлемдерін ҚҚС-тан босату банк комиссияларының мөлшеріне, атап айтқанда кәсіпкерлер төлейтін бірыңғай QR бойынша комиссияға әсер ете ме деп сұрағынан кейін талқыланған.
"Шынында да, жуырда жобалық кеңсенің отырысында қолма-қол ақшасыз төлемдерді ҚҚС-тан босату мәселесі талқыланды. Бұл, ең алдымен, шарттарды теңестіру үшін қажет. Салық кодексінің қолданыстағы редакциясында кейбір қолма-қол ақшасыз төлемдер, мысалы, карточка арқылы есеп айырысу ҚҚС-тан босатылған. Біз ұлттық төлем жүйесін, соның ішінде бірыңғай QR-ды дамытып жатқандықтан, барлығына бірдей шарттар белгілеу ұсынылды. Бұл түсінбеушілікті болдырмауға және әкімшілендіруді жеңілдетуге мүмкіндік береді", - деді Бинұр Жәленов.
Оның айтуынша, ұсыныс тұжырымдамалық тұрғыдан қолдау тапқан. Үкіметпен бірлесіп егжей-тегжейі пысықталғаннан кейін құжат заң шығарушылардың қарауына енгізіледі. Түпкілікті шешімді Құрылтай қабылдайды.
"Егер ұсыныс қолдау тапса, оның бизнес пен тұтынушылар үшін комиссияларға тікелей әсерін алдын ала бағалау қиын. Әр банк комиссия мөлшерін дербес белгілейді. Сонымен қатар комиссия бірнеше бөліктен тұрады: банкаралық комиссия - интерчейндж деп аталатын төлем, төлем жүйесінің комиссиясы және банктің өз шығындарын қамтитын комиссиясы", - деп қорытындылады Ұлттық банк төрағасының орынбасары.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Оңтүстік Кореяның автоөндірушісі Қазақстанның ұлттық автомобиль брендін дамытуға атсалысуға ниетті
Сурет: Depositphotos
Оңтүстік Кореяның Kia компаниясы қазақстандық ұлттық автомобиль брендін дамытуға атсалысуға ниетті, деп хабарлайды Ақорданың баспасөз қызметінен.
Тиісті келісім Қазақстан президенті Қасым-Жомарт Тоқаевтың Hyundai Motor Group компаниясының президенті әрі стратегия және жоспарлау бөлімшесінің басшысы Сунг Киммен кездесуінің қорытындысы бойынша жасалды.
"Kia компаниясының өкілдері Қазақстанның ұлттық автомобиль брендін қалыптастыруға үлес қосу ниетін мәлімдеді", - деп жазылған хабарламада.
Кездесуде Тоқаев Hyundai Motor Group корпорациясы Қазақстанның автокөлік өнеркәсібін дамытуға айтарлықтай үлес қосқанын атап өтіп, өндірісті локализациялауды одан әрі тереңдету, автобөлшектерді көптеп шығару және экспорттық саладағы әлеуетін нығайту шараларының маңызына тоқталды.
Президент Қазақстанды автомобиль өндірісі мен экспорты бойынша ірі өңірлік орталыққа айналдыру, өндірістің толық циклін дамытуға ден қою сынды перспективті міндеттер айқындалғанын мәлім етті.
Тараптар электр көлігін дамыту, соның ішінде электромобильдер мен олардың компоненттерін өндіру, сондай-ақ қуаттау инфрақұрылымын құру мәселелерін жеке талқылады.
Сунг Ким Hyundai мен Kia жобаларына ұдайы қолдау көрсетіп келе жатқаны үшін Қасым-Жомарт Тоқаевқа алғыс айтты. Hyundai Motor Group жетекшісі компания үшін Қазақстан нарық қана емес, ТМД елдері бойынша маңызды өңірлік орталық саналатынын жеткізді.
Кездесу қорытындысы бойынша Hyundai Motor Company мен Astana Motors жаңа Hyundai Tucson моделін өндіру туралы келісімдерге қол жеткізілді.
Бұған дейін алғашқы қазақстандық автомобиль алдағы төрт жылда таныстырылуы мүмкін екені хабарланған болатын.
Сонымен қатар, Батыс Қазақстан облысында газ өңдеу зауытын салу туралы QazaqGaz, Hyundai Engineering және SICIM Kazakhstan компаниялары арасында келісімдермен алмасты. Hyundai Engineering басшылығы да Қазақстанмен мұнай-газ саласында, өнеркәсіп пен инфрақұрылым бағыттарында ынтымақтастықты дамытуға дайын екенін білдірді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматы мен Alatau City-де Lotte қонақүйлерін салу жоспарланып отыр
Сурет: ЖИ
Оңтүстік Кореяның Lotte брендіне тиесілі қонақүйлерді Алматы мен Alatau City-де салу жоспарланып отыр. Қазақстан Президенті Қасым-Жомарт Тоқаевтың Lotte Group төрағасы Дон Бин Шинмен кездесуінің қорытындысы бойынша Hotel Lotte Co. Ltd және Sensata Invest тиісті меморандумдарға қол қойды, деп хабарлайды Ақорданың баспасөз қызметінен.
Тоқаев Алматыда алғашқы Lotte қонақүйін салу жоспарын құптап, компанияның Қазақстандағы қонақүй бизнесін одан әрі кеңейту перспективаларын атап өтті.
Кездесуде Lotte компаниясының еліміздің тамақ өнеркәсібіндегі қызметін жоғары бағалап, "Рахат" брендін ілгерілетуге, сондай-ақ Алматы және Шымкент қалаларындағы өндірістік алаңдарды жаңғыртуға қатысты табысты жобаларына назар аударды.
Сонымен қатар, тараптар Lotte Global Logistics компаниясының көлік-логистика инфрақұрылымын жандандырып, өңірлік және халықаралық нарықтарға шығу мүмкіндігін арттыру жөніндегі Lotte Global Logistics жоспарына тоқталды.
Дон Бин Шин Lotte компаниясының тамақ өнеркәсібі, логистика қызметі және қонақ үй бизнесі салаларына инвестиция құю жоспарын растады. Сонымен қатар ол Alatau City жобасын дамытуға, соның ішінде Iconic Complex кешенінің құрылысына қатысуға ниетті екенін жеткізді.
Кездесу қорытындысы бойынша Hotel Lotte Co. Ltd және Sensata Invest Алматы мен Alatau City-де Lotte қонақүйлерін салу жөніндегі өзара түсіністік туралы меморандумдармен алмасты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан теміржол арқылы экспортталатын астық көлемін арттырды
Сурет: Depositphotos
2026 жылдың сегіз айында теміржол арқылы сыртқы нарықтарға 7,2 млн тонна астық жөнелтілді. Бұл өткен жылдың сәйкес кезеңімен салыстырғанда 14%-ға артық, деп хабарлайды ҚР Көлік министрлігінің баспасөз қызметінен.
Бір жыл бұрын осы кезеңде сыртқы нарықтарға теміржол арқылы 6,3 млн тонна астық жөнелтілген.
Экспорттық тасымалдардың негізгі көлемі Орталық Азия елдеріне тиесілі - 4,8 млн тонна, бұл өткен жылғы көрсеткіштен 37%-ға жоғары. Атап айтқанда, Өзбекстанға 3,6 млн тонна, Тәжікстанға - 1 млн тонна астық жөнелтілген.
Ауғанстанға жеткізілім көлемі әсіресе айтарлықтай өсті - 4,4 есе артып, 655 мың тоннаға жетті. Қытайға теміржол арқылы 558 мың тонна астық тасымалданды, бұл өткен жылғы көрсеткіштен 33 пайызға көп.
Жалпы қаңтар-тамыз айларында Қазақстанда теміржол арқылы 9,3 млн тонна астық тасымалданды. Бір жыл бұрын бұл көрсеткіш 8,2 млн тоннаны құраған. Өсім 13 пайыз болды.
Ағымдағы жылдың тамыз айында теміржол көлігімен тасымалдау көлемі 1,1 млн тоннаны құрап, өткен жылдың тамыз айымен салыстырғанда 35%-ға артты.
Астық тасымалын тұрақты әрі уақтылы қамтамасыз ету мақсатында Қазақстан Республикасы Көлік министрлігі астықты теміржол көлігімен тасымалдауды ұйымдастыру және үйлестіру жөніндегі жұмыс тобын құрды. Жұмыс тобы тасымалдау процесіне қатысушылардың қызметін үйлестіреді, сондай-ақ теміржол инфрақұрылымы мен вагондар паркінің тасымалдау көлемінің артуына дайындығын бақылайтын болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан автотасымалдарға тағы 20 мың рұқсат бланкісімен алмасады
Қазақстан мен Өзбекстан халықаралық автомобиль тасымалдарына қосымша 20 мың рұқсат бланкісімен алмасуға келісті. Бұл туралы Қазақстан-Өзбекстан халықаралық автомобиль қатынасы мәселелері жөніндегі аралас комиссиясының отырысында белгілі болды, деп хабарлайды ҚР Көлік министрлігінің баспасөз қызметі.
"Тасымалдаушылардың қажеттілігін қамтамасыз ету және жүк тасымалының тұрақты жүруіне жағдай жасау мақсатында Қазақстан мен Өзбекстан 2026 жылға қосымша 20 мың рұқсат бланкісімен алмасуға келісті", - делінген хабарламада.
Сонымен қатар, тараптар 2026 жылдың соңына дейін электрондық рұқсат бланкілерімен шектеусіз алмасуға көшу мәселесін пысықтауға уағдаласты. Бұл халықаралық автокөлік тасымалдарын жыл сайын белгіленетін рұқсат квотасына байланысты шектеулерсіз жүзеге асыруға мүмкіндік береді.
Естеріңізге сала кетсек, бұған дейін Қазақстан мен Өзбекстан стратегиялық ынтымақтастықты кеңейту мәселелерін талқылаған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Корея Орта дәліз арқылы жүк ағынын арттыруды талқылады
Сурет: "Атамекен" ҰКП
Сеулде Қазақстан президентінің Кореяға сапары аясында ҚР "Атамекен" ҰКП қатысуымен ұйымдастырылған "Қазақстан Республикасы - Корея Республикасы: Көлік және логистика" бизнес-форумы өтті, деп хабарлайды палатаның баспасөз қызметінен.
Іс-шараға екі елдің мемлекеттік құрылымдары, көлік-логистика компаниялары мен бизнес өкілдерінен 70-ке жуық адам қатысты. Тараптар теміржол, әуе және мультимодальды тасымалдарды дамыту, логистиканы цифрландыру және бірлескен инфрақұрылымдық жобаларды іске асыру мәселелерін талқылады.
2025 жылдың қорытындысы бойынша Қазақстан мен Корея арасындағы теміржол арқылы жүк тасымалының көлемі 117,8 мың тоннаны құрады, оның 116,9 мың тоннасы транзиттің еншісінде. 2026 жылдың бірінші жартыжылдығында 43,7 мың тонна жүк тасымалданды, оның барлығы транзиттік ағын есебінен жүзеге асырылды.
Форумға қатысушылар жекелеген тасымалдардан тұрақты жүк сервистеріне көшу және тасымалданатын тауарлар тізімін кеңейту қажеттілігін атап өтті.
Әуе арқылы жүк тасымалдауға да ерекше назар аударылды. Қолданыстағы уағдаластықтар аптасына 20-ға дейін жүк рейсін, соның ішінде әуе еркіндігінің бесінші дәрежесі құқығын пайдалана отырып орындауға мүмкіндік береді.
Тараптар сондай-ақ ТХКБ-ны дамыту және теңіз, теміржол, автомобиль және әуе көлігін интеграциялау мәселелерін талқылады. Атап айтқанда, Air+Rail, Air+Road және Sea+Rail үлгілері бойынша мультимодальды бағыттар құру, терминалдық инфрақұрылымды дамыту және тасымалдарды цифрландыру мәселелері сөз болды.
"Атамекен" ҰКП Төралқасының төрағасы Қанат Шарлапаев шеңберлік уағдаластықтардан нақты бірлескен жобаларға көшу қажеттігін атап өтті.
Форум қорытындысы бойынша қазақстандық және кореялық компаниялар бірқатар құжатқа қол қойды. B2B-кездесулер барысында бизнес өкілдері нақты бағыттарды, жүк тасымалы бағыттары мен инвестициялық жобаларды талқылады.
Бұған дейін Қазақстан мен Оңтүстік Корея өнеркәсіптік ынтымақтастықты кеңейтуге келіскен болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.