Қазақстан мен Түркия негізгі және туристік бағыттар бойынша тұрақты әуе рейстерінің рұқсат етілген санын аптасына 120-дан 224-ке дейін, яғни екі есеге жуық арттыруға келісті, деп хабарлайды ҚР Азаматтық авиация комитеті.
Келісімге 13-14 тамызда Ыстанбұлда өткен екі елдің авиациялық билік өкілдері арасындағы келіссөздер барысында қол жеткізілді. Кездесу қорытындысы бойынша тараптар азаматтық авиация саласындағы өзара түсіністік туралы жаңа меморандумға қол қойды.
Негізгі бағыттар бойынша (Ыстанбұлдан Астана, Алматы және Шымкент қалаларына, Анкарадан Астана және Алматы қалаларына) екі тараптың әуекомпаниялары үшін рұқсат етілген рейстер саны аптасына 76-дан 138 рейске дейін ұлғайтылды.
Анталья мен Бодрумнан Қазақстан қалаларына қатынайтын рейстер саны аптасына 44-тен 86 рейске дейін арттырылды.
Осылайша, жоғарыда аталған бағыттар бойынша рұқсат етілген рейстердің жалпы саны аптасына 120-дан 224 рейске дейін көбейді.
Қалған барлық бағыттар бойынша екі тараптың әуе компанияларына аптасына 14 рейске дейін орындауға мүмкіндік көзделді. Бұл тікелей әуе қатынасын кеңейтуге және өңірлік көлік байланыстылығын дамытуға жағдай жасайды.
Сонымен қатар, екі тарап үшінші елдерге тасымалдарды жүзеге асыру мақсатында әуе еркіндігінің бесінші дәрежесін пайдалана отырып, 76-ға дейін жүк рейсін орындау туралы уағдаластыққа қол жеткізді.
Сонымен қатар тараптар "әуе еркіндігінің бесінші дәрежесі" құқығын пайдалана отырып, 76-ға дейін жүк рейсін орындауға рұқсат беру жөнінде уағдаласты.
Естеріңізге сала кетсек, бұған дейін Air China әуе компаниясы Астанадан Бейжіңге қатынайтын рейстер санын аптасына алтыға дейін арттырғаны хабарланған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.