Бектенов: Заңсыз алынған 500 миллиард теңгеге жуық ақша мен мүлік мемлекетке қайтарылды
Астана. 18 қазан. KAZAKHSTAN TODAY - Антикор басшысы Олжас Бектенов заңсыз жолмен алынған ақша мен қылмыстық іске қатысы бар азаматтар туралы айтты.
Заңсыз алынған қаражатты, мүлікті мемлекетке қайтару бойынша ауқымды жұмыс жүргізіліп жатыр. Бұл жерде жасыратын ештеңе жоқ, биыл бұл жұмыс қыза түсті. Бүгінгі таңда бұл сандар көбейді. 500 миллиард теңгеге жуық ақша мен мүлік мемлекетке қайтарылды. Біз бұл жұмысты тоқтатпаймыз. Қылмыстық істерге қатысы бар тұлғалардың қылмыстық жолмен алынған шетелдегі 400 миллиард теңгеден астам мүлкін анықтадық. Әңгіме алдағы уақытта мемлекетке қайтарылатын триллион теңге туралы болып отыр", - деді Бектенов.
Оның айтуынша, өткен жылдары сыбайлас жемқорлық қылмыстары үшін мемлекетке өтелген сома жылына шамамен 30 миллиард теңгені құраған, деп хабарлайды Azattyq Ruhy Tengrinews.kz-ке сілтеме жасап
2020 жылы бұл шамамен 60 миллиард болса, өзге жылдары 20-30 миллиард теңге болды. Мемлекетке келтірілген шығын еселеп өсіп, қазір триллионға жетті. Мен мұны мақтану үшін айтып отырған жоқпын. Біз бұрын да тиімді жұмыс істей алар едік, бірақ оған саяси жағдай әсер еткенін барлығы біледі, оны ашық айту керек. Биыл біз Мемлекет басшысының елдегі тәртіпті қалпына келтірудегі ерік-жігері мен экономиканы монополиясыздандыруға, олигархияны жоюына куә болып отырмыз. Бұл жұмыс жалғасын табады. Нәтижесі бұдан да жоғары болатынына сенемін", - деді Олжас Бектенов.
Оның айтуынша, триллион теңге шетелден ғана емес, ел ішінен де қайтарылды.
Заңсыз жолмен алынған мүлік мемлекет меншігіне қайтарылады. Кезінде олар жекеменшікке өткен. Оған қолма-қол ақша, әртүрлі жоспардағы компания да жатады. Барлығы кешенді түрде болған", - деді Антикор басшысы.
Естеріңізге сала кетейік, Қайрат Сатыбалды мен басқа да тұлғаларға қатысты істі тергеу барысында "Қазақтелеком" АҚ мен "Көліктік сервис орталығы" АҚ қаражатын жымқыру фактілері бойынша мемлекетке жалпы сомасы 240 миллиард теңгеден асатын немесе 500 миллион доллардан асатын заңсыз жолмен алынған активтер мен ақшалай қаражат қайтарылды.
Шілде айында Бас прокуратура Қайрат Боранбаев, Қайрат Сатыбалдыұлы, Гүлмира Сатыбалды, "РОП" ЖШС басшыларына қатысты істерді тергеу аясында мемлекетке қайтарылған сомаларды жариялады.
МКК ақпараты бойынша, Қытаймен кедендік шекарада тәртіп орнатуға қатысты Мемлекет басшысының тапсырмасын орындау аясында жүргізілген тесерулер нәтижесінде бүгінгі таңда 10 уәкілетті экономикалық операторлардан бюджетке 59,5 млрд. теңге өндірілді.
Сонымен қатар, экономикалық ресурстардың заңсыз шоғырлануына қарсы іс-қимыл мәселелері жөніндегі ведомствоаралық комиссия жұмысының үш айында мемлекетке келтірілген залал өтеліп, жалпы сомасы 523 млрд теңгеден астам активтер қайтарылғаны хабарланған болатын.
Ақпарат көзі: azattyq-ruhy.kz
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.