Берлинде Қазақстан -Германия экономикалық форумы болып өтті
Берлинде Қазақстан -Германия экономикалық форумы болып өтті
Астана. 7 мамыр. "Қазақстан Бүгін" - Берлинде Қазақстан елшілігі мен Дойче банктің ұйымдастыруымен қазақ-герман экономикалық форумы болып өтті, деп хабарлайды "Қазақстан Бүгін" агенттігінің тілшісі ҚР Сыртқы істер министрлігінің баспасөз қызметіне сілтеме жасай отырып.
"Шараның мақсаты Қазақстан экономикасының әртараптандырылуы және модернизациялануы жағдайында алдыңғы қатарлы неміс технологиясы мен инвестициясын тарту мақсатында Қазақстан өңірлерінің инвестициялық әлеуеті мен әлеуметтік-кәсіпкерлік корпорациялар қызметін таныстыру болып табылады", - деп көрсетілген Сыртқы істер министрлігінің сәрсенбі күні таратылған хабарламасында.
Құрамына "Самұрық" мемлекеттік холдингінің, "Қазына" тұрақты даму қорының, "Сарыарқа", "Оңтүстік", "Батыс", "Жетісу", "Тобыл" және "Каспий" әлеуметтік-кәсіпкерлік корпорацияларының басшылары кірген Қазақстан делегациясына Қазақстан Республикасы президентінің экономикалық мәселелер жөніндегі кеңесшісі Исет Исекешев жетекшілік жасады.
"Форум Германия бизнесінің үлкен қызығушылығын туғызды. Оған Қазақстанда жұмыс істейтін және біздің елімізде бизнесін орнатуды әрі кеңейтуді көздеген 150 неміс компаниясының өкілдері болып табылатын 250 адам қатысты", - деп хабарлайды ҚР СІМ.
Сыртқы экономика министрінің орынбасары әрі Қазақстан-Германия сауда-экономикалық жұмыс тобының тең төрағасы Карл Эрнст Браунердің атап көрсеткеніндей, Қазақстан өңірдегі тұрақтандыру рөлін атқаруда және ақылға қонымды ішкі, сыртқы саясат жүргізуде. Ал еліміздегі экономикалық жағдайды әлемдік дағдарысқа қарамастан инвесторлар үшін тұрақты және тартымды қылып сақтай алудың сәті түскен. Жұмыс тобының кезекті отырысын маусымның 23-інде өткізу жоспарланып отыр.
"Самұрық" мемлекеттік холдингтің басшысы Қанат Бозымбаев: "кейбір жобалар оларды бірігіп жүзеге асыру үшін жеткілікті дәйектерге ие", - деді.
Дойче банктің Орта және Шығыс Еуропа елдеріндегі атқарушы директоры, Қазақстан Республикасы президенті жанындағы Шетел инвесторлары кеңесінің мүшесі Петер Тилстің немістің "ноу-хауын" Қазақстанның банк секторына енгізу жөніндегі ұсынысы айтарлықтай маңызды және өзекті болды.
Өткен форум нәтижелері Қазақстан - Германия экономикалық ынтымақтастығының әрі қарайғы дамуына серпін беріп, алдағы күзге жоспарланған Германия федералдық президенті Хорст Келердің Қазақстанға сапарының экономикалық жағын дайындауға арналған.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.