Биыл Қазақстанда астық тапшылығы болмайды - телеарна
Биыл Қазақстанда астық тапшылығы болмайды - телеарна
Алматы. 8 тамыз. "Қазақстан Бүгін" - Биыл Қазақстан астық өндіру мәселесінде орташа өнім деңгейін толық қамтамасыз ете алады. Сондықтан елде астық тапшылығы болмайды, қайта артық астығымызды шет мемлекеттерге де сата алады. Бұл туралы Республика Ауыл шаруашылығы министрі Ақылбек Күрішбаев кеше Алматы облысындағы жұмыс сапары кезінде мәлімдеді, деп хабарлайды агенттік тілшісі хабар агенттігіне сілтеме жасап.
"Биыл Қазақстанның Оңтүстік және Шығыс аймақтарында құрғақшылық болып тұр. Дегенмен, орақ түскен алқаптарда астықтың орташа түсімі жаман емес. Алматы облысына жұмыс бабындағы сапармен келген Республика Ауыл шаруашылығы министрі Ақылбек Күрішбаев Ескелді ауданындағы егіншілік жайымен танысу кезінде бұл пікірді нақтылай түсті",- дейді Хабар тілшісі.
"Бидай биыл өзімізге жеткілікті. Біз басында болжамымызды айтқанбыз, орташа өнім болады деп. Сол орташа өніміміз бар. Сондықтан биыл нан мәселесі бойынша, жаңағы астық мәселесі бойынша Қазақстанда ешқандай проблема болмайды. Сонымен қатар біз экспортқа шығаратын потенциалымыз да бар биыл",- деді ҚР Ауыл шаруашылығы министрі Ақылбек Күрішбаев.
Министрдің айтуынша, биыл дүние жүзі бойынша 665 миллион тонна бидай өндіріледі деген болжам бар. Бұның былтырғы көрсеткіштен 53 миллион тоннаға көп екенін ескерсек, әлем халықтарының тоқшылықта болатындығында күмән жоқ. Ресей мен Украинаның дихандары биыл үлкен нәтижелерге жетпек. Ал, Қазақстан астықты орта деңгейде өндіргенімен, бидайының сапасы жөнінен ешбір елге есе жібермейді, деді Ауыл шаруашылығы министрі Ақылбек Күрішбаев.
Жетісу - жер жәннаты. Мұнда бидайдан өзге қант қызылшасы мен күнбағыс, майбұршақ пен көкөністің алуан түрі өсіріледі. Ендігі жерде олардың көлемін ұлғайтып, өнімін арттыру міндеті тұр. Қазір қант қызылшасын өсіретін шаруашылықтар әр гектар үшін мемлекеттен 50мың теңге субсидия алып отыр. Бұл жұмсалған шығындардың 30 пайызын жабуға жететін жәрдем. Ауыл шаруашылығы министрі бүгінде мал азығын дайындаудың қарқынын бір сәт бәсеңдетуге болмайды, ал, мал басын арттыра беру керек деп ауылдықтарға тапсырманы нықтап айтты. Алматы облысы алдағы қыстамаға 1,5 миллион тонна жем-шөп қорын жасақтауы керек. Оның 70 пайыздан астамы дайындалған. Үкімет Алматы қаласының айналасында азық-түлік белдеуін жасау міндетін қойып отыр. Бұл қала тұрғындары үшін де, облыстың шаруашылықтары үшін де тиімді болмақ.
"Қазір енді шаруашылықтардың мүмкіншіліктерін қарап, осыларға тиісті кредиттерді беріп, солардың өндірісін дамытып, осылардың барлығын Алматы қаласына әкелу керек. Сондықтан алдымызда үлкен жоба бар. Соған байланысты мына Шеңгелдінің массиві бар, содан кейін Алматының жанындағы үлкен шаруашылықтарға осы жобаны өткізетін боламыз",- деді Ауыл шаруашылығы министрі.
Ғалымдардың болжауынша, Алматы облысында суармалы жерлердің көлемін 670 мың гектарға ұлғайтуға болады. Оны жүзеге асыру керек. Одан кейін суды үнемді пайдалануға дағдыланып, тамшылатып суару технологияларын қолданысқа енгізу қажет. Министр ауыл шаруашылығындағы мамандарға осындай тапсырма жүктеді. Осы сапарында министр Ақылбек Күрішбаев Алматы облысының Шеңгелді алқабы мен Балқаш ауданында болып, жергілікті мамандармен кездесулер өткізді. Министрдің сапары енді Жамбыл облысында жалғасады.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.