Биыл жазғы бидай себілетін аумақ былтырғыдан 875,2 мың гектарға көбейіп, 13,9 млн гектарға жетті
Биыл жазғы бидай себілетін аумақ былтырғыдан 875,2 мың гектарға көбейіп, 13,9 млн гектарға жетті
Астана. 9 маусым. "Қазақстан Бүгін" - Биыл жазғы бидай себілетін аумақ былтырғыдан 875,2 мың гектарға көбейіп, 13,9 млн гектарға жетті, деп хабарлайды "Қазақстан Бүгін" агенттігі ҚР Ауылшаруашылығы министрлігінің баспасөз қызметіне сілтеме жасап.
Баспасөз қызметінің ақпаратына сәйкес, ҚР Ауылшаруашылығы министрлігі көктемгі егін егу науқанының аяқталуына байланысты бүгін баспасөз мәслихатын өткізді. Оған ауылшаруашылығы министрінің орынбасары Арман Евниев қатысты.
Оның айтуынша, қазір тұқым себу науқаны аяқталды. Көктемде жалпы аумағы 18,3 млн гектар жерге дән себілді. Бұл былтырғы деңгеймен салыстырғанда 0,9 млн гектарға артық.
"Ал, жазғы астық дақылдары 16,3 млн гектар жерге себілді. Бұл былтырғы көрсеткіштен 714 мың гектарға көп. Оның ішінде, биыл жазғы бидай себілетін аумақ былтырғыдан 875,2 мың гектарға көбейіп, 13,9 млн гектарға жетті",- деді ол.
Мекеме ақпаратына сәйкес, мемлекет басшысының Қауіпсіздік кеңесінде берген тапсырмасына сәйкес, ішкі нарықта тапшы болатын дақыл түрлерінің егіс алқабы арттырылды. Атап айтқанда, майлы дақылдар биыл 1 млн 66 мың гектарға себілді. Бұл өткен жылмен салыстырғанда 161 мың гектарға көп. Сондай-ақ, күріш өсірілетін алқап 9 мың гектарға, картоп- 5 мың гектарға, қант қызылшасы - 0,1 мың гектарға, жеміс-жидек - 5 мың гектарға және жүзім - 0,8 мың гектарға ұлғайтылды. Ал, көкөніс өсірілетін алқаптар былтырғы жылғы деңгейде.
Бұдан өзге, жем -шөп өсірілетін аумақтар үштен бір есе немесе 775 мың гектарға көбейді.
Сонымен қатар, өндіріске соңғы үлгідегі ылғал қорын сақтайтын технологияларды енгізу жұмыстары да қарқын алып келеді. Мұндай әдіс биыл 10,2 млн гектар аумаққа қолданылды. Бұл өткен жылмен салыстырғанда 1,3 млн гектарға көп.
Қазір егінді күтіп -баптау жұмыстары басталды. Еліміздің түрлі аймақтарындағы топырақтың ылғал қоры көпжылғы көрсеткіштермен салыстырғанда орташа және орташа деңгейден жоғары деп бағаланып отыр. Мамандардың болжауынша, бұл жақсы өнім алуға негіз болады.
Еліміздің оңтүстігіндегі суармалы жерлерде әзірге жағдай тұрақты. Көрші елдермен оңтүстік аймақтарды сумен қамтамасыз ету жөніндегі келіссөздер жалғасып жатыр.
Шегірке зиянкестерімен күреске қажетті барлық шаралар да қолға алынды.
Ақпаратты пайдаланған жағдайда "Казахстан Сегодня" ақпараттық агенттігіне гиперсілтеме жасау міндетті. «Қазақстан Бүгін» Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.