Биылғы І тоқсанда еліміз жолдарымен 827 көліктің шамадан тыс жүкпен жүруіне тосқауыл қойылды
2020 жылдың І тоқсанының қорытындысы бойынша көліктік бақылау органдары 28032 жүк автокөлік құралын (АКҚ) тексеріп, заң талаптарын сақтамаған 4231 көлікті анықтады. Оның ішінде 219 шетелдік автокөлік құралы жол жүрудің рұқсат беру жүйесін бұзған.
Алматы. 15 мамыр. Kazakhstan Today - Биылғы І тоқсанда еліміз жолдарымен 827 көліктің шамадан тыс жүкпен жүруіне тосқауыл қойылды.
2020 жылдың І тоқсанының қорытындысы бойынша көліктік бақылау органдары 28032 жүк автокөлік құралын (АКҚ) тексеріп, заң талаптарын сақтамаған 4231 көлікті анықтады. Оның ішінде 219 шетелдік автокөлік құралы жол жүрудің рұқсат беру жүйесін бұзған.
Осы кезеңде 827 көліктің шамадан тыс жүкпен жүруіне тосқауыл қойылып, 774 млн. теңгеден астам алым және 198 млн. теңге айыппұл өндірілді. 46 шаруашылық субъектісі тексеріліп, 34 заң бұзушылық анықталды және 30 заң бұзушылықты жою туралы ұйғарым берілді.
Сондай-ақ, жүргізушілердің еңбек және демалыс режимін бұзғаны үшін 2382 әкімшілік материал ресімделіп, 30 млн. теңгеге жуық сомада айыппұл өндірілді. Бұл жалпы тасымалдау қауіпсіздігіне оң әсер етіп отыр.
Жалпы І тоқсанда ірі көлемдегі және ауыр салмақты автокөлік құралы үшін 6444 арнайы рұқсат, 51557 шетелге рұқсат, шетелдік тасымалдаушылар үшін 665 транзиттік рұқсат берілді. 12 техникалық байқау операторы ашылып, 4-і тізілімнен шығарылды. Қазіргі уақытта техникалық байқау орталықтарының саны - 673.
Мемлекеттік қызмет көрсету барысында байланысты азайту мақсатында 1, 6, 7-сыныпты қауіпті жүкті тасымалдауға ірі көлемдегі және ауыр салмақты автокөлік құралының жол жүруіне арнайы рұқсат, жүктердің халықаралық автомобиль тасымалдарын іске асыруға рұқсат беру туралы куәлік және елдегі төтенше жағдай кезеңінде автокөлік құралына рұқсат карточкасын беру сияқты өтінімдерді қарау қорытындылары бойынша 2020 жылғы 15 сәуірден бастап қағаз түрінде рұқсат берілмейтін болды. Рұқсат беру барысын бақылауды қамтамасыз ету үшін көліктік бақылау бекеттері ақпараттық талдау жүйесі мен көліктік деректер базасы мемлекеттік қызмет көрсету жүйесіне қосылды. Қазір оған мемлекеттік кірістер органдарын қосу жұмыстары жүргізілуде.Бұдан басқа, бір бекетке шамамен 1900 шақырым автожол келетіндіктен, жолдарды толықтай бақылаумен қамтамасыз ету қиын. Осыған байланысты стационарлық үлгідегі таразыларды қолданып, автожолдардың жекелеген учаскелерінде автоматтандырылған өлшеу станциясын (АБЖ) қою жұмыстары жүргізіліп жатыр.
Сонымен қатар, бекітілген жол картасына сәйкес, 2020 жылдың шілде айына дейін Талапкер кенті жанындағы "Алматы-Челябинск" автожолы учаскесінде автоматтандырылған өлшеу құралын пилоттық режимде іске қосу жоспарланған. Жоба "ҚазАвтоЖол" ҰК" АҚ-мен бірлесіп іске асырылады.
Көліктік бақылау саласын автоматтандыру автожолдарды бақылау көлемін ұлғайтуға мүмкіндік береді. Бұл жолдардың сақталуына және сыбайлас жемқорлық тәуекелдерін болдырмауға оң әсер етеді.
Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.