Индустрияландыру бағдарламасын жүзеге асыруға $70 - $100 млрд талап етіледі - Индустрия және сауда министрлігі
Астана. 15 желтоқсан. Kazakhstan Today - Алдын-ала мәлімет бойынша, Қазақстандағы индустрияландыру бағдарламасын жүзеге асыруға $70 - $100 млрд талап етіледі. Бұл туралы еліміздің индустрия және сауда министрі Исет Исекешев бүгін журналистерге берген сұхбатында мәлім етті, деп хабарлайды Kazakhstan Today.
"Президент индустрияландыру бағдарламасын жасау мақсатын қойды. Біз қазір оны жасап бітіруге таядық, қаңтарда оның тұсауын кесеміз. Маңызды мәселелердің бірі - бағдарламаны қаржыландыру. Түрлі бағаларға сәйкес, оған $70 - $100 млрд көлемінде қаржы қажет. Бұл - алдын-ала сандар ғана", - деді И. Исекешев.
Оның айтуынша, қаржының басым бөлігін "жеке инвестициялар құрайды, ал мемлекет тең қаржыландырады, тәуекелдің бір бөлігін өз мойнына алып, инфрақұрылымдық мәселелерді шешеді". "Біз бағдарламаны бизнеспен бірлесе жан-жақты талқылаудамыз. Қазір бізде 300-ден астам жоба жұмыс істеп жатыр", - деді министр.
"Қазірде біз инвесторлар мен кредиторлар клубы құрылғанын жария етіп отырмыз, оған 15 банк пен жеке меншік қор бірікті. Олардың бәрі де бағдарламаның жүзеге асырылуынан мүдделі", - деді И. Исекешев.
Оның айтуынша, "қазірдің өзінде кейбір банктер шамамен $1 млрд көлемінде несие бөлуге дайын".
Инвесторлар мен кредиторлар клубының бірінші отырысы барысында ҚР Индустрия және сауда министрлігі мен жетекші қаржылық ұйымдар, атап айтсақ, Қазақстанның Даму банкі, Еуразиялық даму банкі, HSBC, Ресей Сбербанкі, RBS, Societe General, Credit Suisse, Халық банкі, "ATФ Банк", "Банк ЦентрКредит", VISOR Capital, Kazyna Capital Manadgment, ИФД Resmi, BCC Invest өзара ынтымақтастық туралы келісімге қол қойды.
"Бұл құжат - мемлекет басшысының серпінді индустриялық даму бағдарламасын жүзеге асыру тапсырмасын орындауға бағытталған ауқымды жұмыстардың бастамасы", - деді И. Исекешев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.