Қазақстан мен Қытай арасында жаңа жүк тасымалдау бағыты ашылды
Мемлекеттік шекараның Қорғас тұсында салынған шойын жол екі елде тауар айналымын ұлғайтып, еліміздің транзиттік және экспорттық әлеуетін арттыра түспек.
Астана. 25-желтоқсан. Kazakhstan Today - Қазақстан мен Қытай Халық Республикасы арасында жаңа жүк тасымалдау бағыты ашылды, деп хабарлайды Kazakhstan Today агенттігінің тілшісі.
Мемлекеттік шекараның Қорғас тұсында салынған шойын жол екі елде тауар айналымын ұлғайтып, еліміздің транзиттік және экспорттық әлеуетін арттыра түспек.
Мұнымен қатар, бұл жобаның арқасында 2 мыңнан астам жаңа жұмыс орны ашылады. 2009 жылы Президенттің батасымен басталған Жетіген-Қорғас темір жол құрылысы аяқталды. Соңғы 21 жылда жалғыз темір жол бағыты Достық-Алашанқай асуы арқылы 156 миллион тонна жүк тасымалданса, енді бұл көрсеткіш айтарлықтай өспек.
"Бұл тарихи жоба деп айтуға болады. Өйткені бұл жол Қазақстан экономикасы, жалпы Орталық Азия мемлекеттерінің транзиттік және экспорттық әлеуетін арттырады", деп мәлім етті "ҚТЖ" ҰК" президенті Асқар Мамин.
Бүгінде екі ел арасындағы тауар айналымы 25 миллиард долларға жетті. Ондағы темір жол тасымалының үлесі аз емес. Енді, екінші бағыт ашылғаннан кейін тіптен көбейеді, - дейді сарапшылар. 2015 жылы жүк айналымы жылына 10 миллион тоннаға, ал 2020 жылы 15 миллион тоннаға жетеді деп болжанып отыр. Жетіген-Қорғас темір жол тармағының ұзындығы 300 шақырым. Экономикалық және әлеуметтік маңызы зор бұл бағыт елдің шығыс өңірінде салынып жатқан заманауи көліктік-логистикалық хабтың негізгі бөлігіне айналады.
"Бұл Алматы облысы үшін өте маңызды жоба. Себебі, мұнда мыңдаған жұмыс орындары ашылады. Осында өздеріңіз көріп отырсыздар, Нұркент деген жаңа ауыл ашылды. Жаңа мектеп, балабақша салынды" - деп мәлім етті Алматы облысы әкімінің орынбасары Серік Тұрдалиев.
Жаңа халықаралық темір жол бағытының құрылысы басталғалы оның бойында 5 станса, 9 разъезд, 28 көпір, 640 шақырым электр желілері, сондай-ақ 260 қызметтік нысан мен тұрғын үйлер салынған. Жаңа шаһарда қоныс тойын тойлап жатқан жас мамандар, болашақтың жарқын болатынына сенімді.
22 желтоқсан күні жаңа асу арқылы алғашқы халықаралық жүк поездары өтті. Ал салтанатты ашылудан кейін, тараптар арасында жылжымалы құрамдарды ресми түрде қабылап өткізу жұмысы басталады. 2013 жылы жаңа желі арқылы 3 миллион тонна жүк өткізу жоспарланып отыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.