Қазақстан премьер-министрі Кедендік одақтың жұмысы басталмай тұрып, салық органдарының жұмысын үйлестіруді тапсырды
Астана. 22 желтоқсан. Kazakhstan Today - Қазақстан премьер-министрі Кедендік одақтың жұмысы басталмай тұрып, салық органдарының жұмысын үйлестіруді тапсырды. Бүгін өткен үкіметтің отырысында премьер-министр Кәрім Мәсімов осындай тапсырма жүктеді, деп хабарлайды Kazakhstan Today.
"Кедендік одақ пен Біртұтас экономикалық кеңістікке қатысты көптеген сұрақтар туындап отыр. Келесі жылдың басынан бастап күшіне енетін Кедендік одақ аясында Қазақстанның салық саласына түсетін салмақ арта түспек",- деді Кәрім Мәсімов.
"Біздің еліміздегі салық салу саясаты артықша тартымды болғандықтан, Кедендік одақтың басқа елдеріне шығатын кедендік рәсімдеулердің бір бөлігі біз арқылы өтпек. Көптеген мәселелерді оқиға орнында шешуге тура келмек. Сол себепті үйлестіру дұрыс болуы керек", - деді премьер үкімет басшысының бірінші орынбасары Өмірзақ Шүкеев пен қаржы министрі Болат Жәмішевке қаратып айтқан сөзінде.
Салық комитетінің төрағасы Дәулет Ерғожинға айтқан сөзінде премьер алдағы 2010 жылы "әділетті салық төлеушілерді мазаламауды, ал салықтан жалтырғандардың бәрін анықтап, тиісті жазаларын беруді" тапсырды.
Сондай-ақ, ол 2011 жылдан бастап бір реттік талондарды алып тастау және жаппай декларация толтыру мәселелерін мұқият қарауды тапсырды. Дәулет Ерғожин өз кезегінде атап өткендей, "2010 жылы Кедендік одаққа мүшелікке өтуге байланысты бізде реформаларды одан әрі жалғастыру және әкімшілікті жақсартуға байланысты мәселелер туындап отыр".
Осыған байланысты ол қаржы полициясы органдарымен арадағы ықпалдастықты жақсарту қажеттігін атап өтті, тіпті "біртұтас диспетчерлік орталық құру қажет", деді ол. "Бұған қоса шамалы қаржы бөлу арқылы Ресеймен және Беларусьпен өзара ақпарат алмасу үшін ақпараттық жүйе құру керек", - деді Д. Ерғожин.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.