Қазақстан президентінің пайымдауынша, таяу перспективада энергия тапшылығы проблемасын шешудің жалғыз тәсілі энергия үнемдеуге ынталандыру болмақ
Қазақстан президентінің пайымдауынша, таяу перспективада энергия тапшылығы проблемасын шешудің жалғыз тәсілі энергия үнемдеуге ынталандыру болмақ
Атырау. 6 маусым. "Қазақстан Бүгін" - Қазақстан президенті Нұрсұлтан Назарбаевтың пайымдауынша, таяу перспективада энергия тапшылығы проблемасын шешудің жалғыз тәсілі энергия үнемдеуге ынталандыру болмақ. Бұл туралы ол бүгін Атырауда Қазақстан президентінің жанындағы шетелдік инвесторлар кеңесінің 19-шы жалпы отырысында пікір білдірді, деп хабарлайды агенттік тілшісі.
"Электр энергетикасы -жаңа өндірісті ашуды ойластырудан бастап оны іске қосуға дейін біршама уақыт кететін аса инерциялы салалардың бірі, бірақ біз энергия тапшылығына таяу жылдарда тап келгелі отырмыз. Сол сабепті, орта және қысқа мерзімді перспективада бұл проблеманы шешудің жалғыз жолы энергия үнемдеуге ынталандыру болмақ деп санаймын", -деді Н. Назарбаев.
"Бұл мәселеде сөзден іске көшетін кез жетті, ал қуаттылықты арттыру мәселесі бойынша біз 3-4 жылға кенжелеп қалдық, бұл мәселеде уақыт ұттыруға болмайды", - деді ол.
Мемлекет басшысы тұрғындар мен өнеркәсіптік тұтынушылар арасында энергия үнемдеу қажеттігі туралы насихатты күшейту қажет деп пайымдайды.
"Біз Еуропалық қайта құру және даму банкімен және оның құрылымдарымен бірлесе отырып, бұл жұмысты жүйелі түрде жүргізетін боламыз деп ойлаймын", -деді Қазақстан президенті.
Н. Назарбаев сонымен бірге энергия үнемдеудің ауқымды резерві энергияны желімен жіберген кездегі шығындарды азайтуда жатқанын атап өтті. "Жекелеген өңірлерде нормативтік шығындар 22% құрайды, сонымен бірге, жалпы энергия тұтынудың орта есеппен 7% құрайтын коммерциялық шығындар бар. Осы шығындарды азайту қажет, энергия тұтыну көлемін қысқартатын технологиялардың трансферті мен заманауи жабдықтардың лизингін ұлғайту керек", - деді Н. Назарбаев.
"Өзінің жұмсайтын энергиясының көлемін қысқарту бағдарламасын жүзеге асырушы кәсіпорындарға мемлекет тарапынан қолдау, соның ішінде қаржылай көмек көрсету қажет",- деді ол.
"Тек тұрмыстық және өнкркәсіптік тұтыну мәселесін ғана емес, сонымен бірге, жалпы қалалық жоспарлау, жобалау, нысандар мен ғимараттарды салу, көлік пен коммуналдық қызметтің жұмысына қатысты кешенді көзқарас керек", -деді президент.
"Дүниежүзінде энергия үнемдеуге жұмсалатын қаражат жаңа энергетикалық нысандар құрылысын салуға толыққанды баламаға айналды, көп жағдайда ол тіпті орынды", - деді ол.
Осыған байланысты Н. Назарбаев Экономикалық ынтымақтастық ұйымына мүше елдерді мысалға келтірді, олар кейінгі 25 жылда мақсатты энергия үнемдеу саясатының есебінен Жалпы ішкі өнімнің энергиялық сыйымдылығын 28%-ға төмендеткен.
"Құрметті кеңес мүшелері, сіздер басқаратын кәсіпорындар да Қазақстанның энергия үнемдеу саясатын жүргізуінде басқа кәсіпорындар теңесуге тырысатын флагманға айналуға тиіс", -деді Н. Назарбаев.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.