Қазақстанда үш банк жабылу қаупі бар аймақта тұр - Қаржы нарығы мен қаржылық ұйымдарды реттеу және қадағалау агенттігі
Қазақстанда үш банк жабылу қаупі бар аймақта тұр - Қаржы нарығы мен қаржылық ұйымдарды реттеу және қадағалау агенттігі
Астана. 1 қазан. Kazakhstan Today - Қазақстанда үш банк жабылу қаупі бар аймақта тұр. Бұл туралы бүгін парламент сенатында журналистерге берген сұхбатында Қаржы нарығы мен қаржылық ұйымдарды реттеу және қадағалау агенттігінің төрайымы Елена Бахмутова мәлім етті, деп хабарлайды Kazakhstan Today.
"Бүгінгі жағдаймен үш банк стратегиялық инвесторды іздестіріп жатқанын мәлімдеді, қазір олар осы мәселемен айналысып жатыр. Бұлар - "Данабанк", "Казинкомбанк" және "Метрокомбанк", - деді Е. Бахмутова.
"Олар тәуекелі бар аймақта, өйткені, олар капиталдың жеткілікті болуы жөніндегі норманы орындау үшін стратегиялық инвесторды табуы қажет. Олар өздерінде потенциалдық стратегиялық инвесторлары бар екендігі туралы құжаттар тапсырды, бірақ бұл осы инвесторлар реттеушінің талаптарын қанағаттандырады және олар инвестор болады дегенді білдірмейді. Сол себепті де аталған банктер жабылу қаупі бар аймақта", - деді ол.
Қаржы нарығы мен қаржылық ұйымдарды реттеу және қадағалау агенттігінің төрайымы еске салып өткендей, бүгіннен бастап банктің меншіктегі капиталын ұлғайту жөніндегі былтыр қабылданған норма күшіне енеді. "1 қазаннан бастап банктің меншіктегі капиталының ең төменгі абсолютті көлемі 5 млрд теңгеден кем болмауы тиіс. Бірақ өңірлерде жұмыс істейтін, яғни, Алматы мен Астанада тіркелмеген банктерге бұл норма жүрмейді, мұндай банктердің меншіктегі капиталының мөлшері 2 млрд теңге болмақ. Бірақ ол үшін олар бірқатар шарттарды орындауға тиіс", - деді ол.
Атап айтсақ, Е. Бахмутованың айтуынша, мұндай банктер "негізінен Алматы мен Астанадан тыс жерлердегі несие алушыларды несиелендіруге, және өзінің депозиттік базасының 50% -ынан кем түспейтін көлемде тағы да Алматы мен Астанадан тыс жерлерде тұратын халықтың есебінен депозиттер тартуға тиіс".
"Бұл дегеніңіз, ертеңнен бастап осы норманы орындамайтын банктер тәуекел аймағына жатқызылады дегенді білдіреді. Олар жабылады деп ешкім айтқан жоқ. Одан әрі Қаржы нарығы мен қаржылық ұйымдарды реттеу және қадағалау агенттігінің құзыретіндегі шаралар, атап айтсақ, ықпал шаралары мен санкциялар қолданылады", - деді төрайым.
"Үш банк капиталды ұлғайтуға қажетті шараны қабылдады. Тағы да үш банк өңірлік банк ретінде қайта құрылуда, яғни, олар үшін 2 млрд теңге жеткілікті. Ал қалған үш банк - "Данабанк", "Казинкомбанк" пен "Метрокомбанк" - стратегиялық инвесторды іздестіріп жатқанын мәлімдеді ", - деді ол.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.