АСТАНА. 19-сәуір. Kazakhstan Today. Қазақстанның ауылшаруашылығы министрлігі болашақ астық түсіміне қатысты ойдағыдай болжам жасап отыр, деп хабарлайды Kazakhstan Today тілшісі.
"Биыл ылғал қоры мол, дайындалған тұқымның сапасы жоғары, жанар-жағармаймен қамтамасыз ету және техникамен жарақтау деңгейі өткен жылдардағы жағдаймен салыстырғанда анағұрлым жоғары",- деді мекеме басшысы Ахметжан Есімов министрліктегі алқа мәжілісінен кейін журналистерге берген сұхбатында. "Сол себепті сенім мол",- деді ол.
Сонымен бірге министрдің айтуынша, "тұқым дайындау мен жанар-жағармаймен қамтамасыз етуге қатысты тауқымет жоқ". "Қазақстандық дихандар науқанға дайын",- деді А.Есімов.
Министрдің айтуынша, 15-мамырға дейін еліміздің негізгі астықты өңірлері - Қостанай, Ақмола, Солтүстік Қазақстан және Павлодар облыстарында егінді қолға алу көзделуде.
Ауылшаруашылығы министрлігінің мәліметіне сәйкес, Қазақстанда ағымдағы жылы жаздық және бұршақты дақылдарға арналған егіс алаңдарының аумағы 13,9 млн гектарды құрайды. "Биыл мемлекет субсидия бөлінетін басым дақылдарды айқындап берді. Осыған байланысты аталған 14 млн гектардың аясында егіс алқаптарының құрылымында өзгерістер болып, экономикалық тұрғыда тиімді дақылдарға арналған алқаптар ұлғайтылуда",- деді А.Есімов.
Атап айтсақ, ҚР ауылшаруашылығы министрлігінің егін шаруашылығы және фитосанитарлық қауіпсіздік департаментінің директоры Анна Гусьтің хабарлауынша, "егіс алқаптары құрылымында бидай егілетін алқаптардың үлес салмағын 2006-жылғы 67,5%-тен 66,5%-ке дейін азайту межеленген". Сонымен бірге арпалы алқаптарды 39,8 мың гектарға, сұлылы алқапты 20,4 мың гектарға, жүгері егілетін алқаптарды 7,7 мың гектарға, қарақұмықты алқаптарды 11,9 мың гектарға және рапсты алқаптарды 57,8 мың гектарға арттыру жоспарланған, деді А. Гусь.
Тұтастай алғанда, департамент директорының хабарлауынша, жаздық бидай мен бұршақты дақылдар 13,9 млн га, соның ішінде жаздық бидай 11,5 млн га, майлы дақылдар 702,4 мың га алқапты иемденбек. Мақта мен күріш егілетін алқаптар тиісінше 1 мың және 1,8 мың гектарға қысқарады.
Сонымен қатар ағымдағы жылы жеміс-жидек дақылдарына арналған алқаптар ауқымы 2,8 мың гектарға, жүзім алқаптары 1,2 мың гектарға артады, деді А.Гусь.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Қазақстанның ауылшаруашылығы министрлігі болашақ астық түсіміне ойдағыдай болжам жасап отыр
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.