АСТАНА. 14-маусым. Kazakhstan Today. "Қазына" АҚ мен РФ Даму банкі "Батыс Еуропа-Батыс Қытай" транзиттік дәлізін құруға атсалысады. Бұл туралы "Қазына" АҚ басқармаларының төрағасы Қайрат Келімбетов журналистерге берген сұхбатында мәлім етті, деп хабарлайды Kazakhstan Today тілшісі.
"Біз таяуда ғана Санкт-Петербург қаласында өткен экономикалық форумда бұрынғы Внешэкономбанк, қазіргі атауымен РФ Даму банкімен ниет хаттамасына қол қойып, соған сәйкес таяу уақыттарда әрбір жақ 500 млн доллардан үлес қосу арқылы жалпы капиталы 1 млрд АҚШ долларын құрайтын біріккен қор құруға келістік",- деді Қ.Келімбетов.
Оның айтуынша, бұл қор "Қазақстан мен Ресей экономикаларның интеграциялануына септігін тигізетін жобаларды қаржыландыруға бағытталады". ""Батыс Еуропа-Батыс Қытай", немесе, нақтырақ айтсақ, Санкт-Петербургтен Қорғасқа дейінгі транзиттік дәлізі бойынша көлік-логистикалық желі құру - осындай бір ірі жоба",- деді "Қазына" басшысы.
Оның айтуынша, бұл жоба аясында Ресей аумағында 14, Қазақстан аумағында 5 логистикалық орталық құру межеленген. "Осындай жобаны "Еуразия Логистик" компаниясы жүзеге асыруда және біз қазір осы жобаны қаржыландыру жөнінде келіссөздер жүргізіп жатырмыз",- деді ол.
"Бұл қордың сыртында Ресеймен бірлесе отырып жарғылық қоры 1,5 млрд АҚШ долларын құрайтын Еуразиялық даму банкі де құрылғанын ескерсек, екі елдің үкіметтері экономикаларымыздың өзара кірігуі үшін қандай күш жұмсап отырғанын өздеріңіз де байқайсыздар",- деді Қ.Келімбетов. Ол сонымен бірге "Санкт-Петербург қаласында Ресейдің "РусАл" және "КамАЗ" секілді ірі компаниялары тарапынан таяу уақыттарда Қазақстан аумағында ірі өндірістер ашу мәселесін пысықтау туралы мәмілеге қол жеткізілгендігін" еске салды.
"Біз сонымен бірге алдағы уақытта осы тектес қорларды құру мүмкіндігі туралы көршілес елдер - Қырғызстан және Тәжікстан үкіметтерімен де талқыламақшымыз",- деді Қ.Келімбетов. "Орталық Азияда біздің іс-қызметіміздің қарқындана түсуіне де, Ресеймен бірлескен инвестициялық қордың құрылуына да Еуропалық қайта құру және даму банкі де үлкен қызығушылық танытып отыр, осы мәселені біз ертеңгі күні президент Лемьермен кездесуде талқылайтын боламыз",- деді ол.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
"Қазына" мен РФ Даму банкі "Батыс Еуропа-Батыс Қытай" транзиттік дәлізін құруға атсалысады
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.