"Қорғас-Жетіген" жаңа темір жол желісін салу жобасы бойынша байқауда "ЕNRC Logistics" компаниясы жеңіске жетті - ҚР Көлік және коммуникация министрлігі
"Қорғас-Жетіген" жаңа темір жол желісін салу жобасы бойынша байқауда "ЕNRC Logistics" компаниясы жеңіске жетті - ҚР Көлік және коммуникация министрлігі
Астана. 30-сәуір. "Қазақстан Бүгін" - Концессиялар жөніндегі комиссияның хаттамалық шешімімен "Қорғас-Жетіген" жаңа темір жол желісін салу жобасы бойынша байқауда "ЕNRC Logistics" компаниясы жеңіске жетті, деп хабарлайды агенттік ҚР Көлік және коммуникациялар министрлігіне сілтеме жасап.
Баспасөз қызметінің ақпаратына сәйкес, бүгін ҚР Көлік және коммуникация министрі Серік Ахметов Алматы облысына іс-сапармен барып, онда облыс активінің қатысуымен осы аймақтың көліктік-коммуникациялық кешенінің мәселелері бойынша мәжіліс өткізді. "Темір жол саласында "Қорғас-Жетіген" жаңа темір жол желісін салу жобасы жүзеге асырыла бастады. Бұл жобаның саяси және экономикалық маңызы зор",- делінген хабарламада.
"Бұл жоба Қытаймен арадағы шекарада екінші темір жол шекаралық өткізу бекетін ашуды көздейді. Бұл өткізу бекеті жүк тасымалы, соның ішінде транзиттік тасымал көлемінің артуына мүмкіндік береді. Жаңа темір жол желісін пайдалануға берген кезде Ақтау мен Алматыдан Қытайға баратын жол 550 шақырымға қысқарады".
Баспасөз қызметінің ақпаратына сәйкес, министр сондай-ақ, темір жол саласын дамытудың келесі бір маңызды бағыты - жүк тасымалы ерекше тығыз болатын учаскелерді электрлендіру жайлы да әңгімеледі. "Қазіргі таңда "Алматы-Ақтоғай", "Ақтоғай-Достық", "Ақтоғай-Мойынты" учаскелерін электрлендіру жобалары бойынша техникалық-экономикалық негіздемесі дайындалып жатыр. Ол биылғы жылдың қазанында дайын болады. Бұл жобаларды да кеонцессиялық негізде жүзеге асыру жоспарлануда",- делінген хабарламада.
Болашақта Қытай мен Қазақстан арасындағы жүк айналымы жылына 25 млн. тоннаға дейін жетеді. Бұл Достық станциясын дамуты жобасында қарастырылған. Сондықтан, биылғы жылы концессиялық негізде "Қорғас-Жетіген" темір жол желісін салу жобасы жүзеге асырыла бастайды. Бұл екінші халықаралық өтпелді ашу арқылы Қазақстанның транзиттік әлеуетін ұтымдырақ қолдануға жағдай жасайды.
Темір жол желісінің ұзақтығы - 298,4 км, жалпы құны - 93 млрд. теңге.
Қазіргі таңда концессионер "ЕNRC Logistics" айқындалды, келісім шартқа қол қойылды.
"Қорғас-Жетіген" темір жол желісі Алматы облысының бес ауданының аумағы арқылы өтетін болады (Іле, Талғар, Еңбекшіқазақ, Ұйғыр, Панфилов).
Құрылыс жұмыстары кезінде 5,5 мыңға жуық жұмыс орындары пайда болып, кейін жолды пайдалану кезінде тағы 2 мыңнан астам жұмыс орындары пайда болады.
Талдықорған қаласындағы мәжілістің қорытындысы бойынша, хаттамаға қол қойылды. Содан кейін министр С.Ахметов Алматы қаласына жол тартып, онда "ЕNRC Logistics" ЖШС компаниясының өкілдерімен кездесті, деп хабарладйы баспасөз қызметі.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.