ҚР Премьер-Министрі Ақтөбе облысындағы Индустрияландыру картасының нысандарын аралады
Бүгін Ақтөбеде ҚР Премьер-Министрі Серік Ахметов республикалық Индустрияландыру картасы жобаларын жүзеге асыру барысымен танысты, деп Премьер-Министрдің ресми порталы хабарлады.
Алматы. 29 қаңтар. Kazakhstan today. Бүгін Ақтөбеде ҚР Премьер-Министрі Серік Ахметов республикалық Индустрияландыру картасы жобаларын жүзеге асыру барысымен танысты, деп Премьер-Министрдің ресми порталы хабарлады.
"Үкімет басшысы "Қазхром" ТҰК" АҚ-ның жаңа ферроқортпа зауытында (№ 4 цех) болды.Жобаны жүзеге асыру жоғары көміртекті феррохром өндірісіне жаңа технологиялар, сондай-ақ жаңа электр жабдықтарын, автоматтандыру және тұрақты қуат пешін пайдалану бойынша инновациялық технологиялар енгізуді қарастырады", - делінген хабарламада.
Жаңа зауыт өнімнің өзіндік құнын төмендетуге және тауарлы жоғары көміртекті ферроқортпа шығаруды арттыруға мүмкіндік береді. Жоғары көміртекті ферроқортпа шығару бойынша республиканың экспорттық әлеуеті 16 пайызға, ал Ақтөбе облысында 46 пайызға өседі.
Зауыт 2013 жылы желтоқсанда іске қосылды және оның жоспарлы қуаты 2014 жылы 226 мың. тоннадан астам ферроқортпаны құрауы тиіс.
Зауытта болған соң Премьер-Министр өкілетті органдарға кәсіпорынның жоспарлы қуатына шығуын қамтамасыз ету бойынша бірқатар тапсырмалар берді.
Үкімет басшысы сондай-ақ рельсті балка зауыты құрылысы барысымен танысты.
Үстіміздегі жылы зауытты іске қосу "ҚТЖ"ҰК" АҚ-ның рельске сұранысын қамтамасыз етуге, сондай-ақ оны шекаралас мемлекеттерге экспорттауға мүмкіндік береді. Кәсіпорынның өндірістік қуаты 200 мың.тонна рельс пен 230 мың. тонна сұрыптау прокатын шығаруға мүмкіндік береді.
С.Ахметов зауыттың индустриялдық секторды, жалпы тұтастай аймақты дамытудағы маңызын атап көрсетті.
Премьер-Министр тоқтаған тағы бір бекет "Нұр Отан" партиясының облыстық филиалы болды. Бұл жерде Үкімет басшысына аймақта жүзеге асырылып жатқан ҮИИД МБ және АӨК дамыту жобалары таныстырылды.
Премьер-Министр сондай-ақ "Нұр Ақтөбе" тұрғын үй кешеніне барып, "Қолжетімді тұрғын үй-2020" бағдарламасының орындалу барысымен танысты. 2013 жылы бұл кешенде жалпы аумағы 75,4 мың. шаршы метр болатын 1131 пәтер пайдалануға берілсе, үстіміздегі жылы жалпы аумағы 32,6 мың. шаршы метрді құрайтын 540 пәтерді пайдалануға беру жоспарланып отыр.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.