ҚР Үкіметі Моноқалаларды дамытудың 2012-2020 жылдарға арналған бағдарламасын қабылдады
Астана. 21-мамыр. Kazakhstan Today - ҚР Үкіметі Моноқалаларды дамытудың 2012-2020 жылдарға арналған бағдарламасын қабылдады, деп хабарлайды Kazakhstan Today агенттігінің тілшісі.
Бүгін Үкімет Үйінде ҚР Премьер-Министрі Кәрім Мәсімовтің төрағалығымен Үкіметтің селекторлық отырысы өтті. ҚР Экономикалық даму және сауда министрі Бақытжан Сағынтаев министрлер кабинетінің қарауына Моноқалаларды дамытудың 2012-2020 жылдарға арналған бағдарламасының жобасын таныстырды.
Бағдарлама Елбасының "Илеуметтік-экономикалық жаңғырту - Қазақстан дамуының басты бағыты" атты ағымдағы жылдың 27 қаңтарындағы Қазақстан халқына арнаған Жолдауында берген тапсырмасына сәйкес әзірленді. Бағдарламаның мақсаты - орта және ұзақ мерзімдік перспективада моноқалалардың орнықты әлеуметтік-экономикалық дамуын қамтамасыз ету болып табылады. Осыған байланысты, Бағдарлама аясында тұрғындарының саны 1,5 млн. адамды құрайтын (еліміздегі халық санының 16 пайызы) 27 моноқала іріктеліп отыр.
"Илемдік тәжірибені және өзімізде бар проблемаларды талдау нәтижелерін ескере отырып, моноқалаларға көрсетілетін мемлекеттік қолдау шараларының төмендегі басым бағыттары ұсынылып отыр: бірінші басым бағыт- әлеуеті төмен моноқалалардың бірінші кезектегі көкейкесті мәселелерін шешу, екінші басым бағыт - әлеуеті орта моноқалаларды дамыту үшін жағдай жасау, үшінші басым бағыт - әлеуеті жоғары моноқалаларды бұдан әрі орнықты дамыту", - деп хабарлады Б.Сағынтаев.
Қалаларды топтастыру және басымдықтарын ескере отырып моноқалалардың мәселелерін шешу үшін жұмыс істеп тұрған кәсіпорындардың өндірістік сыйымдылығына байланысты моноқалаларды оңтайландыру көзделіп отыр. Моноқалалардың экономикалық әлеуетін және оларды жаңадан мамандандырудың мүмкіндіктерін анықтау жұмысы жүргізілетін болады. Соның нәтижесінде әрбір моноқала бойынша олардың перспективасы мен болжамды халық санын анықтай отырып, ұзақ мерзімді кезеңге Кешенді дамыту жоспарлары әзірленеді.
Экономиканы әртараптандыру, шағын және орта кәсіпкерлікті дамыту жөніндегі міндеттерді жүзеге асыру аясында бірқатар инвестициялық жобаларды жүзеге асыру, қала құрушы кәсіпорындарға қызмет көрсететін және қосалқы кәсіпорындар ашу, шалғайда орналасқан елді мекендерге жол салып, моноқалалардың транзиттік әлеуетін дамыту көзделіп отыр.
Кәсіпкерлікті дамытуға ерекше көңіл бөлінеді. Бағдарлама аясында шағын және орта бизнесті қолдау жөніндегі бірқатар шаралар қарастырылған, атап айтқанда, салалық шектеусіз несиелер бойынша пайыздық мөлшерлемелерді субсидиялау және несиелер бойынша пайыздық мөлшерлемелерді субсидиялаудың көлемін 7 пайыздан 10 пайызға дейін ұлғайту; жаңа өндірістер ашуға 1,5 млн. теңгеден 3 млн. теңгеге дейін гранттар беру; шағын және орта кәсіпкерлікті дамыту бойынша әріптестік бағдарламаларды (мемлекет пен қала құрушы кәсіпорындар арасындағы) іске асыру және Кәсіпкерлікті қолдау орталықтарын ашу жоспарлануда.
Үшінші кезектегі Бағдарлама міндеті - моноқалалардағы еңбек күштерінің жинақылығын арттыру, халықтың өз еркімен әлеуметтік-экономикалық даму әлеуеті жоғары және экономикалық өсімі бар орталықтарға көшуін ынталандыру болып табылады.
Сондай-ақ, Бағдарлама арқылы моноқалалардың әлеуметтік және инженерлік инфрақұрылымын қолдау көзделген. Жоғары және орта әлеуеті бар моноқалалар үшін бекітілген нормативтерге дейін жеткізе отырып, қалалардағы әлеуметтік маңызға ие нысандардың инфрақұрылымын қайта құрастыру жоспарланған.
Б.Сағынтаевтың айтуынша, Бағдарламаны іске асыру үшін 2013 жылы - 38,2 млрд. теңге, 2014 жылы - 43,2 млрлд. теңге және 2015 жылы - 53,9 млрд. теңге бөлу көзделген. "Жалпы алғанда, Бағдарлама екі сатыда іске асырылады, яғни бастапқы кезеңі 2013-2015 жылдарды қамтыса, 2020 жылға қарай нық дамуға жол ашылады. Бағдарламаны жүзеге асыру арқылы 2020 жылға қарай моноқалаларда белсенді жұмыс істейтін кәсіпорындар санын 2011 жылмен салыстырғанда 4 есеге көбейтіп, табысы ең төменгі күн көріс деңгейінен аз халықтың үлесін 6 пайыздан аспайтын деңгейге, жұмыссыздық деңгейін 5 пайыздан аспайтын деңгейге дейін жеткізуге мүмкіндік туады", - деп түйіндеді Б.Сағынтаев.
"Бұл Бағдарлама Елбасының халыққа арнаған биылғы Жолдауында айтқан тікелей тапсырмасы болып табылады. Менің ойымша, Бағдарлама жеткілікті түрде жан-жақты талқыланды", - деп атап өтті ҚР Премьер-Министрі Кәрім Мәсімов.
Талқылау қорытындысы бойынша ҚР Үкіметі моноқалаларды дамытудың 2012-2020 жылдарға арналған Бағдарламасын қабылдады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.