Маңғыстау облысында 2020 жылы 17 жобаны іске қосу жоспарланған
Маңғыстау облысында 2020 жылы экономиканың түрлі салаларында 111,0 млрд. теңгеге 17 жобаны іске қосу жоспарланған
Алматы. 12 ақпан. Kazakhstan Today - Маңғыстау облысында 2020 жылы экономиканың түрлі салаларында 111,0 млрд. теңгеге 17 жобаны іске қосу жоспарланған. Нәтижесінде, 1200-ден астам жұмыс орны ашылады деп көзделіп отыр. Бұл туралы Маңғыстау облысының әкімі Серікбай Трұмов аймақ тұрғындары алдында есеп беруінде мәлімдеді.
2020 жылға жоспарланған ең маңызды жобалар бұл:
1.Ақтау қаласы аумағында жылы жағажай ауданында туристік-қонақ үй кешені;
2.Түпқараған ауданында құс фабрикасы;
3.Шағын газ поршенді электр станциялары базасында "Қазақ газ өңдеу зауыты" ЖШС үшін электр энергиясын өндіру;
4.Полипропилен қаптамасын өндіру;
5.Қант шикізатын қайта өңдеу және оның негізінде қант құмы мен нават өндірісі бойынша шағын зауыты.
"Ақтау теңіз порты" АЭА аумағында 30 мекеме, оның ішінде 1 трансұлттық компанияны (Тенарис) қоса алғанда, шетелдік капиталдың қатысуымен 10 компания тіркелген. Бүгінгі күні аталған аумақта 1500-ден астам жұмыс орны құрылған. 18 кәсіпорын жұмыс істейді.
2019 жылы "Satex Chemie" ЖШС - битум эмульсиясы негізінде гидро оқшаулағыш материалдар өндіру жобасы іске қосылды.
2020 жылға жалпы сомасы 3,9 млрд. теңгеге 247 жаңа жұмыс орнын құрумен 3 жобаны іске қосу жоспарланған. Олар:
1. "Болат құю орталығы" ЖШС болаттан жасалған бұйымдар өндірісі (жоба құны - 871 млн. теңге, 15 жұмыс орны);
2. "PERAPLASTIC SEZ" ЖШС полипропилен қаптамасын өндіру. (жоба құны - 2,8 млрд. теңге, 200 жұмыс орны);
3."Достық-Полимер Плюс" ЖШС полимерлік орам (ыдыс) өндірісі (жоба құны - 295 млн. теңге, 32 жұмыс орны).
Инвестиция көлемін ұлғайту бойынша жұмыстарды жалғастыру мақсатында жыл басынан бері әлемнің 10-нан астам елінен, Ұлыбритания, Қытай, Германия, БАӘ, Швейцария, Италия, Франция, Түркменстан, Ресей және т.б. елдерінен әлеуетті инвесторлар мен кездесулер өткізіліп, онда инвесторлар энергетика, көлік және логистика, ауыл шаруашылығы, қалалық инфрақұрылым және т. б. сияқты экономика салаларындағы жобаларды іске асыруға қызығушылық танытты.
2019 жылдың 17-18 мамырында "Астана экономикалық форумы" аясында Маңғыстау облысы "Астананың халықаралық қаржы орталығымен" бірлесіп "Global Silk Road Mangystau invest 2019" халықаралық инвестициялық форумын өткізді. Оның барысында Астананың халықаралық қаржы орталығы мен халықаралық құқық қағидаттарында инвесторлармен жұмыс жүргізу бойынша меморандумға қол қойылды.
Форум қорытындысы бойынша инвесторлармен Маңғыстау облысында 2,2 млрд. АҚШ доллар сомаға 4 инвестициялық жобаны жүзеге асыру туралы келісімге қол жеткізілді. Атап айтқанда:
- "Олефиндер мен метанол өндіретін зауыт салу";
- "Логистикалық орталықтың құрылысы";
- "Бескемпір кен орны базасында шойын зауытын салу";
- "Көмірсутек шикізатын қайта өңдеу кешенін салу".
Ақпаратты пайдаланѓан жаѓдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігініњ материалдарына авторлық қ±қық.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.