ПАВЛОДАР. 31-қазан. Kazakhstan Today. Павлодар облысының әкімі химиялық зауыттың бұрынғы жұмысшыларын аштық жариялаудан бас тартуға көндіріп, оларға берешекті өтеуге уәде берді. Бұл туралы "Павлодар химиялық зауыты" АҚ-ның конкурстық басқарушысы Вильгельм Франц журналистерге хабарлады.
"Облыс әкімі Қайрат Нұрпейісов кәсіби дертке шалдыққан жұмысшылардың әрқайсысына таяу уақыттарда 150 мың теңгеден төлеуге уәде берді",- деді В.Франц. "Зауыттың мүлік кешенін сату процедурасының созылып кетуіне байланысты туындаған күрделі ахуалды еңсереуге мүмкіндік туды",- деді ол.
"Сауда-саттық жүзеге асырылғанға дейін бірінші кезекті кредиторларға тым құрыса жарым-жартылай болса да өтемақы төлеу үшін зауыт облыс әкімінің тікелей кепілдік беруімен 15 млн. теңге көлемінде несие алды,- деді В.Франц, - Ақшаны бір ірі кәсіпорын бөлді". Сонымен бірге конкурстық басқарушының айтуынша, ауыр науқасқа шалдыққан екі адамды емдеу үшін облыс әкімінің арнайы гранты бөлінді.
Бұдан бұрын да хабарлағанымыздай, Павлодар химиялық зауытының басым көпшілігі кәсіби дертке шалдыққан бұрынғы қызметкерлері 30-қазанда мерзімсіз аштық жариялайтындарын мәлім етті. Аса қауіпті сынап электролизі цехтарында істеген 70-тен астам адам аштық жариялауға қатысуға ниет білдірген. Павлодар химиялық зауытының бұрынғы қызметкерлері республика үкіметінен кәсіпорынның мүлік кешенін сатуды жеделдетуді сұрайды. Бұл жұмыстың ұзаққа созылып кетуі салдарынан адамдар бір жарым жылдан астам уақыттан бері денсаулығынан айрылуға байланысты өтемақыны ала алмай жүр.
Кәсіби дертке шалдыққандарға денсаулығынан айрылуға байланысты өтемақы төлеу 2005-жылдың шілде айында тоқтатылған. "Банкрот деп жариялау процедурасын өткізу және зауыт активтерін жаңа қожайынға табыс ету тәртіптеріне сәйкес, бірінші кезектегі кредиторларға 70 жасқа дейін жәрдемақы төленуге тиіс. Нәтижесінде зауыттың адамдарға төлеуге тиіс берешегі 119 млн. теңгеге жеткен.
Зауыттың мүлік кешенін сату шарасы бәсекелестіктің болмауына байланысты бірнеше мәрте кейінге шегерілген. Үкімет бекіткен ережеге сәйкес, болашақ қожайын бес валентті күкіртті фосформен жұмыс істеуге лицензиясы болуға тиіс деген талап бар. "Ал Павлодар химиялық зауыты үшін бес валентті күкіртті фосфор өндірісі басымдыққа жатпайды",- деді "Павлодар химиялық зауыты" АҚ-ның конкурстық басқарушысы Вильгельм Франц. Оның айтуынша, сауда-саттықтың жүргізілмеуіне бұрынғы химиялық зауытты қалпына келтіру жөнінде бағдарлама әкелген компаниялардың арасынан бір ғана компания қажетті лицензияға ие. Конкурстық басқарма қазан айының басында үкіметке Павлодар химиялық зауытының мүлік кешенін сату тәртіптерін қайта қарау қажеттігі жөнінде өтініш жолдаған.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Павлодар облысының әкімі химиялық зауыттың бұрынғы жұмысшыларына берешекті өтеуге уәде берді
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.