Риддерде моноқалаларды дамыту мәселесі талқыланды
Үкіметтік жұмыс тобын басқаратын бірінші вице-премьер Серік Ахметов "Қазмырышмаш" ЖШС кәсіпорнында қала активімен кеңес өткізді. Онда моноқалаларды дамыту мәселелері талқыланды.
Астана. 29-наурыз. Kazakhstan Today - Риддерде моноқалаларды дамыту мәселесі талқыланды, деп хабарлайды Kazakhstan Today агенттігінің тілшісі.
Үкіметтік жұмыс тобын басқаратын бірінші вице-премьер Серік Ахметов "Қазмырышмаш" ЖШС кәсіпорнында қала активімен кеңес өткізді. Онда моноқалаларды дамыту мәселелері талқыланды.
Жақында өткен Үкімет отырысында алдағы орта және ұзақ мерзімдік кезең ішінде моноқалалардың тұрақты әлеуметтік-экономикалық дамуын айқындауды басты мақсат еткен бағдарлама жобасы ұсынылған еді. Бағдарлама аясында Экономикалық даму және сауда министрлігі моноқалаларды тұрақты жұмыс істеп тұрған кәсіпорындардың өндірістік сыйымдылығына байланысты оңтайландыруды, экономиканы әртараптандырып, моноқалаларда жұмыс орындарын көбейту үшін шағын және орта кәсіпкерлікті дамытуды ұсынған болатын.
Республикадағы шағын қалалардың қатарына 27 елді мекен жатады, онда 1,5 млн. адам немесе қалалардағы халықтың 16 пайызы тұрады. Шығыс Қазақстан облысында шамамен 125 мың адам тұратын Риддер, Зырян, Серебрянск және Курчатов қалалары моноқала ретінде анықталды.
Бұл қалалардағы өзекті проблема - жүйеқұраушы кәсіпорындардың ұзақ мерзімге арналған жұмысының тиімділігін қамтамасыз ету және инженерлік, әлеуметтік инфрақұрылымдарды дамытудағы қиындықтарды шешу болып табылады.
2020 жылға қарай бұл қалалардағы халық саны 117,3 мың адамнан 124,7 мың адамға, ал өнеркәсіптік өнім өндірісі 257,1 млрд. теңгеден 325,7 млрд. теңгеге жетеді деп болжануда.
Кеңесте сөз алған С.Ахметов моноқалаларды дамыту өңірлік саясаттың басым бағыты болу керектігін, ал бұл өз кезегінде бизнес пен мемлекет арасындағы ынтымақтастыққа жол ашатынын атап өтті.
Мысалға, Риддер қаласында жақын күндері көшелерге жарық тартылып, иесіз қалған нысандар сүріп тасталады, су жеткізу нысандары мен жолдар жөндеуден өтеді.
"Жоспар бойынша негізгі тіршілік нысандары толықтай қалпына келтіріледі. Риддер қаласы үшін қазір инфрақұрылымды жақсартып, халықтың өмір сүру деңгейін арттыруға және білім беру мен денсаулық сақтау мекемелерінің жұмысын оңтайландыруға жақсы мүмкіндік туып отыр. Бұл тек мемлекет қана атқаратын жұмыс емес екенін түсінуіміз керек, Риддерде негізгі кәсіпорын - "Қазмырыш" бар", - деп атап өтті С.Ахметов.
Кеңес соңында ШҚО әкімдігі мен "Қазмырыш" ЖШС меморандумға қол қойды, құжат аясында кәсіпорын ағымдағы жылы облыстың әлеуметтік мәселелерін шешу үшін 2,6 млрд. теңге қаражат бөледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.