"Теңізшевройл" ЖШС газды алауда жағуды 94 пайызға қысқартқаны үшін әлемдік көшбасшы атанды
24 қазан күні Лондонда ілеспе мұнай газын жағуды азайту бойынша өткен жаһандық форумда "Теңізшевройл" ЖШС-нің (ТШО) газды алауда (факелде) жағуды қысқарту бойынша жетістіктері ерекше атап өтілді.
Астана. 16-қараша. Kazakhstan Today - "Теңізшевройл" ЖШС газды алауда жағуды 94 пайызға қысқартқаны үшін әлемдік көшбасшы атанды, деп хабарлайды Kazakhstan Today агенттігінің тілшісі.
24 қазан күні Лондонда ілеспе мұнай газын жағуды азайту бойынша өткен жаһандық форумда "Теңізшевройл" ЖШС-нің (ТШО) газды алауда (факелде) жағуды қысқарту бойынша жетістіктері ерекше атап өтілді.
Дүниежүзілік банктің газды алауда жағуды қысқарту жөніндегі жаһандық серіктестігі (ГАЖҚЖС) ТШО-ны газды алауда жағуды қысқарту бойынша әлемдік көшбасшы деп таныды. ТШО мұндай жетістікке газды кәдеге жарату (ГКЖ) жобасын сәтті жүзеге асыру нәтижесінде қол жеткізді. Аталмыш бағдарлама ТШО-ның газды алауларда дағдылы жағуды қысқарту жөніндегі міндеттемесін орындауға септігін тигізді. Кәсіпорын газды алауда жағудан болатын шығарындыларды 2000 жылдан бері 94 пайызға қысқартуға қол жеткізумен бірге, осы уақыт аралығында мұнай өндіру көлемін 147 пайызға арттырды.
"Серіктестеріміз және Қазақстан Республикасы Үкіметінің қолдауы нәтижесінде ТШО газды кәдеге жарату жобасын кестеге сай, уақытында сәтті аяқтай отырып, екінші буын зауыты мен шикі газды айдау нысанын іске қосу арқылы өндіріс көлемін айтарлықтай арттырды" - деп мәлімдеді ТШО-ның бас директоры Тим Миллер. -Газды кәдеге жарату жобасы ТШО-ның экологиялық көрсеткіштерін әлемдік деңгейге сай етуге деген ұмтылысын көрсетеді және де жоба 2000 жылдан бергі игерілген жалпы сомасы 2,2 млрд. доллар құрайтын қоршаған ортаны қорғауға бағытталған инвестициялық бағдарламамыздың бір бөлігі болып табылады.
Газды кәдеге жарату бағдарламасын жүзеге асыру қазақстандық жұмысшылар мен кәсіпорындардың мүмкіндіктерін барынша пайдалануға септігін тигізді.
"Газды кәдеге жарату бағдарламасы бойынша қазақстандық қамту үлесі 129 млн. АҚШ долларын құрады", - дейді ТШО бас директорының орынбасары Инуарбек Жәкиев. Оның айтуынша, жобаны жүзеге асырудың ең қызған шағында мердігер ұйымдардың 900 қызметкері жұмысқа тартылды. Құрылыс жұмыстарының 50 пайыздан астамын қазақстандық кәсіпорындар атқарды.
"Теңізшевройл" ЖШС шикі мұнайды, сұйық және құрғақ газды, сонымен бірге күкіртті жайғастыру, өндіру және өткізумен айналысады. Қауіпсіздік техникасы мен қоршаған ортаны қорғау жөніндегі барлық жұмыстар халықаралық талаптарға сай жүргізілуде. Қазақстанның батыс аймағында орналасқан Теңіз мұнай кеніші 1979 жылы ашылды. Қазір де ол әлемдегі ең терең және ірі мұнай кеніштерінің бірі болып саналады. "Теңізшевройл" ЖШС 1993 жылы Қазақстан Республикасы мен "Шеврон" компаниясы арасындағы келісім негізінде құрылды. "Теңізшевройл" ЖШС-нің қазіргі кездегі серіктестері: "Шеврон" - 50%, "ҚазМұнайГаз" - 20%, "ЭксонМобил" - 25% және "ЛукАрко" - 5%.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.