Ұлттық экспорттық стратегия аясында Қазақстан экспорттаушыларын қолдау орталығы құрылады
Ұлттық экспорттық стратегия аясында Қазақстанның экспорттаушыларын қолдау орталығы құрылады, деп мәлімдеді ұлттық агенттік басқарма төрағасының орынбасары Мейіржан Майкенов бүгін баспасөз конференциясында.
Алматы. 15 қаңтар. Kazakhstan today. Ұлттық экспорттық стратегия аясында Қазақстанның экспорттаушыларын қолдау орталығы құрылады, деп мәлімдеді ұлттық агенттік басқарма төрағасының орынбасары Мейіржан Майкенов бүгін баспасөз конференциясында.
"Бірінші кезекте шет елдерде отандық бизнесті қолдау желілерін құруға баса мән беріледі. Қазіргі жағдай көрсеткендей, Қазақстанда шет елдердегі отандық бизнесті қолдау желілері айтарлықтай дамымаған. Өздеріңізге мәлім, шет елдерде тек қана ресми және дипломатиялық елшіліктер ғана ашылған. Ал бизнестің дамуына жағдай жасайтын институттар жоқ. Сәйкесінше, бізге белсенді және жемісті түрде өз қызметімізді жүргізу үшін шет елдерде қазақстандық бизнеске қолдау көрсететін халықаралық желілер жетіспейді", - деді М.Майкенов.
Төраға орынбасарының айтуынша, аталмыш бағыттағы жұмыстар екі форматта жұмыс істейді: мемлекеттік - негізгі 12 елдегі елшіліктерде сауда атташелерін енгізу, сонымен қатар мемлекеттік-жеке меншік әріптестік аясындағы бизнес-әдіс.
Агенттіктің мәліметінше, қазақстандық экспорттың негізгі басымдылық берген 12 елі анықталған. Олар: Ресей мен оның шекаралас өңірлері, Өзбекстан, Қырғызстан, Тәжікстан, Түркменстан, Армения, Изірбайжан, Грузия, Қытай мен оның батыс өңірлері, Ауғанстан, Иран мен ЕО нарығы.
Майкеновтың айтуынша, аталмыш желілер қызметі елдің экспорттың әлеуетін 10 пайызға дейін арттырмақ.
"Аталмыш 12 елдегі елшіліктерде міндетті түрде сауда мамандары жұмыс істеулері керек. Яғни, кәсіпкерліктердің мүдделерімен сауда орындары, техникалық қолдау кеңестері мен кеңселер болуы мүмкін. Аталмыш жүйе бизнестің сұранысын қанағаттандырып, барынша ыңғайлы болуы керек", - деді Майкенов.
Оның айтуынша, аталмыш бағыттағы жұмыстар Қазақстанның Ұлттық кәсіпкерлер палатасымен бірігіп атқарылады.
Айта кету керек, ҚР Индустрия және жаңа технологиялар министрлігі "KAZNEX INVEST" Ұлттық экспорт және инвестиция агенттігімен біріге отырып ҚР Ұлттық экспорт стратегиясын дайындады.
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.