Валюталық дәліз бір АҚШ доллары үшін 127,5 - 165 теңге деңгейінде белгіленді - ҚР Ұлттық банкі
Валюталық дәліз бір АҚШ доллары үшін 127,5 - 165 теңге деңгейінде белгіленді - ҚР Ұлттық банкі
Алматы. 5 ақпан. Kazakhstan Today - 5 ақпаннан бастап бір АҚШ доллары үшін теңге бағамының ауытқу дәлізі 150 теңгеден +15/-22,5 теңгеге дейін кеңейтілді, деп хабарлайды Kazakhstan Today.
Бұдан бұрын да хабарлағанымыздай, 2010 жылы теңгенің ауытқуларының дәлізі бір АҚШ доллары үшін 150 теңге +15/-22,5 теңгеге дейін кеңейтіледі.
Баспасөз қызметінің ақпаратына сәйкес, Қазақстан Республикасының Ұлттық банкі 2010 жылы теңгенің айырбастау бағамының таргеттелетін орташа мәні бір АҚШ доллары үшін 150 теңге деңгейінде сақталатынын хабарлайды. Сонымен бірге әлемдік тауар және валюта нарықтарындағы ахуалды ескере отырып, сондай-ақ бағам белгілеудің икемділігін арттыру үшін жағдайлар жасау мақсатында теңгенің ауытқуларының дәлізі +15 теңге (немесе 10%) және -22,5 теңге (немесе 15%) дейін кеңейтіледі.
Теңге бағамының динамикасындағы басым үрдістер АҚШ долларының еуроға қатысты бағамының, Ресей рублінің осы екі валютаға қатысты бағамының динамикасына, Қазақстан Республикасының негізгі экспорттық тауарларына әлемдік бағаларға, сондай-ақ Қазақстан Республикасы төлем балансының жай-күйіне байланысты болады.
Бұл дәліз 2010 жылғы 5 ақпаннан бастап 2011 жылғы 20 наурызды қоса алғанда белгіленеді. Теңгенің АҚШ долларына қатысты бағамының таргеттелетін мәнін және/немесе ауытқулары дәлізінің шектерін өзгерту әлемдік валюта және тауар нарықтары көрсеткіштерінің динамикасындағы ұзақ мерзімді үрдістердің күрт өзгеруі кезінде ғана ықтимал.
Еске сала кетейік, қазіргі валюталық дәліз - бір доллар үшін 150 теңге, плюс-минус 3%, немесе 5 теңге - 2010 жылы да сақталады. Бұл туралы ҚР Ұлттық банкінің басшысы Григорий Марченко мәлім етті.
"Біздің пайымдауымызша, қазіргі валюталық дәліз 2010 жылы да сақталады ", - деді Г. Марченко.
Оның айтуынша, орта мерзімді перспективада "бұл дәліз ұлғайтылуы да мүмкін". "Түпкілікті есептер дайын болған кезде біз, әрине, оны, орта мерзімде дәліздің шектері қандай болатынын жария етеміз. Жалпы алғанда, валюталық дәліз саясатынан бас тартуды біз жоспарлап отырған жоқпыз. Валюталық дәліз саясаты өзінің оң нәтижесін берді деп қазір де айта аламыз және оны 2010 жылы да сақтап қаламыз", - деді ол.
ҚР Ұлттық банкі 2009 жылдың 4 ақпаннан бастап бір доллар үшін 120 теңге деңгейіндегі айқын емес дәлізде ұстап тұруды доғарды. Валюталық дәліз - бір доллар үшін 150 теңге, плюс-минус 3%, немесе 5 теңге болып белгіленді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан трансауған темір жол құрылысына қатысуға дайын
Қазақстан трансауған темір жол құрылысына қатысуға дайын, деп хабарлайды ҚР Премьер-министрінің баспасөз қызметінен.
Қазақстандық делегацияның Ауғанстанға сапарындағы негізгі мәселелердің бірі - бірлескен көлік мүмкіндіктерін кеңейту. Қазақстан және Ауғанстан премьер-министрлерінің орынбасарлары Серік Жұманғарин мен Абдулании Барадардың 24 сәуірде өткен кездесуінде тараптар Орталық және Оңтүстік Азияны интеграциялау жобаларындағы ынтымақтастықты дамытуға өзара мүдделілік танытты.
Атап айтқанда, қазақстандық тараптың трансауғандық дәлізді дамыту жобаларын: Термез - Мазари-Шариф - Кабул - Пешавар және Герат - Кандагар - Спин-Булдак темір жолдарын салу жөніндегі жобаларды іске асыруға қатысуға дайындығы белгіленді. Жоба Орталық және Оңтүстік Азия елдері арасында жүктерді жеткізу уақытын 10 есеге қысқартуға, сондай-ақ жүктерді тасымалдау құнын төмендетуге мүмкіндік береді. Қазақстан темір жолдың жоғарғы құрылысына арналған материалдарды, өз өндірісінің шпалдары мен бекіткіштерін жеткізу арқылы трансауған магистралінің құрылысына қатысуға дайын.
Соңғы үш жылда Қазақстаннан Ауғанстанға экспорттық тасымалдау көлемі тұрақты түрде өсіп келеді: 2023 жылы темір жол арқылы тасымалдау көлемі 2,7 млн тоннаны құрады, оның 1,5 млн тоннасы - ұн және астық. Бұл 2021 жылғы деңгеймен салыстырғанда 14%-ға көп. Алдағы жылдарға арналған болжам - экспорттың 40%-ға ұлғаюы. Бұл ретте 2030 жылға қарай тасымалдардың 3 есе өсуі күтілуде.
Тараптар сондай-ақ елдер арасындағы әуе қатынасын қалпына келтіру мүмкіндіктерін талқылады. Қазақстан мен Ауғанстанның авиациялық билігі арасындағы өзара түсіністік туралы меморандум шеңберінде Тараптардың авиатасымалдаушылары аптасына 3 тұрақты жолаушылар жүк рейстерін орындауға құқылы. Қазақстандық тарап бұл мәселені Ауған авиакомпанияларынан өтінімдер түскен кезде қарауға дайын.
Өткен кездесуде "ҚТЖ" ҰК" АҚ өкілдері экспорттық және транзиттік жобаларды таныстырды.
Бүгінде Қазақстаннан Өзбекстан, Ауғанстан, Пәкістан арқылы және одан әрі теңіз арқылы БАӘ-дегі Джебель-Али портына дейін жаңа мультимодальды экспорттық бағыттарды ұйымдастыру бойынша пилоттық жоба басталды. Жаңа бағыт KTZ Express-тің қатысуымен ұйымдастырылды. Экспорттаушы - қазақстандық Bio Synergy co, жүктерді жеткізу бойынша серіктес - пәкістандық National Logistics Cell (NLC). Қазіргі уақытта Павлодар облысында жүк тиеу басталды. Бұл - алюминий силикатты қуыс микросфера. Алматыда жүк контейнерлерге тиеліп, пәкістандық серіктес машиналарына ауыстырылады. Әрі қарай автокөлікпен Өзбекстан мен Ауғанстан арқылы Пәкістанның Карачи портына дейін жеткізіледі. Ол жерден екі контейнер теңіз арқылы БАӘ-дегі Джебель-Али портына дейін жөнелтіледі", - деді "ҚТЖ" ҰК" АҚ басқарушы директоры Бауыржан Орынбасаров.
Оның айтуынша, жүктерді межелі жерге жеткізудің күтілетін мерзімі-шамамен 20-25 күн. Пилоттық жобаны сәтті іске асыру кезінде осы бағыттың белсенді дамуы және жаңа бағыт бойынша жүк ағынының едәуір көлемін тарту күтіледі.
Сол күні Серік Жұманғариннің Ауғанстанның Сыртқы істер министрі Амир Муттакимен және сауда және өнеркәсіп министрі Нұриддин Азизимен кездесулері өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.