АСТАНА. 13-ақпан. Kazakhstan Today. Үкімет басшысының орынбасары - экономика және бюджетті жоспарлау министрі Аслан Мусиннің пікірінше, мемлекеттік мекемелер еліміздің бәсекелестік қабілетін қамтамасыз ету бағытында өз іс-қызметтерін нақты үйлестіре алмай, тиісті деңгейде бастамалар көтере алмай отыр, деп хабарлайды Kazakhstan Today тілшісі.
"Экономика және әлеуметтік салада біз қол жеткізген табыстардың бәрі мемлекет басшысы жүзеге асырған ғаламдық өзгерістердің жемісі. Экономикадағы көптеген оңды құбылыстар қазір аталмыш реформаларға арқау болған оңды энергияның арқасында инерциялы іске асуда. Ал талдау көрсеткендей, үкімет, мемлекеттік мекемелер мен әкімшіліктер еліміздің бәсекелестік қабілетін қамтамасыз ету бағытында өз іс-қызметтерін нақты үйлестіре алмай, тиісті деңгейде бастамалар көтере алмай отыр",- деді А.Мусин үкіметтің отырысында.
Оның пікірінше, егер үкімет осы ұстанымнан ауытқымайтын болса, онда "елімізде күрделі әрі жүйелі қателіктерден қашып құтыла алмай қалу қаупі бар".
"Экономика бұрынғыдай шығынды әрі шикізаттық бағытта қалып отыр, оны әртараптандыру процесстері айтарлықтай жылдам емес, макроэкономика саласында бірқатар беймаза факторлар байқалуда", деді вице-премьер. "Кейінгі екі жылда өсім негізінен ішкі рынокқа жұмыс істейтін салалардың есебінен қалыптасты. Бірінші кезекте бұл құрылыс және қаржылық қызметтер",- деді А.Мусин.
Ол кейінгі екі жылда өнеркәсіптегі нақты өсімнің орташа көрсеткіші 5,9%, осы мерзімде экспорттың табиғи көрсеткіші небәрі 2,8%-ке өскенін атап өтті. Вице-премьер кері факторлар ретінде құрылыс және қаржылық қызметтер секторындағы өсім динамикасының 40%-ті құрауын, соның нәтижесінде аталмыш екі сала экономикалық өсімнің 50%-ін қамтамасыз етіп отырғанын атады. "Бұл аса күрделі ауытқушылық және ол айрықша күрделі кері нұқсандарға алып келе алады",- деді вице-премьер.
"Елімізді индустриялық-инновациялық дамыту стратегиясын жүзеге асыру нәтижелері де біздің көңілімізді көншітпейді",- деді ол. Осыған байланысты А.Мусин өңдеу өнеркәсібіндегі өсім қарқыны былтыр стратегияда айқындалған 8-8,4%-тің орнына бар-жоғы 7,3%-ті құрағанын еске салды.
"Іс жүзінде экономикалық өсімнің алтын діңгегі бола алатындай жарып шықпа жобалар мүлдем жүзеге асырылмай отыр", деді ол.
Сонымен бірге вице-премьердің бағалауынша, экспорттың құрылымында мұнай мен металл саудасы дендейді, ал шикізатқа жатпайтын тауарлардың үлес салмағы бар-жоғы 6-7%-тен аспайды. "Өңдеу өнеркәсібі мен ауылшаруашылығының үлесі өспей, жыл өткен сайын тиісінше 10% және 2% деңгейінде қалып отыр" ,- деді вице-премьер.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Вице-премьердің пайымдауынша, еліміздің бәсекелестік қабілетін қамтамасыз ету бағытындағы мемлекеттік мекемелердің іс-қызметі нақты үйлестірілмеген
тақырып бойынша жаңалықтар
ҚР Энергетика министрлігі шетелдік азаматтар үшін бензин мен дизель отынының бағасын өзгертеді
ҚР Энергетика министрлігі шетелдік азаматтар үшін бензин мен дизель отынының бағасы өзгерген бұйрықтың жобасын жариялады, деп хабарлайды министрліктің баспасөз қызметінен.
Ішкі нарықта отын балансын сақтау, сондай-ақ мұнай өнімдерінің ағындары мен "сұр" экспортының тәуекелдерін азайту мақсатында ҚР Энергетика министрлігі автокөліктің тұтыну көлемі мен шығу тегіне байланысты Аи-92, Аи-93 бензині мен дизель отынына нақтыланған бағалары бар бұйрық жобасын дайындады.
Қазіргі уақытта бағаны мемлекеттік реттеуге байланысты Қазақстан Еуразиялық экономикалық одақ елдері арасында жанар-жағармай құны ең төмен ел болып табылады, бұл мұнай өнімдерінің басқа елдерге ағындары мен "сұр" экспортының жоғары тәуекелдеріне әкеледі.
Бұйрық жобасымен АИ-92 және Аи-93 маркалы бензиннің бағасы литріне 245 теңге деңгейінде белгіленеді деп болжанады.
Құжатта дизель отынының бағасы литріне 315 теңгені құрайды деп болжанады.
❗️Жүргізуші куәлігі мен көлік құралын Қазақстан Республикасында тіркеу туралы куәлігі бар азаматтар үшін ЖЖМ бағасы өзгеріссіз қалады.
Бұйрықтың жобасы барлық мүдделі тараптардың талқылауы мен ұсыныстары үшін "Ашық НҚА" сайтында жарияланды.
ҚР Энергетика министрлігі қазіргі уақытта ЖЖМ қорларын өндіру, тиеу және толықтыру үздіксіз жүргізіліп жатқанын, ішкі нарықта мұнай өнімдерінің едәуір қоры бар екенін, ЖЖМ-мен қамтамасыз ету жағдайы тұрақты екенін хабарлайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан Инвестициялар портфелі 2,5 млрд доллардан асатын 60 жобаны бірлесіп іске асыруда
Сурет: akorda
Мемлекет басшысы Қасым-Жомарт Тоқаев пен Өзбекстан Президенті Шавкат Мирзиёев бейресми кездесу өткізді, деп хабарлайды Ақорданың баспасөз қызметінен.
Қасым-Жомарт Тоқаев пен Шавкат Мирзиёев Қазақстан мен Өзбекстан арасындағы стратегиялық серіктестік пен одақтастықты одан әрі нығайту мәселелерін талқылады.
Қазақстан Президенті ислам өркениеті мен сәулет өнерінің жауһары саналатын Хиуа қаласында өтіп жатқан кездесудің символдық мәні бар екеніне назар аударып, барлық бағыт бойынша табысты дамып келе жатқан екіжақты ынтымақтастыққа көңілі толатынын мәлімдеді.
Мемлекет басшысының айтуынша, екі ел үкіметтері қол жеткізілген уағдаластықтарды жүзеге асыру ісімен белсенді айналысып жатыр. Тиісті "жол карталары" жоспарлы түрде орындалып, қол қойылған келісімдер мен сауда келісімшарттары бойынша жұмыс жүргізілуде. Өзара тауар айналымының көрсеткіштері жаман емес. Өткен жылдың қорытындысы бойынша оның көлемі 4,4 миллиард долларды құрады. Өнеркәсіп, энергетика, көлік және логистика, ауыл шаруашылығы салаларында бірлескен жобалар жүзеге асырылып жатыр. Бүгінде портфелімізде инвестиция көлемі 2,5 миллиард доллардан асатын 60 бірлескен жоба бар. Оның аясында 13 мыңнан астам жұмыс орны ашылады. Халықаралық өнеркәсіп кооперациясы орталығын салу жобасы да сәтті ілгерілеп келеді.
Президент қазақ-өзбек тандемі өмірлік қажеттіліктен туғанын және бірге әрі жұмыла әрекет еткенде ғана елдеріміздің орнықты дамуын қамтамасыз етуге болатынын айтты. Осы орайда Мемлекет басшысы Қазақстан мен Өзбекстан арасындағы стратегиялық серіктестік пен одақтастықтың 2034 жылға дейінгі бағдарламасын қабылдау бастамасын қолдады.
Кездесуде президенттер өзара тауар айналымын ұлғайту, энергетика, көлік, су шаруашылығы, IT салаларындағы ынтымақтастықты дамыту сияқты экономикалық ықпалдастықтың сан алуан мәселесі жөнінде пікір алмасты.
Әңгімелесу барысында мәдени-гуманитарлық байланыстарды өркендету, сондай-ақ Қазақстан мен Өзбекстанның бірегей туристік әлеуетін пайдалану мүмкіндіктеріне айрықша мән берілді.
Сонымен қатар Қасым-Жомарт Тоқаев пен Шавкат Мирзиёев өңірлік күн тәртібін талқылап, халықаралық құрылымдар аясындағы өзара ықпалдастық мәселелерін қарастырды.
Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды.
Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат - Қытай - Қазақстан - Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бұдан бөлек, Бірлескен кәсіпорын Трансауған бағытын дамытуға жұмылдырылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.