Қарағандыда үстіне ағаштың бұтағы құлаған бес жасар бала мерт болды
Қылмыстық іс қозғалды
Қарағандыда апатты жағдайдағы ағаштың бұтағы құлап, бес жасар бала қаза тапты, деп хабарлайды Ekaraganda.kz.
Қайғылы оқиға Әлихан Бөкейхан ауданында болған. Ақпаратты полиция растады.
"Кәмелетке толмаған баланың қаза болу фактісі бойынша қылмыстық іс қозғалды. Тергеу шаралары жүргізіліп жатыр. Оқиғаның мән-жайы анықталуда", - делінген Қарағанды облысы полиция департаментінің хабарламасында.
Естеріңізге сала кетсек, өткен жылдың тамыз айында Алматыдағы Шәріпов пен Қарасай батыр көшелерінің қиылысында сынған ағаш бұтағы әйелдің өмірін қиған болатын. Биыл ақпан айында Шымкентте де үстіне ағаш құлаған оқушы қаза тапқан болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Семейде 13 жасар оқушы 15 жерінен пышақ жарақатын алды
Семей полициясы №52 мектептің 13 жастағы екі оқушысының арасында кикілжің туындап, кәмелетке толмағандардың бірі көптеген пышақ жарақатымен жансақтау бөліміне түсті, деп хабарлайды КТК телеарнасы.
Оқиға білім беру мекемесінен тыс жерде болған оқиғадан кейін екі жасөспірім де ауруханаға жеткізілді. Жарақат алған бала өздігінен көршілеріне дейін барып, көмек сұрай алған. Осыдан кейін ол шұғыл түрде ауруханаға жатқызылды.
Дәрігерлер жасөспірімге жасаған ота төрт сағатқа созылған. Баланың құрсақ қуысы мен бүйрегі зақымданып, денесі мен аяқ-қолынан көптеген жарақат алған. Үш күн жансақтау бөлімінде жатқаннан кейін оның жағдайы орташа ауыр деп бағалануда. Оқиғаға қатысқан екінші жасөспірімнің жаралары өңделіп, үйіне жіберілді.
Мектеп әкімшілігі жасөспірімдердің бір сыныпта оқитынын, достық қарым-қатынаста болғанын және бұған дейін есепте тұрмағанын хабарлады.
Семей қаласының Полиция басқармасы дене жарақатын салу фактісі бойынша сотқа дейінгі тергеу жүргізіліп жатқанын растады. Тергеушілер болған оқиғаның барлық мән-жайын анықтап жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада 15-қабаттан құлаған әйел бала отырған арбаның үстіне түсіп, екеуі де қаза тапты
Астанада тұрғын үйдің маңында болған қайғылы оқиға салдарынан 27 жастағы әйел мен екі жасар бала қаза тапты.
"Алдын ала мәлімет бойынша, 27 жастағы әйел тұрғын үйдің 15-қабатындағы терезеден секіріп кеткен. Салдарынан әйел о0и5а орнында көз жұмды. Ол құлаған кезде екі жасар бала отырған балалар арбасына түскен. Алған жарақаттары салдарынан бала да қайтыс болды", - деп хабарлайды Астана қаласы полиция департаментінен.
Аталған факті бойынша қылмыстық іс қозғалды. Қазіргі уақытта тексеру жүргізіліп, оқиғаның барлық мән-жайы анықталып жатыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қызылордадағы мұнай зауытында шыққан өрттен кейін ауа сапасы тексерілді
Сурет: Бейнежазбадан скриншот
Қызылордадағы Kyzylorda Refinery мұнай өңдеу зауытында болған өрттен кейін ауа сапасы тексерілді. Белгіленген нормативтерден асу деректері анықталған жоқ, деп хабарлады өңірлік Экология департаменті.
Кәсіпорын аумағында жалпы көлемі 120 тонна мұнай өнімі болған екі резервуар өртенді.
Өрттен кейін зертханалық-талдамалық бақылау мамандары кәсіпорынның санитарлық-қорғау аймағынан ауа сынамаларын алды.
"Жел болмағандықтан, түтін негізінен тік бағытта тарады, бұл ластаушы заттардың атмосфераның жоғарғы қабаттарында сейілуіне ықпал етті. Жүргізілген мониторинг нәтижесінде атмосфералық ауа сапасының белгіленген нормативтерінен асу деректері анықталған жоқ", - делінген хабарламада.
Өрт сөндірушілер жалынның таралуына жол бермей, жақын орналасқан үш резервуарды сақтап қалды.
200 шаршы метр аумақты қамтыған өрт толық сөндірілді. Өрттің шығу себебі анықталып жатыр.
Төтенше жағдайлар департаментінің мәліметінше, өрт Шоқай көшесіндегі шағын тоннажды мұнай өңдеу зауыттарының бірінің аумағында болған. Әрқайсысының сыйымдылығы 60 тонна болатын екі резервуар өртенді. Оларда жалпы көлемі 120 тонна мұнай өнімі болған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астана әуежайы маңында тоқ кернеуінің ауытқуынан ұялы байланыста ақаулар орын алды
Астана әуежайы маңында тоқ кернеуінің ауытқуына байланысты ұялы байланыс пен интернет жұмысында ақаулар орын алды, деп хабарлайды әуежайдың баспасөз қызметінен.
"Әуежайдың барлық негізгі жүйесі штаттық режимде жұмыс істеп тұр. Бейнебақылау камералары мен навигациялық құралдар іркіліссіз жұмыс істеп жатыр. Ұшып келетін және ұшып шығатын рейстер кестеге сәйкес орындалуда", - деп мәлім етті әуежай өкілдері.
Естеріңізге сала кетсек, тамыз айында Қазақстанның электр желілерін басқару жөніндегі ұлттық операторы KEGOC электр беру желілерінің апаттық ажыратылуына байланысты Алматы мен Алматы облысының бірнеше ауданындағы тұрғындар жарықсыз қалды. Электр энергиясының өшуі салдарынан Алматыда көлік кептелістері пайда болды.
Кейін Қазақстанның Энергетика министрлігі Алматыда, Алматы облысында және еліміздің басқа да өңірлерінде электр энергиясының жаппай өшу себебін түсіндірді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Щучинскідегі дәмханада болған жарылысқа қатысты айыпталған үш азаматқа қатысты сот үкімі шықты
Сурет: Depositphotos
Бурабай аудандық соты Щучинск қаласындағы "Центр плова Loft" дәмханасында болған жарылысқа қатысты іс бойынша үш адамды бас бостандығынан айыру жазасын тағайындады. Жарылыс салдарынан 12 адам қаза тауып, тағы 11 адам зардап шекті, деп хабарлайды соттың баспасөз қызметінен.
Атап айтқанда, дәмхана басшысы мен ЖШС директоры жеті жылға, ал газ баллондарын жеткізуші алты жылға бас бостандығынан айырылды.
Сондай-ақ, 16 жәбірленушінің моральдық зиянды өтеу туралы азаматтық талаптары ішінара қанағаттандырылды.
"Сот облыс әкіміне жеке қаулы шығарып, онда қылмыстық істі қарау барысында қоғамдық тамақтандыру объектілерінің өрт қауіпсіздігін қамтамасыз ету бойынша профилактикалық жұмысты ұйымдастыруда және ведомствоаралық өзара іс-қимылда анықталған кемшіліктер туралы хабарлады. Қаулыда туындаған зардаптарға ықпал еткен себептер мен жағдайларды жою бойынша шаралар қабылдау қажеттігі көрсетілді", - деп жазылған хабарламада.
Естеріңізге сала кетсек, ағымдағы жылдың 26 ақпанында газ баллонының жарылып, арты өртке ұласқан болатын. Салдарынан 12 адам қаза тауып, тағы 11 адам әртүрлі дене жарақатын алып, ғимарат иесіне аса ірі мөлшерде материалдық залал келтірілген.
Бұған дейін Қазақстанда қоғамдық тамақтану орындары газ баллондарын сақтау талаптарының сақталуына қатысты тексерілетіні хабарланған болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда 16 қабатты тұрғын үйден шыққан өрт салдарынан 100-ге жуық адам эвакуацияланды
Сурет: Бейнежазбадан скриншот
Алматыда паркингте шыққан өрт салдарынан 16 қабатты тұрғын үйден 100-ге жуық адам, оның ішінде 19 бала эвакуацияланды, деп хабарлайды ҚР Төтенше жағдайлар министрлігінен.
Өрт Бостандық ауданындағы Абай даңғылында болды. Паркингте күштік кабель өртенген. Өрт аумағы 5 шаршы метрді құрады.
"Хабарлама түскеннен кейін 5 минут ішінде алғашқы өрт сөндіру бөлімшелері оқиға орнына жетті. Құтқарушылар баспалдақ арқылы 100 жуық адамды, оның ішінде 19 баланы қауіпсіз жерге эвакуациялады",- деп жазады ТЖМ.
Өрт жедел сөндірілді. Зардап шеккендер жоқ.
Естеріңізге сала кетсек, тамыз айының соңында Алматыдағы Әди Шәріпов көшесінде орналасқан 13 қабатты тұрғын үй кешенінде болған өрт салдарынан бір әйел қаза тауып, 148 адам құтқарылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.