Бакуде АӨСШК аға лауазымды тұлғалар комитетінің кезекті отырысы өтеді
Астана. 9 наурыз. Kazakhstan Today - Баку қаласында 12 наурызда Қазақстан Сыртқы істер министрінің орынбасары Нұрлан Ермекбаевтың төрағалығымен Азиядағы өзара іс-қимыл және сенім шаралары жөніндегі кеңестің (қысқашасы - АӨСШК немесе Азия кеңесі) аға лауазымды тұлғалар комитетінің кезекті отырысы өтеді. Бұл туралы бүгін журналистерге арнап өткізілген қысқаша баспасөз мәслихатында ҚР СІМ-нің ресми өкілі Асқар Ибдірахманов құлағдар етті,- деп хабарлайды Kazakhstan Today.
Бас қосудың күн тәртібіндегі негізгі мәселе - өткізілуі биыл 7-9 маусымда Ыстамбұлда жоспарланған Азия кеңесі елдерінің мемлекет және үкімет басшыларының үшінші саммитін дайындық барысы.
Сондай-ақ, Азия кеңесінің Артықшылықтар мен иммунитеттер жөніндегі Конвенцияның жобасын талқылау, 3-ші саммиттің саяси декларациясының жобасы мен Түркияның кеңеске 2010-2012 жылдары төрағалық ету тұжырымдамасын мүше мемлекеттердің назарына ұсыну сияқты іс-шараларды өткізу жоспарланған.
АӨСШК қатарына келесі мүше-мемлекеттер кіреді: Ауғанстан, Изербайжан, Египет, Үндістан, Иран, Израиль, Иордания, Қазақстан, ҚХР, Корея Республикасы, Қырғызстан, Монғолия, Пәкістан, Палестина, Ресей, Тәжікстан, Таиланд, Түркия, БАИ, Өзбекстан.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.