БҰҰ-ның жаңа бас хатшысы ұйымды реформалауды одан әрі жалғастыруға уәде берді
АЛМАТЫ. 16-қазан. Kazakhstan Today. Жұма күні БҰҰ Бас хатшылығына тағайындалған Оңтүстік Кореяның сыртқы істер және сауда министрі Пан Ги Мун бұған дейін қолға алынған ұйымды реформалау бағытын одан әрі жалғастыратынын атап өтті, деп хабарлайды Kazakhstan Today тілшісі.
"Біз осы ұйымның болашағына деген сенімді нығайта түсу үшін оны жаңалауды одан әрі жалғастыруымыз қажет",- деді жаңа бас хатшы. Оның айтуынша, БҰҰ-ның басты мақсаты - бейбітшілікті сақтау мен адам құқығын қорғай дамытуға саяды.
Жұма күні БҰҰ Бас Ассамблеясы Қауіпсіздік Кеңесінің ұсынысы бойынша дауыс берусіз Пан Ги Мунды БҰҰ-ның жаңа бас хатшылығына тағайындаған еді. Пан Ги Мун ұйымды 2007 жылдың қаңтар айынан 2012 жылдың желтоқсанына дейін басқарады. Пан Ги Мунның ант беру рәсімі желтоқсан айында өтеді. 62 жастағы корей азаматы БҰҰ-ның 8-ші бас хатшысы болмақ.
БҰҰ-ның қазіргі Бас хатшысы Кофи Аннан өзінің ізбасары Пан Ги Мунды осы қызметке тағайындалуымен құттықтады. Па Ги Мунның "мол тәжірибесін" атап көрсеткен К.Аннан, болашақ бас хатшылықтың ертерек сайлануы өкілеттіктің асықпай, байсалды берілуін қамтамасыз етеді, деді. К.Аннаның өкілеттілік мерзімі 2006-жылдың 31-желтоқсанында аяқталады.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.