Ертең Бішкекте қырғыз-қазақ бизнес-форумы өтеді
Бішкек. 26-наурыз. Kazakhstan Today - Ертең, 27 наурызда, Бішкекте қырғыз-қазақ бизнес-форумы өтеді, деп хабарлайды Kazakhstan Today агенттігінің тілшісі.
Бұл туралы BNews.kz ақпараттық агенттігі Қырғыз Республикасы Сауда-өнеркәсіп палатасының баспасөз қызметіне сілтеме жасай отырып хабарлайды.
Бизнес-форум ұйымдастыруды Қырғызстан нарығын тартымды әрі тиімді деп қарастыратын сараптамаға негізделген қазақстандық кәсіпорындар ұсынған болатын.
Бішкектегі бизнес-форумға қатысу үшін қазақстандық делегеция құрамына машина құрастыру, құрылыс, фармацевтика, тамақ, жеңіл өнеркәсіппен айналысатын кәсіпорындардың 24 өкілі енді. Қырғыз тарапынан шараға 70-тен астам отандық компания мен Қазақстаннан келген әріптестерімен серіктестік орнатуға мүдделі бизнес-қауымдастық өкілдері қатыспақ.
Сонымен қатар бизнес-форумға Қырғызстан нарығына өнім әкелу, экспорттық келісімшарт жасасу бойынша кәсіпкерлерге кеңес беру үшін Қырғызстанның мемлекеттік орган қызметкерлері де шақыртылып отыр.
Екінші рет ұйымдастырылып отырған бизнес-форум барысында екі ел кәсіпкерлері қазіргі байланысын нығайтып, жаңа серіктестер табады, сондай-ақ өз компанияларының өнімдерін таныстыруға мүмкіндік алып, қырғыз-қазақ бірлескен кәсіпорындарын құру мүмкіндіктерін қарастырады деп күтілуде.
Екіжақты келіссөздер барысында Қырғызстан мен Қазақстан арасындағы тамақ өнеркәсібі, құрылыс, химия өнеркәсібі, фармацевтика, энергетика мен басқа да салалар бойынша сауда-экономикалық айналымына қатысты мәселлерді шешуге мүмкіндік беретін экспорттық келісімдерге қол қойылады деп жоспарлануда.
Іс-шараны Қырғыз Сауда-өнеркәсіп палатасы мен Қазақстан Индустрия және жаңа технологиялар министрлігі "Kaznex Invest" ұлттық экспорт және инвестиция агенттігі" АҚ бірлесіп ұйымдастырып отыр.
Естеріңізге сала кетейік, 2012 жылы Бішкекте өткен бизнес-форум барысында 3 млн доллардан астам қаражатқа экспорттық келісімшарттар бекітілген болатын.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.