Францияның премьер-министрі Қазақстанға ресми сапармен келеді
Францияның премьер-министрі Қазақстанға ресми сапармен келеді
Астана. 4-ақпан. "Қазақстан Бүгін" - Францияның премьер-министрі Франсуа Фийон 8-ақпанда Қазақстанға ресми сапармен келеді. Бұл туралы бүгін өткен брифингте Қазақстан Республикасы Сыртқы істер министрлігінің ресми өкілі Ержан Ашықбаев мәлім етті, деп хабарлайды "Қазақстан Бүгін" агенттігінің тілшісі.
Ержан Ашықбаевтың айтуынша, "алдағы сапар Қазақстан мен Францияның қатынастар тарихындағы француз үкімет басшысының біздің елімізге алғаш келуі болмақ". Ол сапар "ҚР президенті Нұрсұлтан Назарбаевтың өткен жылдың 25-қыркүйегіндегі БҰҰ Бас Ассамблеясының сессиясы аясында өз әріптесі Николя Саркозимен Нью-Йоркте кездесуі барысында қол жеткізілген келісімге сәйкес ұйымдастырылып отыр",- деп атап өтті.
Франция премьері сапары аясында ҚР президентімен және Қазақстан үкіметінің басшысымен кездеседі деп күтілуде. Бірқатар екіжақты құжаттарға қол қойылып, Франция Республикасының Астанадағы елшілігінің ашылу салтанаты мен Францияның республикалық гвардиясының концерті өтеді деп жоспарланған.
Сонымен қатар, СІМ өкілінің хабарлауынша, француз үкіметінің басшысы ҚР президентінің жанындағы Мемлекеттік басқару академиясының оқытушы- профессорлары құрамының алдында дәріс оқиды. "Францияның саяси ортасы Қазақстандағы демократияландыру процессіне, біздің мемлекетіміздің дамуының эволюциялық сипатына және еуропалық институттармен араласуға бағытталған қадамына түсіністікпен қарайды",- деп атап көрсетті Е. Ашықбаев.
"Франция Қазақстан үшін маңыздылығы бойынша бесінші сауда серіктесі болып табылады. Франция президенті Қазақстанның елбасымен Нью-Йорктегі кездесуі кезінде өзара тауар айналымын екі есеге өсіру мүмкіндігінің бар екендігін атап көрсеткен болатын",- деп еске сала кетті Е. Ашықбаев.
2007 жылдың қорытындысы бойынша Қазақстан мен Франция арасындағы сауда көлемі 4 млрд АҚШ долларынан асып түскен. Өткен жылдың 30-қарашасындағы жағдаймен Қазақстанның экономикасына салған француз инвестициясы 3,7 млрд АҚШ долларына жеткен.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.