АЛМАТЫ. 19 - сәуір. Kazakhstan Today. Ядролық материалдармен жұмыс істеуде екі жүзділік немесе екіұштылық болмауға тиіс. Бұл туралы бүгін Алматыдағы VI Еуразиялық медиа-форум барысында Қазақстан Республикасының парламенті сенатының төрағасы Қасым-Жомарт Тоқаев мәлім етті, деп хабарлайды Kazakhstan Today агенттігінің тілшісі.
"Ядролық материалдармен қалай жұмыс істеу қажеттігі тұрғысында қандай да бір екі жүзділік немесе екіұштылық болмауға тиіс. Яғни, ядролық материалдарды экспорттауға тиімді әрі ықпалды бақылау жасалуы қажет",- деді Қ. Тоқаев. "Бейбіт мақсатта өзіндік ядролық бағдарлама дайындамақ болған барлық елдер тиісті халықаралық институттар алдында, Атом энергиясы жөніндегі халықаралық агенттіктің алдында есеп беруге , инспекторлармен ынтымақтаса отырып, өздерінің жоспарларын, бағдарламаларын көрсетуге тиіс",- деп атап өтті ол.
"Бұл Қазақстанға да қатысты. Біз жақын арада осында, Қазақстан аумағында атом электр станциясы салынатындығын айтудамыз, және де біз осы саладағы ынтымақтастыққа дайынбыз",- деп атап көрсетті Қ. Тоқаев. "Біз өздерінің ядролық бағдарламасына қатысты ойынға көшкен елдердің қандай тауқыметтерге тап келіп оытрғанын көріп отырмыз, бұл тұрғыда Қазақстан принциптік көзқарастан ауытқымайды, яғни, Ядролық қаруды таратпау туралы келісімді сақтау керек. Дегенмен осы келісімнің мазмұнына қатысты елеулі ескертулеріміз бар",- деп қосты ол.
"Ядролық қарудан бас тартуға қатысты бізде ешқандай да өкініш жоқ. Бұл біздің берік ұстанымымыз және біз Қазақстанның ядролық қару мен тиісті материалдарды таратпауға өзіндік оң үлесін қосып отырғандығын мақтан тұтамыз",- деп қайталады Қ. Тоқаев.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Ядролық материалдармен жұмыс істеуде екі жүзділік немесе екіұштылық болмауға тиіс - Тоқаев
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.