Қазақстан БҰҰ-ның Адам құқықтары жөніндегі кеңесінің мүшесі атанды
Қазақстанның кандидатурасын жақтап 183 мемлекет дауыс берді. Бұл сайлауда БҰҰ АҚК-ге барлығы 18 жаңа мүше-мемлекет сайланды.
Нью-Йорк. 13-қараша. Kazakhstan Today - Дүйсенбі, 12 қарашада Нью-Йорктегі БҰҰ Бас Ассамблеясының 67-ші сессиясы аясында БҰҰ-ның Адам құқықтары жөніндегі кеңесінің сайлауы өтіп, Қазақстан Республикасы алғаш рет Кеңестің мүшесі болып сайланды, деп хабарлайды Kazakhstan Today агенттігінің тілшісі.
Бұл туралы ҚР СІМ баспасөз қызметінен хабарлады.
Қазақстанның кандидатурасын жақтап 183 мемлекет дауыс берді. Бұл сайлауда БҰҰ АҚК-ге барлығы 18 жаңа мүше-мемлекет сайланды.
БҰҰ АҚК 2006 жылдың 15 наурызында құрылды және Адам құқықтары жөніндегі комиссияны алмастыра отырып, адам құқықтарын қорғау саласындағы жетекші халықаралық орган болып табылады. Кеңестің құрамына 47 мемлекет кіреді. Кеңеске мүше болуға БҰҰ-ның барлық мүше-мемлекеттері құқылы, оған тікелей және жасырын дауыс беру жолымен БҰҰ БА мүшелерінің басым дауысын жинаған ел үш жылға сайлана алады.
Қазақстан Адам құқықтары жөніндегі кеңестің жұмысына белсенді араласып, жеке тұлға құқығы мен еркіндігін қорғаушы және жүзеге асыратын құқық қорғау тетіктерімен ынтымақтаса жұмыс істеуде. Қазақстанның сыртқы істер министрі АҚК сессиясының жоғары деңгейлі сегментіне жыл сайын қатысып отырады.
2010 жылдың ақпанында Қазақстан БҰҰ АҚК-ның жаңа құқық қорғау тетігі - Имбебап кезеңдік шолу аясында тұңғыш ұлттық баяндамасын жасап, оны сәтті қорғап шықты.
БҰҰ-ның ірі құқық қорғау құрылымына біздің еліміздің сайлануы адамның әмбебап құқықтары мен еркіндіктерін бірізді нығайту мен қорғау мәселесінде Қазақстанның ілгерілеуін мойындау, сонымен қатар осы салада оның белсенді халықаралық ынтымақтастықты қатаң ұстанатындығының жарқын дәлелі болып табылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.