АСТАНА. 31-шілде. Kazakhstan Today. Қазақстан БҰҰ-ның Қауіпсіздік кеңесін Ливандағы ахуалдың шиеленісе түсуіне қатысты біріккен резолюция қабылдауға шақырады. Бұл жөнінде ҚР СІМ-нің өкілі Астанада өткен қысқаша баспасөз мәслихатында мәлімдеме жасады, деп хабарлайды Kazakhstan Today тілшісі.
"Қазақстан өзара бітімге келе алмай отырған жақтарды тез арада атысты тоқтатуға шақыра отырып, БҰҰ-ның Қауіпсіздік кеңесі Ливандағы ахуалға қатысты біріккен резолюция қабылдауға тиіс деп санайды",- деді бүгін өткен баспасөз мәслихатында ҚР СІМ-нің баспасөз хатшысы Ілияс Омаров.
"Қазақстан Ливан үкіметі мен халқына Израиль қарулы күштерінің Кафр-Кана елдімекеніне әуеден соққы беруі салдарынан бейбіт тұрғындардың өлім құшуына байланысты көңіл айтады",- деді СІМ өкілі.
"Біз шиеленістің одан әрі ушыға түсуі салдарынан Ливан, Палестина және Израиль елдерінің бейбіт тұрғындарының тақсірет тартуына айрықша өкініш білдіреміз. Қазақстанның пайымдауынша, әскери әрекеттер бейбіт тұрғындардың құрбан болуы мен әлеуметтік инфрақұрылымның қирауына, сондай-ақ, гуманитарлық дағдарысқа душар етуге тиіс емес",- деді І.Омаров.
"Израиль тарапынан әуе шабуылдарын 48 сағатқа тоқтату жөніндегі шешім қабылдау аймақтағы қақтығысты доғаруға жасалған алғашқы қадам болуға тиіс",- деді СІМ өкілі.
Қазақстан БҰҰ-ның Қауіпсіздік кеңесін Ливандағы ахуалға қатысты біріккен резолюция қабылдауға шақырады - ҚР СІМ
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.