Қазақстан президенті БҰҰ Бас ассамблеясының Нью-Йоркте өтетін жыл сайынғы сессиясына қатысады
Қазақстан президенті Нұрсұлтан Назарбаев БҰҰ Бас ассамблеясының Нью-Йоркте қыркүйекте өтетін жыл сайынғы сессиясына қатысады. Алдағы сапарды ұйымдастыру мәселелері бүгін Астанада мемлекеттік хатшы Қанат Саудабаевтың БҰҰ резидент-үйлестірушісі, БҰҰ Даму бағдарламасының Қазақстандағы тұрақты өкілі Шу Хаолянмен кездесуінде талқыланды.
"ҚАЗАҚСТАН БҮГІН". 27 тамыз. АСТАНА. Қазақстан президенті Нұрсұлтан Назарбаев БҰҰ Бас ассамблеясының Нью-Йоркте қыркүйекте өтетін жыл сайынғы сессиясына қатысады. Алдағы сапарды ұйымдастыру мәселелері бүгін Астанада мемлекеттік хатшы Қанат Саудабаевтың БҰҰ резидент-үйлестірушісі, БҰҰ Даму бағдарламасының Қазақстандағы тұрақты өкілі Шу Хаолянмен кездесуінде талқыланды.
Мемлекет басшысының баспасөз қызметінің хабарлауынша, бүгін өткен кездесу барысында Қ. Саудабаев Қазақстанның "өзекті халықаралық проблемаларды шешуде Біріккен Ұлттар Ұйымының беделі мен ролінің барынша нығая түскенін қолдайтынын" атап өтті.
"БҰҰ басқа бірде-бір халықаралық ұйым немесе бір де мемлекет алмастыра алмайтын бірегей әмбебап ұйым. Президент Нұрсұлтан Назарбаев алға қойған стратегиялық бағдарға сәйкес еліміз Орталық Азиядағы жауапты аймақтық көшбасшы ел ретінде алдағы уақытта да ғаламдық қауіпсіздікті нығайтуға, адамзаттың тұрақты дамуын қамтамасыз етуге және осы салалардағы БҰҰ ролінің артуына үлес қоса бермек ниетте", - деп мәлімдеді Қ. Саудабаев.
Кездесу барысында донор елдердің ядролық сынақтардан зардап шеккен Семей өңірін сауықтыруға мейлінше тиімдірек атсалысуы қажеттігіне баса назар аударылды.
Бұған қоса Қазақстан мен БҰҰ Даму бағдарламасы арасындағы ынтымақтастық аясын кеңейтудің келешегі талқыланды. "Қазақстанның жаңаша даму кезеңінде БҰҰ Даму бағдарламасының іс-қызметі біздің мемлекетіміздің әлемдегі барынша дамыған әрі бәсекеге қабілетті елдерінің қатарына қосылу бағдарламасындағы басты басымдықтармен мейлінше тығыз байланысты болуға тиіс", - деп мәлімдеді ҚР мемлекеттік хатшысы.
Баспасөз қызметінің еске салып өткеніндей, ағымдағы жылы Қазақстан өзінің БҰҰ-ына мүшелікке өтуінің 15 жылдығын атап өтеді. Осы уақытта республика ұйымның Мыңжылдық даму мақсаттарына жету мен бейбітшілікті нығайтуға өзіндік үлесін қосқан бірқатар ірі халықаралық форумына қатысты. Қазақстанда транзит және транспорт мәселелері жөніндегі БҰҰ-ның халықаралық конференциясы өтіп Алматы іс-шаралар жоспары қабылданып, Қауіпсіздік кеңесінің контртеррорлық комитетінің отырысы мен БҰҰ-ның Азия және Тынық мұхиты аймағының елдері жөніндегі экономикалық комиссиясының (ЭСКАТО) 63-ші сессиясы өтті.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.