Қырғыз Республикасының Сыртқы істер министрі Қадырбек Сарбаев Қазақстанға ресми сапармен келеді
Қырғыз Республикасының Сыртқы істер министрі Қадырбек Сарбаев Қазақстанға ресми сапармен келеді
Астана. 27 сәуір. "Қазақстан Бүгін" - Қырғыз Республикасының Сыртқы істер министрі Қадырбек Сарбаев 29-30-сәуірде Қазақстанға ресми сапар жасайды. Бұл туралы бүгін Астанадағы апталық брифингте ҚР Сыртқы істер министрлігінің ресми өкілі Ержан Ашықбаев мәлім етті, деп хабарлайды "Қазақстан Бүгін" агенттігі.
Оның айтуынша, сапар барысында Қ. Сарбаев еліміздің ресми тұлғаларымен кездесулер өткізеді.
"Сапар кезінде екі мемлекет арасында 2003 жылы желтоқсанның 25-де қол қойылған Одақтастық қарым-қатынас жөніндегі шартқа сәйкес құрылған Қазақстан және Қырғызстан Сыртқы істер министрлері кеңесінің үшінші отырысын өткізу жоспарланып отыр. Онда сауда-экономикалық, су-энергетикалық және мәдени-гуманитарлық салалардағы екі жақты ынтымақтастықтың көкейкесті мәселелері талқыланады. Сонымен бірге жақын уақытта өтетін қазақ-қырғыз үкіметаралық кеңесінің бірінші отырысының күн тәртібінің жобасы бекітілуі мүмкін", - деді Е. Ашықбаев.
Ақпаратты пайдаланған жағдайда "Казахстан Сегодня" ақпараттық агенттігіне гиперсілтеме жасау міндетті. «Қазақстан Бүгін» Ақпараттық агенттігінің материалдарына авторлық құқық.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.