АСТАНА. 20-ақпан. Kazakhstan Today. ҚР СІМ үкіметаралық комиссиялардың жұмыс тиімділігін бағалау тәжірибесін енгізбекші. Бұл туралы ҚР СІМ Марат Тәжин бүгін үкіметтің отырысы барысында мәлімдеді, деп хабарлайды Kazakhstan Today тілшісі.
"...Үкіметаралық комиссия деп аталатын екі жақты ықпалдастық тетігінің тиімділігі мен қайтарымын көтеру мәселесі күн тәртібінде тұр. Олардың кейбіреуі мүлдем жұмыс істемейді дегенді ашық айту керек",- деді М.Тәжин. Осыған байланысты СІМ "әрбір органның жұмысын бағалау мен тиісті ақпаратты ел басшылығы- мемлекет басшысы мен үкімет басшысының назарына жеткізіп отыру" тәжірибесін қолданысқа енгізбекші.
Республиканың сыртқы істер министрлігі сонымен бірге екі жақты және көп жақты халықаралық келісімдерге қол қоюға дайындау, қол қою мен оларды жүзеге асыруға қойылатын бақылауды күшейтпекші. "Өкінішке орай келісімдердің жобасын жасауға сапар қарсаңында ғана асығыс түрде кіріседі. Соның салдарынан халықаралық келісімдерге қол қоюдың белгіленген тәртіптері бұзылып, олардың нақты экономикалық, қаржылық және сыртқы саяси орындылығына үстірт талдау жасалып, оның ақыры осындай келісімдер бойынша олардың күшіне енуіне қажетті мемлекетішілік процедураларды ұзақ уақыт бойы жүргізбеуге алып келеді",- деді М.Тәжин. "Келісім-құқықтық базаны дамытуда мемлекеттің ұзақ мерзімді мүддесіне сай келетін прагматикалық көзқарас үстем болуға тиіс",- деді министр.
Сонымен бірге М.Тәжин өңіраралық байланыстарды дамыту саласында тәжірибелік қайтарымдылыққа күрделі талдау жүргізу қажет деп санайды. "Бүгінде өңіраралық байланыстар сәнге айналды, алайда, олардың тиімділігі күдік туғызады, олар бейнебір декларацияға айналып бара жатқандай",- деді министр. "Осы жұмыстарды СІМ қадағалап, үйлестіруге тиіс",- деді М.Тәжин.
Министр сонымен бірге сыртқы істер министрлігінде ел басшылығының шетелдерге сапарларының мазмұны мен оларды ұйымдастыру мәселелерін дәйектеу жөнінде үйлестіру кеңестерін өткізу тәжірибесін енгізуді ұсынды. "Тиісінше шетелдерге жұмыс бабындағы іссапарлардың қорытындысы бойынша СІМ-іне егжей-тегжейлі есеп тапсырылып, ол әріқарайғы талдауларға және біздің шетелдердегі мекемелерге берілетін тапсырмаларға арқау болуға тиіс",- деді ол. "Бұл әлемнің көптеген елдерінде қабылданған қалыпты тәжірибе, ол еліміздің қазіргі сыртқы саясатын қамтамасыз ететін заңнамалық базаға толық сай келеді",- деді министр.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
ҚР СІМ үкіметаралық комиссиялардың жұмыс тиімділігін бағалау тәжірибесін енгізбекші
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.