Мәскеуде Каспий газ құбырын салудағы ынтымақтастық туралы келісімге қол қойылды
Мәскеуде Каспий газ құбырын салудағы ынтымақтастық туралы келісімге қол қойылды
Мәскеу. 21-желтоқсан. "Қазақстан Бүгін" - Бейсенбі күні Мәскеуде Ресей, Қазақстан мен Түркіменстанның Каспий газ құбырын салудағы ынтымақтастық туралы үш жақты құжатқа қол қойылды, деп хабарлайды "Қазақстан Бүгін" агенттігінің тілшісі.
Құжатқа Ресей президенті Владимир Путин мен Қазақстан президенті Нұрсұлтан Назарбаевтың қатысуымен қол қойылды. Қазақстан жағынан келісімге Қазақстан Республикасының индустрия және сауда министрі Ғалым Оразбақов, Ресей жағынан - Ресей Федерациясының өнеркәсіп және энергетика министрі Виктор Христенко, Түркіменстан жағынан - Түркіменстанның мемлекеттік көмірсутегі көздерін басқару және пайдалану агенттігінің атқарушы директоры Байраммұрат Мұратов қол қойды.
Қол қою рәсімінен кейін Ресей президенті Владимир Путиннің тілшілерге хабарлағанындай, газ құбыры 2010 жылдың аяғына дейін салынып бітеді және ол Каспий теңізін шығыс жағалауынан айналып өтпек. "Жаңа энергетикалық күретамырды қалыптастыру біздің серіктестерімізді ұзақ уақытқа дейін ірі көлемде газбен қамтамасыз етіп отыруға мүмкіндік береді. Нәтижесінде бұл Еуропаның энергетикалық қауіпсіздігін нығайта түседі", - деп мәлімдеді Владимир Путин.
Сонымен қатар, Ресей - Қазақстан ынтымақтастығы тақырыбында әңгіме өрбіте отырып, Владимир Путин: "ЕҚЫҰ-ға келер болсақ, Ресей Астананы халықаралық деңгейде қолдап келген және қолдай бермек", - деп атап көрсетті. Сондай-ақ ол, "көптеген халықаралық мәселелер бойынша Ресей мен Қазақстанның көзқарастары ұқсас", деген пікірде.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.