Назарбаев сайлауда 95,55 пайыз дауыс жинап, жеңіске жетті
Астана. 5 - сәуір. Kazakhstan Today - Бүгін Астанада ҚР Орталық сайлау комиссиясы сайлаудың нақты қорытындысын жариялады. 2011 жылдың 3 сәуірінде өткен Қазақстан Республикасы Президентінің кезектен тыс сайлауында Нұрсұлтан Назарбаев 95,55 пайыз дауыс жинап, жеңіске жетті, деп хабарлайды Kazakhstan Today агенттігінің тілшісі.
Нұрсұлтан Назарбаевқа сайлауға қатысқан 8 миллион 279 мың 676 сайлаушының 7 млн. 850 мың 958-і дауыс берген. Ал Мемлекет басшысының лауазымына таласқан Қазақстанның Коммунистік халықтық партиясының хатшысы Жамбыл Ахметбековке сайлаушылардың 1,36 пайызы немесе 111 мың 924 адам, "Табиғат" экологиялық одағының төрағасы Мэлс Елеусізовке 1,15 пайызы немесе 94 мың 452 адам, ал Қазақстан Патриоттары партиясының төрағасы, Сенат депутаты Ғани Қасымовқа 1,94 пайызы немесе 159 мың 036 адам дауыс берген. "3 сәуірде елімізде өткен ҚР Президентінің кезектен тыс сайлауына республикамыздағы сайлаушылардың 89, 99 пайызы қатысты", - деді ОСК төрағасы.
Елбасының сайлауда жеңіске жетуіне байланысты ҚР Орталық сайлау комиссясы бүгінгі мәжілісі барысында қазіргі Мемлекет басшысы Нұрсұлтан Назарбаевты Қазақстан Республикасының Президенті деп тану туралы қаулы қабылдады.
Айта кетейік, 3 сәуір күні Қазақстанда ҚР Президентінің кезектен тыс сайлауы өтті. Республика бойынша таңғы сағат 7.00-де барлық сайлау учаскелері ашылды, олар кешкі сағат 20.00-ге дейін жұмыс істеді.
ҚР Орталық сайлау комиссиясының мәліметінше, елімізде сайлаушылардың тізіміне 9 миллион 200 мың 299 сайлаушы енгізілген. Сайлаушылар республикадағы 9 мың 725 сайлау учаскелерінде дауыс берді. Сонымен қатар тысқары жерлердегі еліміздің азаматтары Қазақстанның шет мемлекеттердегі дипломатиялық өкілдіктерінің жанынан құрылған сайлау учаскелеріне барып, өз таңдауларын жасады. ҚР Президентінің кезектен тыс сайлауын 1059 шетелдік және халықаралық ұйымдардың байқаушылары мен Сыртқы істер министрлігінде тіркелген 200-ден астам бұқаралық ақпарат құралдарының өкілдері бақылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.