Ресей ҰҚШҰ шеңберіндегі одақтастарын ядролық қару қолдана отырып болса да, қорғауға дайын - Бордюжа (толықтырылған)

Алматы. 26 ақпан. Kazakhstan Today - Ресей Ұжымдық қауіпсіздік шарты ұйымының шеңберіндегі одақтастарын ядролық қару қолдана отырып болса да, қорғауға дайын. Бұл туралы ҰҚШҰ бас хатшысы Николай Бордюжа "Россия 24" телеарнасына берген сұхбатында мәлімдеді, деп хабарлайды Kazakhstan Today "Вести.Ru"-ға сілтеме жасап.

"РФ-ның жаңа әскери доктринасы өте қызғылықты, және ең бастысы, ол - заманауи. Мен үшін аса маңыздысы сол, бұл доктринада Ресейдің ҰҚШҰ бойынша одақтас ретіндегі міндеттемелері өте айқын көрсетілген. Онда осы тектес құжаттарда бұған дейін болмаған бірнеше принциптік ережелер бар. Онда Ресей Федерациясы өз одақтастарына қатысты ядролық шатырын (зонтик) ашады деп айқын көрсетілген, соның ішінде ядролық қару қолдана отырып қорғай алады", - деді Н. Бордюжа.

Сондай-ақ, оның айтуынша, жаңа доктринада көрсетілгендей, Ресей ҰҚШҰ аясында жасақталатын және бұрын жасақталған барлық ұжымдық күштерге контингент бөледі. Және, ең бастысы, Ресей жаңа доктринаға сәйкес, өзінің қарулы күштерін басқа одақтас мемлекеттерге осы мемлекеттердің егемендігі мен аумақтық біртұтастығын қорғау үшін бағыттай алады.

Сонымен бірге Н. Бордюжаның айтуынша, "бір жағынан Ресей өзіне міндеттемелер жүктеп ала отырып, екінші жағынан ҰҚШҰ-ына мүше басқа елдер тарапынан да оған қатысты міндеттемелерін орындауды талап етеді".

ҰҚШҰ басшысының айтуынша, бүгінде Рессей мен ҰҚШҰ-ына қатысушы елдердің алдында есірткінің таралуы, лаңкестік, діни және саяси экстремизм және заңсыз көші-қон секілді көптеген қауіп-қатерлер тұр. "Ауғанстандағы ахуалға қатысы бар қатерлер, Солтүстік Атлантикалық альянстың кеңеюіне қатысты қатерлер бар. Мәселен, біз Ресей Федерациясы мен оның одақтастарының айналасында жаңа әскери инфрақұрылымның құрылуы мен қайта жаңғыруы алаңдатады", - деді ол.

Еске сала кетейік, Ұжымдық қауіпсіздік шарты ұйымына Қазақстан, Ресей, Беларусь, Армения, Қырғызстан, Тәжікстан және Өзбекстан енеді.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.