БІШКЕК. 9-шілде. Kazakhstan Today. Қырғызстан астанасында бүгін өткен Шанхай ынтымақтастығы ұйымына мүше мемлекеттердің сыртқы істер министрлерінің кеңесінің отырысы барысында ұйымға мүше елдердің мемлекет басшыларының тамыз саммитінің күн тәртібі бекітілді. Бұл туралы отырыс қорытындысы бойынша өткен баспасөз мәслихатында Қырғызстан сыртқы істер министрі Эднан Карабаев мәлім етті, деп хабарлайды Kazakhstan Today тілшісі.
Э. Карабаевтың айтуынша, Шанхай ынтымақтастығы ұйымына мүше елдердің мемлекет басшылары қол қоятын шешуші құжат - ұзақ мерзімді тату көршілік, достық және ынтымақтастық жөніндегі келісім-шарты болмақ.
Қырғызстан СІМ-нің айтуынша, бүгінгі отырысқа қатысушылар сонымен қатар Шанхайда былтыр өткен ұйымның мерейтойлық саммитінің шешімдері мен тапсырмаларының жүзеге асырылу барысын талқылады. Министрлер Шанхай ынтымақтастығы ұйымының бас хатшысы Болат Нұрғалиевтің өткен жылға арналған есебін бекітіп, "хатшылықтың құрылымын өзгерту жалпы ұйымның тиімділігін көтеруге түрткі болғанын" атап өтті.
"Бүгінгі отырыс Шанхай ынтымақтастығы ұйымын нығайтуға және оның геосаси және геоэкономикалық әлеуетін жүзеге асыруға жасалған тағы бір қадам болды", - деді Э. Карабаев.
Оның айтуынша, министрлер Шанхай ынтымақтастығы ұйымының жанындағы бақылаушы елдермен және Ауғанстанмен әріптестікті нығайту қажеттігін атап өтті.
Шанхай ынтымақтастығы ұйымына мүше мемлекеттердің сыртқы істер министрлерінің кеңесінің отырысына Қырғызстан СІМ Эднан Карабаев, Қытай СІМ Ян Цзечи, Ресей СІМ Сергей Лавров, Тәжікстан СІМ Хамрохон Зарифи, Өзбекстан СІМ Владимир Норов, Қазақстан СІМ Марат Тажин, сондай-ақ, ШЫҰ бас хатшысы Болат Нұрғалиев қатысты.
Бұдан бұрын да хабарлағанымыздай, Шанхай ынтымақтастығы ұйымына мүше елдердің мемлекет басшыларының саммиті Бішкекте 16 -тамызда өтеді.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
Шанхай ынтымақтастығы ұйымына мүше мемлекеттердің сыртқы істер министрлерінің кеңесі тамыз саммитінің күн тәртібін бекітті
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.