ТМД өзінің барлық кемшіліктеріне қарамастан пайдалы әрі қажетті болып табылатын жұмысшы тетік - М. Тәжин
Алматы. 25 сәуір. "Қазақстан Бүгін" - ТМД өзінің барлық кемшіліктеріне қарамастан пайдалы әрі қажетті болып табылатын қолданыстағы тетік. Бүгін ҮІІ Еуразиялық медиафорум аясында "ТМД елдерінің топтық сипаттамасы. Посткеңестік кеңістіктің жетекшілері, олар - кімдер?" атты дөңгелек үстелде ҚР СІМ Марат Тәжин осындай пікір білдірді, деп хабарлайды агенттік тілшісі.
"ТМД жөнінде әсіре пессимизмге, немесе әсіре оптимизмге бой алдыруға болмайды", - деді М. Тәжин.
Оның айтуынша, мемлекет басшысы Нұрсұлтан Назарбаев тұжырымдаған Қазақстанның ұстанымы бүгінде ТМД-дан Еуропалық Одақ секілді интеграциялық құрылымға айналады деп күту қиын дегенге саяды.
"ТМД Еуропалық Одақ секілді құрылымға айналады деп күту аңқаулыққа жатар еді. Дейтұрғанмен, Қазақстан басшысы басқа елдердің жетекшілеріне дәйектей ұсынған бірқатар тақырыптар бар. Бұлар барлық елдер үшін абсолютті консенсустық сипатта", -деді министр.
Оның айтуынша, бірінші тақырып көші-қонға қатысты. ТМД аумағында түрлі есептерге сәйкес 10 - 12 млн дейін еңбек мигранттары бар, олар түрлі себептерге байланысты бір өңірден екіншісіне көшіп жүр. Барлық ТМД елдері көші-қон үрдістерін сауатты әрі өркениетті тәсілмен реттеуден мүдделі.
М. Тәжиннің айтуынша, екінші мәселе транспорттық коммуникацияларға байланысты. "Бүгінде барлық ТМД елдері үлкен Шығыс пен үлкен Батыстың арасындағы үлкен транзиттік жолда орналасып отыр. Болашақта коммуникациялық транзит осы кеңістіктің аса маңызды даму факторына айналатыны сөзсіз. ТМД кеңістігіндегі осы транспорттық -логистикалық схемалар саяси бағыт-бағдарға қарамастан, интеграциялық процесстер арқа сүйейтін күрделі іргетасқа айналады", - деді министр.
Бұған қоса министр ТМД аясындағы ғылым және білім беру салаларындағы ынтымақтастықты атады. "Саяси сипаттан тыс, таза прагматикалық есеппен ғылым және білім беру салаларындағы интеграциялық жобалармен айналысуға мүмкіндік пен сұраныс бар", -деді М. Тәжин.
Оның айтуынша, үшінші мәселе - гуманитарлық байланыстар мәселесі. Ал соңғысы - трансшекаралық қылмыспен, есірткі тасымалымен, экстремизммен және терроризммен күрес. БҰЛ ТМД аумағындағы нақты жұмыс істеп жатқан механизмдердің бірі", - деді ҚР СІМ.
Ақпаратты пайдаланған жағдайда "Казахстан Сегодня" ақпараттық агенттігіне сілтеме жасау міндетті
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.