Украина Ресей және Қазақстанмен бірлесе отырып ядролық отын шығаратын болды
Алматы. 15 - қыркүйек. Kazakhstan Today - Украина Ресей және Қазақстанмен бірлесе отырып ядролық отын шығаратын болды. Бұл туралы кеше Украинаның президенті Виктор Янукович Киевте Қазақстан Президенті Нұрсұлтан Назарбаевпен келіссөздер аяқталғаннан кейін өткізілген баспасөз мәслихатында мәлім етті, деп хабарлайды Kazakhstan Today агенттігінің тілшісі "РосБизнесКонсалтинг" сілтеме жасай отырып.
"Біз Украинаның ядролық отынды өндіру жөніндегі базаны дамытуға араласатыны туралы уағдаластық. Бұл база бірнеше жыл бойына Қазақстан мен Ресейде бірлесе даму үстінде. Украинаның осы уақытқа дейін оған еш қатысы жоқ еді", - деді В.Янукович.
Сонымен қатар, В.Янукович осы мәселеге қатысты Ресей президенті Дмитрий Медведевпен алдын ала келісім жасалғанын да тілге тиек етті. "Бүгін осы мәселеге қатысты үшжақты келісімнің бар екенін айтуға болады, енді Ресей, Қазақстан мен Украина тең дәрежеде, әрқайсысы 33 пайызға ие және әр тарап та осы жобадан өз үлесін алады", - деп мәлімдеген В.Янукович, осы бағыттағы байланыстардың үш мемлекетке де тиімді екендігін нақтылай түсті.
Президент атап өткендей, әңгіме осы жобаны жүзеге асыруға қатысты болып отыр. Соның ішінде Украина аумағында ЖЖМ үшін отын өндіретін зауыттардың бірінің құрылысы басталады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Министрлік Орталық Азия елдерінің өңірлік қауіпсіздігі мәселелері жөніндегі халықаралық конференцияға қатысты
Сурет: МИОР РК
Ташкентте "БҰҰ Жаһандық терроризмге қарсы стратегиясын іске асыру жөніндегі бірлескен іс-қимыл жоспары шеңберінде Орталық Азия елдерінің өңірлік ынтымақтастығы" тақырыбында жоғары деңгейдегі халықаралық конференция ұйымдастырылды, деп хабарлайды KAZAKHSTAN TODAY
Ағымдағы жылғы 3-4 наурызда Біріккен Ұлттар Ұйымының, сондай-ақ Орталық Азия елдерінің өкілдері өзара Терроризмге қарсы ынтымақтастықтың нәтижелерін бағалау мәселелерін талқылады.
Қазақстандық делегация құрамында АҚДМ Дін істері комитеті төрағасының орынбасары Бауыржан Бакиров қатысты.
Б.Бакиров министрліктің дін саласындағы іске асырып жатқан мемлекеттік саясаты туралы баяндама жасап, отандық заңнамамен, экстремизм мен терроризмге қарсы іс-қимыл жөніндегі мемлекеттік бағдарламалармен, сондай-ақ діни экстремизм мен терроризмнің алдын алу жөніндегі жұмыстардың негізгі бағыттарымен таныстырды.
Іс-шарада бұрын қолданыста болған бірлескен іс-қимыл жоспары шеңберіндегі 10 жылдық ынтымақтастықтың қорытындылары шығарылып, терроризмге қарсы күрес саласындағы өңірлік және халықаралық ынтымақтастық перспективаларының ағымдағы және болашақ үрдістері талқыланды.
Конференция соңында Орталық Азияда Жаһандық терроризмге қарсы стратегияны іске асыру жөніндегі бірлескен іс-қимыл жоспары ұсынылып, мақұлданды, сондай-ақ "Ташкент декларациясы" қабылданды.