Қазақстан мен Кения ғарыш саласындағы ынтымақтастықты кеңейтуде
Сурет: ҚР Сыртқы істер министрлігі
Кения Республикасының Президенті У.Рутоның Қазақстанға жасаған мемлекеттік сапары (2026 жылғы 19-20 мамыр) барысында қол жеткізілген уағдаластықтарды іске асыру мақсатында, 2026 жылғы 3-5 маусым аралығында ҚР Кениядағы Елшілігінің ықпал етуімен "Қазақстан Ғарыш Сапары" ҰК" АҚ Басқарма төрағасы Қ.Қожаев бастаған Қазақстан Республикасы делегациясының Найроби қаласына сапары өтті, деп хабарлайды Қазақстан Республикасы Сыртқы істер министрлігінің баспасөз қызметінен.
Сапар аясында Қ.Қожаевтың Кения ғарыш агенттігінің (Kenya Space Agency) Бас директоры доктор Хиллари Бивотт Кипкосгеймен кездесуі өтті. Кездесу барысында Кения Президентінің Қазақстанға жасаған ресми сапары шеңберінде "Қазақстан Ғарыш Сапары" ҰК" АҚ мен Кения ғарыш агенттігі арасында жасалған "Жерді қашықтықтан зондтау, ғарыш жүйелерін әзірлеу және ғарыш технологияларын қолдану саласындағы өзара түсіністік туралы меморандумға" сәйкес тараптардың ынтымақтастықты одан әрі дамыту жөніндегі жоспарлары талқыланды.
ҚР делегациясы сондай-ақ "Global Data Festival 2026 and Kenya Space Expo & Conference 2026" халықаралық форумына қатысты.
Форумда сөйлеген сөзінде Қ.Қожаев ауыл шаруашылығын дамыту, қоршаған ортаны мониторингілеу, табиғи ресурстарды басқару және тұрақты даму міндеттерін іске асыру үшін ғарыш технологиялары мен аналитикалық шешімдерді іс жүзінде қолдану туралы айтты.
Жасанды интеллекттің маңызы зор, алайда оның өзі ғана жеткіліксіз. Тиімді шешімдер қабылдау үшін сенімді әрі өзекті деректер қажет. Жасанды интеллектті, ғарыштық технологияларды, Жерді қашықтықтан зондтауды, геокеңістіктік талдауды және цифрлық платформаларды біріктіру адамдар мен мемлекеттерге нақты пайда әкелетін шешімдерді жасауға мүмкіндік береді", - деп атап өтті Қайыржан Қожаев.
Қазақстан Ғарыш Сапары" ҰК" АҚ басшылығының Кения ғарыш агенттігінің басшылығымен кездесулері және "Global Data Festival and Kenya Space Expo & Conference 2026" шарасына қатысуы халықаралық ынтымақтастықты кеңейтуге, қазақстандық ғарыш технологияларын шетелдік нарықтарда ілгерілетуге, сондай-ақ Жерді қашықтықтан зондтау, геоақпараттық қызметтер және деректерді талдау саласындағы серіктестік жобаларды дамытуға ықпал етті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан Сыртқы істер министрлігі шетелдегі сайлау учаскелері туралы ақпарат жариялады
Сурет: ҚР СІМ
Қазақстан Республикасының Сыртқы істер министрлігі 2026 жылғы 23 тамызда өтетін Қазақстан Республикасы Құрылтайы депутаттарының сайлауында дауыс беруді ұйымдастыру үшін құрылған учаскелік сайлау комиссияларының құрамы, орналасқан жері және жұмыс кестесі туралы хабарлайды.
Министрліктен Қазақстан Республикасының "Қазақстан Республикасындағы сайлау туралы" Конституциялық заңына, Қазақстан Республикасы Президентінің сайлауды тағайындау туралы Жарлығына, сондай-ақ дауыс беруге дайындық пен оны өткізудің күнтізбелік жоспарын бекіткен Қазақстан Республикасы Орталық сайлау комиссиясының қаулысына сәйкес құрылғанын атап өтті.
Шетелде жүрген Қазақстан Республикасы азаматтарының дауыс беруін ұйымдастыруға ерекше назар аударылады. Осы мақсатта шет мемлекеттердегі Қазақстан Республикасының дипломатиялық өкілдіктері мен консулдық мекемелері жанынан тиісті учаскелік сайлау комиссиялары құрылады",- деп көрсетілген хабарламада.
Қазақстан Республикасының шет мемлекеттердегі өкілдіктері жанынан құрылған учаскелік сайлау комиссияларының толық тізімімен Қазақстан Республикасы Сыртқы істер министрлігінің ресми сайтынан танысуға болады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан БҰҰ алаңында және Азия елдерінде халықаралық ынтымақтастықты кеңейтуде
Сурет: ҚР СІМ
Қазақстан өкілдері халықаралық бастамаларды ілгерілетуге және шетелдік серіктестермен ынтымақтастықты нығайтуға бағытталған бірқатар дипломатиялық іс-шара өткізді, деп хабарлайды ҚР Сыртқы істер министрлігінен.
Найробиде БҰҰ қамқорлығымен Халықаралық су ұйымын құру жөніндегі Қазақстанның бастамасы талқыланды. Қазақстанның БҰҰ-ның Найробидегі бөлімшесі жанындағы Тұрақты өкілдігі ұйымдастырған дөңгелек үстелге БҰҰ-ға мүше мемлекеттердің өкілдері, ЮНЕП басшылығы және халықаралық сарапшылар қатысты.
Қазақстан қолданыстағы мандаттарды біріктіретін халықаралық су ұйымын құруды ұсынып отыр. Ең оңтайлы қадам UN-Water ведомствоаралық механизмін толыққанды мамандандырылған агенттікке немесе ұйымға айналдыру екені айтылды. Қазақстанның бұл бастамасы жаһандық су ресурстарын басқарудың үйлесімділігін, тиімділігін және есептілігін арттыру мақсатындағы инклюзивті диалогқа ашық шақыру ретінде ұсынылды.
Қазақстан Республикасының Мьянма Одағы Республикасындағы қоса атқарушы Елшісі Марғұлан Баймұхан Мьянма Одағы Республикасының Президенті Мин Аун Хлайнға сенім грамоталарын тапсырды. Сенім грамоталарын тапсыру рәсімі барысында Мьянма Президенті Қазақстан мен Мьянма арасындағы достық қарым-қатынастарды одан әрі дамыту мен өзара қызығушылық тудыратын бағыттар бойынша өзара тиімді ынтымақтастықты кеңейтудің маңыздылығын атап өтті.
Нейпьидо қаласына сапары барысында Елші М.Баймұхан сондай-ақ Мьянма Одағы Республикасының Сыртқы істер министрі Тин Маун Свемен кездесу өткізді. Кездесу барысында екіжақты және халықаралық күн тәртібіндегі өзекті мәселелер бойынша пікір алмасу өтіп, саяси, сауда-экономикалық және инвестициялық байланыстарды кеңейту, сондай-ақ халықаралық ұйымдар аясындағы өзара іс-қимылды дамыту перспективалары қарастырылды.
Қазақстан Республикасының Корея Республикасындағы Төтенше және Өкілетті Елшісі Асет Исенали Корея Республикасының Президенті Ли Чжэ Мёнге сенім грамоталарын тапсырды. Тараптар достық пен өзара қолдауға негізделген қазақ-корей кеңейтілген стратегиялық әріптестігінің жоғары деңгейін атап өтті. Саяси диалогты одан әрі нығайтуға, сауда-экономикалық және инвестициялық ынтымақтастықты кеңейтуге, сондай-ақ мәдени-гуманитарлық байланыстарды дамытуға өзара мүдделілік расталды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Қытай биопестицидтерді бірлесіп әзірлеуге кірісті
Сурет: gov.kz
Қазақстан мен Қытай биопестицидтерді әзірлеу және олардың өндірісін жергіліктендіру бойынша бірлескен жобаларды іске қосады, деп хабарлайды ҚР Ауыл шаруашылығы министрлігінің баспасөз қызметінен.
Тиісті меморандумға Ұлттық аграрлық ғылыми-білім беру орталығы, Ж. Жиембаев атындағы Қазақ өсімдік қорғау және карантин ғылыми-зерттеу институты және Қытай ауыл шаруашылығы ғылымдары академиясының Өсімдіктерді қорғау институты қол қойды.
Құжат заманауи биопестицидтерді бірлесіп әзірлеуді, озық технологиялар трансфертін жүзеге асыруды, Қазақстанда өсімдіктерді биологиялық қорғау құралдарының өндірісін жергіліктендіруді, сондай-ақ жоғары білікті мамандар даярлауды мақсат етеді. Меморандумға Қытайдың ғылыми делегациясының сапары аясында қол қойылды.
Тараптар бірлескен ғылыми зерттеулер жүргізуді, өсімдіктерді қорғауға арналған жаңа биологиялық құралдарды әзірлеп, сынақтан өткізуді, ғылыми әзірлемелер мен технологиялар алмасуды, академиялық ұтқырлық пен кадрлар даярлау бағдарламаларын іске асыруды, сондай-ақ перспективалы ғылыми әзірлемелерді коммерцияландыруға жәрдемдесуді жоспарлап отыр.
Жобаны іске асыру экологиялық қауіпсіз өсімдік қорғау құралдарын қолдану аясын кеңейтуге, импортқа тәуелділікті төмендетуге, отандық агроөнеркәсіптік кешенге инновациялық шешімдерді жедел енгізуге және оның бәсекеге қабілеттілігін арттыруға мүмкіндік береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ТМД елдері 2027 жылға арналған СІМ аралық консультациялар жоспарының жобасын келісті
Сурет: eccis.org
2026 жылғы 22 шілдеде ТМД штаб-пәтерінде 2027 жылға арналған Көпдеңгейлі сыртқы істер министрліктері аралық консультациялар жоспарының жобасын келісу жөніндегі сарапшылар тобының отырысы өтті, деп хабарлайды ТМД Атқарушы комитетінің баспасөз қызметінен.
Талқылауға Беларусь, Қазақстан, Қырғызстан, Ресей, Тәжікстан, Түрікменстан, Өзбекстан өкілдері, сондай-ақ ТМД Атқарушы комитетінің өкілдері қатысты.
Отырыс барысында сарапшылар құжатты қарап, оның жобасын жалпылама келісті. Қатысушылар сондай-ақ ТМД-ға мүше мемлекеттердің өкілдері ТМД Сыртқы істер министрлері кеңесі бекітетін деңгейде СІМ аралық консультацияларға қатысуының маңыздылығын атап өтті.
Сонымен қатар, жоба бойынша талқылауды 19 тамызға жоспарланған сарапшылар тобының келесі отырысында жалғастыру туралы шешім қабылданды.
Кездесу материалдары 2027 жылға арналған сыртқы істер министрліктеріаралық консультациялар жоспарының жобасын одан әрі пысықтау үшін қатысушы мемлекеттерге жолданады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Исламабадта саяси реформалар бағыты мен Пәкістанмен ынтымақтастықтың басымдықтарын таныстырды
Сурет: ҚР СІМ
Қазақстанның Пәкістандағы Елшілігінде "Жаңа дәуірдегі Қазақстанның саяси трансформациясы және Қазақстан мен Пәкістан ынтымақтастығының жаңа көкжиектері" тақырыбында Пәкістанның жетекші бұқаралық ақпарат құралдарының өкілдеріне арналған брифинг өтті, деп хабарлайды ҚР Сыртқы істер министрлігінің баспасөз қызметінен.
Брифингті ашқан Қазақстанның Пәкістандағы Елшісі Ержан Қыстафин қатысушыларды Әділетті Қазақстанды құру бағыты аясында жүзеге асырылып жатқан негізгі саяси реформалармен таныстырды. Сонымен қатар, Елші еліміздің конституциялық дамуының жаңа кезеңі, мемлекеттік саясаттың басты басымдықтары және әлеуметтік-экономикалық жаңғыртудың алдағы перспективалары туралы жан-жақты баяндады. Атап айтқанда, Қазақстан Республикасы Президенті Қ. Тоқаевтың жаңа Конституцияның күшіне енуіне және алдағы Құрылтай сайлауына арналған Парламент Палаталарының бірлескен отырысында сөйлеген сөзінің негізгі ережелері таныстырылды.
Өз сөзінде Елші сондай-ақ Қазақстан мен Пәкістан арасындағы қазіргі екіжақты қарым-қатынастардың жай-күйіне тоқталып, саяси диалогтың жоғары деңгейін атап өтті. Ол биылғы ақпан айында ҚР Президентінің Исламабадқа жасаған алғашқы мемлекеттік сапарының негізгі қорытындыларына тоқталып, көлік және логистика, сауда мен инвестициялар, білім беру, ақпараттық технологиялар, цифрландыру, мәдениет, туризм, спорт және басқа да салалардағы ынтымақтастықтың тұрақты дамып келе жатқанын атап өтті.
Іс-шара соңында екі ел арасындағы ынтымақтастықты нығайтуға қосқан үлесі, Қазақстанға қатысты іс-шараларды кеңінен жариялап жүргені және Елшілік қызметіне тұрақты ақпараттық қолдау көрсеткені үшін БАҚ өкілдеріне алғыс хаттар табыстау рәсімі өтті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Израиль инновациялар және технологиялар саласындағы бірлескен жобаларды талқылады
Қазақстан Республикасының Израиль Мемлекетіндегі Елшісі Дәулет Ембердиев Тель-Авив қаласында Израиль Инновациялар басқармасы басшысының орынбасары Шломи Кофманмен кездесті.
Кездесу Израиль Мемлекетінің Президенті И. Герцогтың биыл сәуірде Астанаға жасаған сапарының қорытындысы бойынша қол жеткізілген уағдаластықтарды іске асыру мақсатында ұйымдастырылды.
Қазақстандық дипломат Қазақстан мен Израиль арасындағы қарқынды дамып келе жатқан экономикалық және технологиялық ынтымақтастық аясында екі ел басшыларының уағдаластықтары инновациялар саласындағы өзара іс-қимыл мен израильдік технологияларды тартуға қуатты серпін беретінін атап өтті.
Ш. Кофман екіжақты диалогты дамыту перспективалары жөніндегі көзқарасымен бөлісіп, Қазақстанмен нақты әрі мазмұнды ынтымақтастыққа дайын екенін жеткізді. Осы тұрғыда қазақстандық компаниялар мен Израильдің технологиялық секторы арасында тікелей байланыстар орнату, сондай-ақ Қазақстанда озық технологияларды енгізуге бағытталған бірлескен жобаларды Израиль тарапының қолдауы мәселелері талқыланды.
Кездесу қорытындысы бойынша тараптар Израиль басшысының Қазақстанға жасаған сапары барысында қол жеткізілген екіжақты уағдаластықтарды тиімді іске асыру мақсатында, оның ішінде Қазақстан-Израиль Сауда-экономикалық ынтымақтастық жөніндегі үкіметаралық комиссиясы шеңберінде тығыз өзара іс-қимылды жалғастыруға келісті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Германия Қазақстанмен өзара құрмет пен сенімге негізделген сындарлы диалогты жалғастыруға дайын
Сурет: ҚР СІМ
Қазақстан Республикасының Сыртқы істер министрі Ермек Көшербаев дипломатиялық миссиясы аяқталатын Германия Федеративтік Республикасының Қазақстан Республикасындағы Елшісі Моника Иверсенмен кездесті, деп хабарлайды министрліктің баспасөз қызметінен.
Қазақстан сыртқы саяси ведомствосының басшысы қазақ-неміс стратегиялық әріптестіктігі деңгейін жоғары бағалап, Астананың екіжақты қарым-қатынастарды одан әрі жан-жақты дамытуға деген ұмтылысын атап өтті.
Министр ынтымақтастықты тереңдетуге деген өзара ниет расталған ақпандағы Берлинге сапарының және "Орталық Азия - Германия" форматындағы министрлер кездесуінің маңыздылығын атап өтті.
Германия Елшісі дипломатиялық миссиясы кезінде көрсетілген қолдау үшін шынайы ризашылығын білдіріп, Германияның Қазақстанмен өзара құрмет пен сенімге негізделген сындарлы диалогты жалғастыруға дайын екеніне сендірді.
Кездесу соңында Е.Көшербаев екі ел арасындағы байланыстарды нығайтуға қосқан жеке үлесі үшін Елшіге екінші дәрежелі "Достық" орденін табыс етті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.