Қазақстан мен Кувейт бірлескен инвестициялық жобаларды талқылады
Кездесулер барысында азық-түлік қауіпсіздігі мәселелеріне ерекше назар аударылды
Түркі инвестициялық қорының (Turkic Investment Fund, TIF) президенті Бағдад Әміреевтің Кувейт мемлекетіне жұмыс сапары аясында Қазақстан Республикасының елшісі Ержан Елекеев TIF басшысымен бірлесіп, Кувейттің және өңірдің жетекші қаржы-инвестициялық институттарының басшыларымен бірқатар кездесулер өткізді, деп хабарлайды ҚР Сыртқы істер министрлігінің баспасөз қызметінен.
Толығырақ тоқталатын болсақ, Кувейт араб экономикалық даму қорының (KFAED) Бас директорының міндетін атқарушы Рашид Әл-Бадермен кездесу барысында инфрақұрылымдық және басқа да басым жобаларды бірлесіп қаржыландыру перспективалары талқыланды. Келіссөздер қорытындысы бойынша жақын арада TIF пен KFAED арасында ынтымақтастық туралы меморандумға қол қою жөнінде уағдаластыққа қол жеткізілді.
Сондай-ақ, Кувейт инвестициялық басқармасының (KIA) Басқарушы директоры Шейх Сауд Салем Абдалазиз Ас-Сабахпен кездесуде тараптар TIF-ке мүше мемлекеттердегі перспективалы инвестициялық жобаларды, оның ішінде инфрақұрылым, көлік және логистика, энергетика және қаржы салаларындағы жобаларды талқылап, Араб экономикалық және әлеуметтік даму қорының Бас директоры Фаузи Юсеф Әл-Хунаифпен кездесуде жобаларды бірлесіп қаржыландыру мүмкіндіктері және Араб үйлестіру тобының институттарымен одан әрі өзара іс-қимыл мәселелері қарастырылды.
"Кездесулер барысында азық-түлік қауіпсіздігі мәселелеріне ерекше назар аударылды. Тараптар Қазақстанның осы саладағы елеулі әлеуетін және Кувейттің азық-түлік жеткізу көздерін әртараптандыру жағдайында ұзақ мерзімді ынтымақтастықты дамыту, оның ішінде бірлескен инвестициялық жобаларды іске асыру перспективаларын атап өтті",- деп айтылған хабарламада.
Кездесулер қорытындысы бойынша тараптар нақты инвестициялық бастамаларды одан әрі пысықтауға қызығушылықтарын растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Индонезия елімізбен жаңа іскерлік байланыстар орнатуға мүдделік танытуда
Сурет: ҚР СІМ
Индонезия тарапы жаңа іскерлік байланыстар орнатуға, тәжірибе алмасуға және ынтымақтастықтың перспективалы бағыттарын дамытуға қолдау көрсетуге дайын екенін білдірді, деп хабарлайды ҚР Сыртқы істер министрлігінің баспасөз қызметінен.
Қазақстанның Индонезиядағы елшісі Сержан Әбдікәрімов Индонезияның Жас кәсіпкерлер палатасының (KAPMI) Төрағасы Мулиансьях Абдуррахманмен және аталған ұйымның өкілдерімен кездесу өткізіп, Қазақстан мен Индонезия арасындағы екіжақты сауда-экономикалық және инвестициялық ынтымақтастықтың кең ауқымды мәселелері бойынша пікір алмасты.
Дипломат Қазақстандағы қолайлы инвестициялық және іскерлік ахуал туралы ақпарат ұсынып, екі ел арасындағы экономикалық өзара іс-қимылды кеңейтудің перспективалы бағыттарын мәлім етті.
"Елші 2025 жылдың 21 желтоқсанында Ресейдің Санкт-Петербург қаласында Еуразиялық экономикалық одаққа мүше мемлекеттер мен Индонезия арасында қол қойылған Еркін сауда туралы келісімнің маңыздылығын атап өтті. Аталған келісімнің іске асырылуы Қазақстан мен Индонезия арасындағы сауда-экономикалық байланыстарды одан әрі кеңейтуге және өзара тауар айналымының өсуіне ықпал етеді деп күтілуде", - деп жазылған хабарламада.
"KAPMI" төрағасы М.Абдуррахман өз кезегінде Қазақстанмен іскерлік байланыстарды одан әрі дамытуға қызығушылық білдіріп, екі елдің жас кәсіпкерлері арасындағы өзара іс-қимылды кеңейтудің маңыздылығын атап өтті. Оның айтуынша, Индонезия тарапы жаңа іскерлік байланыстар орнатуға, тәжірибе алмасуға және ынтымақтастықтың перспективалы бағыттарын дамытуға қолдау көрсетуге дайын.
Кездесу қорытындысы бойынша тараптар тұрақты әрі мазмұнды диалогты қолдауға, екі елдің іскер топтары арасындағы өзара іс-қимылды кеңейтуге және өзара тиімді қазақстандық-индонезиялық әріптестікті одан әрі дамытуға өзара мүдделі екенін растады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Нью-Йоркте БҰҰ Бас Ассамблеясында өз бастамаларын таныстырады
Қазақстан 2026 жылдың 22-28 қыркүйегі аралығында Нью-Йоркте өтетін БҰҰ Бас Ассамблеясының 81-сессиясының жоғары деңгейдегі апталығында ұлттық және өңірлік бастамаларын таныстырады, деп хабарлайды ҚР Сыртқы істер министрлігінің баспасөз қызметінен.
Сессияның тақырыбы - "Сенімді қалпына келтіру, өзгерістерді басқару". ҚР СІМ ресми өкілі Жанболат Үсеновтің айтуынша, іс-шара барысында халықаралық күн тәртібіндегі өзекті мәселелерге, жаңа технологиялар мен жасанды интеллектіні дамытуға, сондай-ақ БҰҰ реформасына ерекше назар аударылады.
Жоғары деңгейдегі апталық Қазақстан үшін ұлттық және өңірлік бастамаларды ілгерілетуге, екіжақты байланыстарды нығайтуға және жаһандық әрі өңірлік күн тәртібіндегі өзекті мәселелер бойынша бірлескен шешімдер әзірлеуге арналған маңызды алаң болмақ.
Қазақстандық делегацияны сыртқы істер министрі Мұхтар Тілеуберді басқарады. Бағдарламада делегация басшысының БҰҰ Бас Ассамблеясының жалпы пікірталастарында сөз сөйлеуі, БҰҰ Бас хатшысы Антониу Гутерришпен кездесуі, сондай-ақ БҰҰ-ға мүше мемлекеттердің сыртқы саяси ведомстволарының басшыларымен және халықаралық ұйымдардың жетекшілерімен бірқатар екіжақты кездесу өткізуі көзделген.
Сонымен қатар, қазақстандық делегация өңірлік ұйымдар мен көпжақты бірлестіктердің бейресми отырыстарына, БҰҰ Бас Ассамблеясы мандаты аясындағы іс-шараларға, сондай-ақ Орталық Азия елдері сыртқы істер министрлерінің консультацияларына қатысады деп күтілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан халықаралық байланыстарын кеңейтуде
Қазақстандық дипломаттар бірқатар кездесу өткізді
Қазақстан Кувейтпен мұнай-газ жобаларына инвестиция салу мәселесін талқыласа, Сербиямен консулдық саладағы ынтымақтастықты кеңейту мәселелерін талқылауда, деп хабарлайды ҚР Сыртқы істер министрлігінің баспасөз қызметінен.
Қазақстан Республикасының Кувейт Мемлекетіндегі елшісі Ержан Елекеев Kuwait Foreign Petroleum Exploration Company (KUFPEC) компаниясының Бас атқарушы директоры Иса Әл-Марагимен кездесу барсында кувейттік компания Қазақстанның мұнай-газ секторындағы инвестициялық мүмкіндіктеріне қызығушылық танытты.
Кездесу қорытындысы бойынша тараптар инвестициялық мүмкіндіктерді, техникалық параметрлерді және мұнай-газ жобаларын іске асырудың ықтимал тетіктерін егжей-тегжейлі талқылау мақсатында Қазақстан мен KUFPEC-тің бейінді техникалық командалары арасында онлайн-кездесу өткізуге уағдаласты.
Сонымен қатар, Қазақстан мен Сербия консулдық-құқықтық саладағы ынтымақтастықты кеңейтуді жоспарлап отыр. Бұл жайында Қазақстанның Сербия Республикасындағы елшісі Болат Иманбаев Сербия Республикасының сыртқы істер министрінің орынбасары Наташа Рашевичпен кездесу барысында мәлім болды.
Кездесу барысында тараптар екіжақты ынтымақтастықты консулдық-құқықтық салада дамыту, сондай-ақ екі ел арасындағы шарттық-құқықтық базаны кеңейту мәселелері талқылап, консулдық мәселелер бойынша сындарлы өзара іс-қимылды жалғастыруға және екіжақты күн тәртібінің өзекті бағыттары бойынша жұмыс байланыстарын нығайтуға уағдаласты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Кореяның Орталық Азиядағы ең ірі сауда және инвестициялық серіктесі
Сурет: Ақорда
Корея Республикасы Ұлттық Ассамблеясының спикері Чо Чжон Шик Қазақстанды елінің Орталық Азиядағы ең ірі сауда және инвестициялық серіктесі деп атады. Бұл туралы ол Қазақстан президенті Қасым-Жомарт Тоқаевпен кездесу барысында мәлімдеді, деп хабарлайды Ақорданың баспасөз қызметінен.
Чо Чжон Шик екі елдің энергетика, цифрландыру және жасанды интеллект салаларындағы ықпалдастығын арттырудың маңызы зор екендігін атап өтті. Оның айтуынша, Қазақстан мен Оңтүстік Корея соңғы жылдары түрлі салалардағы өзара іс-қимылды дәйекті түрде кеңейтіп келеді.
"Сіздің осы сапарыңыз аясында екі елдің қарым-қатынасы болашаққа бағдарланған жан-жақты стратегиялық серіктестік деңгейіне көтерілгеніне қуаныштымын", - деді спикер.
Тоқаев өз кезегінде бір күн бұрын Оңтүстік Корея президенті Ли Чжэ Мёнмен келіссөздер барысында кіжақты ықпалдастығымызды болашаққа бағдарланған жан-жақты стратегиялық серіктестік деңгейіне көтеру жөнінде маңызды уағдаластыққа қол жеткізілгенін хабарлады.
Мемлекет басшысы сондай-ақ сауда-экономикалық және инвестициялық байланыстар туралы айтты. Қазақстанда корей капиталының қатысуымен мыңнан астам бірлескен кәсіпорын жұмыс істейді, бірқатар салада бірлескен жобалар жүзеге асырылып жатыр.
Тараптар парламентаралық ынтымақтастыққа ерекше назар аударды.
"Жалпы, соңғы жылдары парламентаралық диалог айтарлықтай тереңдей түсті. Қазақстан Парламенті мен Корея Республикасының Ұлттық Ассамблеясы арасындағы байланыстар тұрақты түрде жүзеге асырылуда. Осындай байланыстарды Құрылтай депутаттары белсенді түрде дамыта бермек", - деді Тоқаев.
Президент сондай-ақ Қазақстандағы саяси реформалар, соның ішінде бір палаталы Құрылтайға көшу, вице-президент лауазымын енгізу, Қауіпсіздік кеңесі аппаратын құру және Халық кеңесінің жұмысын бастауы туралы айтты.
Тараптар мәдени-гуманитарлық байланыстар мен туризмді дамыту мәселелерін талқылады. Тоқаев Қазақстанда корё-сарам этностық корей қауымдастығының 120 мыңға жуық өкілі тұратынын атап өтті.
"Өздеріңізге елгілі, келесі жылы корей халқының Қазақстанға қоныс аударғанына 90 жыл толады. Бұл - тарихи уақиға. Екі мемлекет бірлесіп, осы айтулы межені жоғары деңгейде атап өтуіміз керек", - деді президент.
Чо Чжон Шик сондай-ақ 2027 жылдың көктемінде Қазақстанда Корея Республикасы мен Орталық Азия елдері парламенттері төрағаларының төртінші кездесуі өтетінін хабарлады. Ол форумға қатысуды жоспарлап отырғанын айтты.
Кездесу қорытындысы бойынша тараптар Қазақстан мен Корея Республикасы екіжақты қатынастардың барлық бағыты бойынша ықпалдастықты нығайта түсетініне сенім білдірді.
Естеріңізге сала кетсек, бүгін Қазақстан президенті "Орталық Азия - Корея Республикасы" бірінші саммитінің жұмысына қатысады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстандық дипломаттар Екатеринбургте өткен Халықаралық жастар фестиваліне қатысты
Сурет: ҚР СІМ
Қазақстанның Ресейдегі елшісі Дәурен Абаев бастаған делегация Екатеринбург қаласында өткен Халықаралық жастар фестиваліне қатысты, деп хабарлайды ҚР Сыртқы істер министрлігінің баспасөз қызметінен.
Дипломат "Көпполярлы әлемдегі көшбасшылық: халықаралық қатынастардың жаңа архитектурасында елдің позициясын не айқындайды" интерактивті сессиясы барысында елші үлкен Еуразияның қақ ортасында орналасқан Қазақстан үшін бірнеше нәрсе маңызды рөл атқаратынын атап өтті.
"Біріншісі - ішкі тұрақтылық. Сондықтан біз адами капиталды, технологияларды, инфрақұрылым мен логистиканы дамытып жатырмыз. Екіншісі - біз елдер мен құрлықтарды байланыстыра білуіміз, өзара іс-қимыл кеңістігін құруымыз қажет. Үшіншісі - сенім. Қазақстан әрқашан өз сөзін ұстанатын адал, тең құқылы серіктес болуға тиіс", - деді Д. Абаев.
Өз кезегінде РФ СІМ ресми өкілі Мария Захарова Қазақстанның халықаралық аренадағы маңыздылығын атап өтті. Оның бағалауынша, Республиканың әлеуеті "орта держава" шеңберінен асып түседі.
"Қазақстан әлемге және біздің Еуразия құрлығына орасан зор үлес қосты, соның бірі - өркениетаралық үлес. Дәл осы Қазақстанда мәдениеттер, діндер мен өркениеттер диалогына байланысты түрлі халықаралық іс-шараларды ұйымдастыру және өткізу жұмыстары басталған болатын. Бұл серпінді оқиға болды. Біз әріптестерімізді мақтан тұттық және осы идеяларды насихаттау үшін қолдан келгеннің бәрін жасадық", - деді М. Захарова.
"Болашақ дағдылары: галстуксіз диалог" сессиясы барысында Елші қоршаған ортаға қарағанда тезірек өзгере білу қабілетін болашақтың басты дағдысы деп атады.
"Болашақ көшбасшыларға айтар кеңесім - ең алдымен, жақсы адам, өз ісінің кәсіби маманы болыңыздар және әлеуметтік капиталыңызды үнемі арттырып отырыңыздар", - деді Д.Абаев жастарға арнаған сөзінде.
Халықаралық жастар фестивалі Екатеринбургте 11-17 қыркүйек аралығында өтеді. Оған әлемнің 191 елінен 14 пен 35 жас аралығындағы 10 мың адам қатысуда. Олардың қатарында 200 қазақстандық бар.
Панельдік сессиялар мен пікірталастардың негізгі тақырыптары: ғылым және білім, цифрландыру және IT, кәсіпкерлік, креативті индустриялар, мемлекеттік басқару, медиа, азаматтық белсенділік, спорт.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.