БАЙҚОҢЫР. 20 шілде. Kazakhstan Today. Байқоңырда "Прогресс М-61" жүк кемесін тамызда ұшыруға дайындық жұмыстары жүргізілуде . Бұл туралы Kazakhstan Today тілшісіне "Байқоңыр" Федералдық ғарыш орталығының баспасөз қызметі хабарлады.
Баспасөз қызметінің хабарлауынша, №254 монтаж-сынақ корпусында жүк тасушы ғарыш кемесіне қатысты қозғалтқыш қондырғына отын мен сұйытылған газ құю алдындағы ақырғы шаралар жүзеге асырылуда. "Дайындық кестесіне сәйкес, 23-шілде, дүйсенбіде "Прогресс М-61" транспорттық жүк кораблі №31 алаңдағы жанармай құю станциясына жеткізіледі, онда қозғалтқыштарға отын мен сұйытылған газ толтырылады", -деп хабарлайды орталық.
Осымен бір уақытта №112 алаңның монтаж-сынақ корпусында "Байқоңыр" Федералдық ғарыш орталығының мамандары мен Самарадағы "Прогресс" арнаулы орталық конструкторлық бюросының мамандары "Союз-У" зымыран тасығышының екінші сатысын құрастыруда. 17 шілдеден бастап "Байқоңыр" ФҒО мамандары мен В. Бармин атындағы жалпы машина жасау жөніндегі №1 конструкторлық бюросының пайдалану және сынақтар орталығының мамандары №1 алаңда ұшыру кешенінің жабдықтарын тексеруге және "Союз-У" зымыран тасығышы мен "Прогресс М-61" жүк кемесін қабылдап алуға дайындала бастады.
"Прогресс М-61" жүк кемесі Халықаралық ғарыш станциясына борт компьютерлерінің жабдықтары мен негізгі жүк болып саналатын азық-түлік, ғылыми жабдықтар мен отын жеткізуге тиіс.
"Прогресс М-61" жүк кемесі мен "Союз-У" зымыран тасығышы 2-тамызда Астана уақытымен 21 сағат 32 минутта (Мәскеу уақытымен 19 сағат 32 минут) ұшырылады деп межеленген.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті