12.07.2016, 21:02 4523

Алматыда құрылыс компаниясы қабырғасы қисайған үйді түзетіп, қайта саудаға шығармақ

Алғабастағы апатты деп танылған 9 қабатты үй ақыры бұзылмайтын болды. Оны "Астана құрылыс" компаниясы өз меншігіне алып, қайта қалпына келтірмекші. Яғни қисайған қабырғаны түзетіп, қайта саудаға шығарады. Ал далада қалған 72 отбасыға дәл сондай 9 қабатты үй салынып жатыр. Оны құрылысшылар тәуелсіздік күніне тарту етеміз деп сендіруде

Алматы. 12 шілде. Kazakhstan Today - Алғабастағы апатты деп танылған 9 қабатты үй ақыры бұзылмайтын болды. Оны "Астана құрылыс" компаниясы өз меншігіне алып, қайта қалпына келтірмекші. Яғни қисайған қабырғаны түзетіп, қайта саудаға шығарады. Ал далада қалған 72 отбасыға дәл сондай 9 қабатты үй салынып жатыр. Оны құрылысшылар тәуелсіздік күніне тарту етеміз деп сендіруде, деп хабарлайды Kazakhstan Today агенттігініӊ тілшісі.

Қабырғасы қисайып, құлаудыӊ алдында тұрса да бұл үй бұзылмайды. "Астана құрылыс" компаниясы оны өз меншігіне алып, апатты нысанныӊ кемшіліктерін толық жоямыз деп отыр. Себебі 32 сантиметрге ауытқыған нысан анау айтқандай қауіпті емес - дейді құрылысшылар, деп хабарлайды www.ktk.kz тілшісі.

Мейіржан Досанов, "Астана құрылыс" компаниясыныӊ бөлім басшысы:

-Қисайған үйлер болады. Жердіӊ қыртысына байланысты. Шымкентте қисайған 16 қабатты үйді "ГидроСпецСтрой" деген компания түзеген. Мынау 32 сантиметр деген түк емес орнына қойылады.

Сондықтан қазір құрылыс компаниясы 72 пәтерлі баспананы бұрынғы тұрғындарынан қабылдап алып жатыр. Изірге 42 отбасы жүктерін жинап, пәтерлерін толық босатып берген. Қалған отызы көшіп болғасын, қабырғаны қалпына келтіру жұмыстары басталмақшы. Тек содан кейін ғана 9 қабатты нысан сатылымға шығарылады. Тіпті апатты үйден пәтер алуға құрылысшылардыӊ өздері де үмітті екен.

Мейіржан Досанов, "Астана құрылыс" компаниясыныӊ бөлім басшысы:

- "Астана Құрылыстыӊ" жеке меншігіне өтеді. Оны жоғарғы жақ шешеді. Сатамыз да, өзіміздіӊ құрылысшыларға да береміз. Өзімізде ойлап жүрміз сол жерден бір пәтер алсақ деп.

Баспаналы болуды армандаған құрылысшылар 72 отбасыға арнап жаӊа үй салуға да кірісіп кетті. Қазір 9 қабатты нысанныӊ шұӊқыры қазылып жатыр. Осылайша жұмысшылар бас аяғы екі жарым айда қабырғасын құйып бітіреміз дейді. Ары қарай әрлеу жұмыстары жүргізіліп, желтоқсан айында жаӊа баспана пайдалануға берілмекші.

Қазір мұнда құрылыс жұмыстары қарқынды жүріп жатыр. "Астана құрылыс" компаниясы 9 қабатты үйді жарты жылдыӊ ішінде салып бітіреміз деп отыр. Ол үшін құрылысшылар да еш демалыссыз күндіз-түні екі ауысыммен жұмыс істеп жатыр екен. Cондықтан далада қалған 72 отбасы ел тәуелсіздігініӊ 25 жылдық мерейтойы қарсаӊында жаӊа баспанаға кіріп, қоныс тойын тойлауы әбден мүмкін.

МӘТІННЕН ҚАТЕ ТАПТЫҢЫЗ БА?

Оны тінтуірмен таңдап, Ctrl + Enter пернелерін басыңыз.

тақырып бойынша жаңалықтар

Ең көп оқылғаны