Бұтақты шатқалында Алматының тау кластерін дамыту аясында жүзден астам ағашты кесу жоспарлануда
Сурет: Әлеуметтік желідегі бейнежазбадан скриншот
Бұтақты шатқалында Алматы тау кластері дамыту жобасын іске асыруға байланысты жүргізілетін жұмыстар аясында 125 ағашты кесу жоспарланып отыр. Бұл туралы "Іле-Алатауы" мемлекеттік ұлттық табиғи паркі Kazakhstan Today ақпарат агенттігінің жолдаған сауалына берген жауабында мәлім етті.
"Кесілуге жататын таңбаланған ағаштардың саны - 125", - деп көрсетілген жауапта.
Ұлттық парк өкілдерінің мәлімдеуінше, ағаштың төрт түрі, яғни Шренк шыршасы, еуропалық шырша, қарағай және қайың ағаштары кесіледі.
Мекеме Медеу филиалы Камен орманшылығының Бұтақты шатқалында ағаш кесілетін учаскелерді бөлу және таксациялау жұмыстары жүргізілгенін хабарлады. Ағаштарды кесу рұхсатнамасы Орман шаруашылығы және жануарлар дүниесі комитетінің 25 маусымдағы бұйрығы негізінде 2026 жылдың 29 маусымында берілген.
Құжатта кесу түрі "өзге мақсаттар үшін кесу" деп көрсетілген. Бұл су құбыры тораптарын, құбыр желілерін, автомобиль жолдарын, электр беру желілерін және басқа да желілік нысандарды салуға байланысты орман алқаптарын тазарту жұмыстары дегенді білдіреді.
Кесуге арналған барлық ағаш алдын ала арнайы орман балғасымен таңбаланады.
"Арнайы белгісі жоқ ағаштар кесілмейді. Сондықтан кесуге арналған әр ағаштың діңіне арнайы таңба салынады", - деп нақтылады ұлттық парк өкілдері.
Мекеме жүргізіліп жатқан жұмыстардың Алматы тау кластері жобасын іске асыруға байланысты екенін де мәлімдеді.
"Алматы қаласы мен Алматы облысында тау және шаңғы туризмін дамыту жөніндегі тапсырмаларды орындау мақсатында Алматы тау кластерін дамыту, оның ішінде Көкжайлау шатқалында Almaty Superski жобасын іске асыру жұмыстары жүргізіліп жатыр",- деп айтылған хабарламада.
Жобада Алматы қаласы мен Алматы облысында тау және шаңғы туризмін дамыту көзделген. Атап айтқанда, бұған дейін "Шымбұлақ" тау шаңғысы курортын, Кімасар және Бұтақты шатқалдарын, сондай-ақ "Пионер" және "Oi Qaragai" курорттарын бірыңғай аспалы жолдар жүйесімен біріктіру қажеттігі айтылған болатын.
Естеріңізге сала кетсек, маусым айында Көкжайлау шатқалына апаратын бағыт бойындағы ағаштарға таңба салынғаны туралы ақпарат қоғамда резонанс тудырып, тұрғындар таңбаланған ағаштардың көпшілігі жас ағаш екендігін және де оларда қураған белгілері жоқ екенін айтқан болатын.
Кейінірек "Іле-Алатауы" мемлекеттік ұлттық табиғи паркі Көкжайлаудағы болашақ туристік курортқа апаратын ұзындығы 6,02 шақырым автомобиль жолын салу үшін 2627 ағашты кесу жоспарланып отырғанын растады.
Шілде айында Көкжайлау аумағында құрылыс жұмыстары басталған болатын.
Жобаны жүзеге асырып жатқан Kazakh Tourism Development компаниясының хабарлауынша, қазіргі уақытта техникалық және кірме жолдар салынып жатыр. Сонымен қатар, археологиялық зерттеу жұмыстары да басталған.
Көкжайлау аумағында археологиялық мұра нысандары болғандықтан, бұл жұмысқа Археология институтының мамандары тартылды. Алдағы күндері олар қазба жұмыстарын жүргізіп, тарихи ескерткіштерді зерттеуге кіріседі. Әрбір нысан бойынша жеке шешім қабылдау жоспарланып отыр: шұғыл археологиялық қазба жұмыстарын жүргізу, нысанды орнында сақтау, музейлендіру немесе оны тікелей Көкжайлау аумағындағы музей экспозициясына енгізу.
Сонымен қатар, кеңейтілген инженерлік-геологиялық зерттеулер жүргізіліп жатыр.
Компанияның мәлімдеуінше, 11 аспалы жол салу жоспарланған. Жұмыстарға Францияның POMA компаниясы тартылған. Онымен жүйені жобалау, дайындау, монтаждау және пайдалануға беру туралы келісімдерге қол қойылды.
Сонымен қатар, Алматы әкімдігі Көкжайлаудағы қосалқы станцияны қалпына келтіру және Қазачка өзенінің бойымен демалыс аймағының шекарасына дейін кірме жол салу жұмыстарын жүргізіп жатыр.
Бұл ретте Көкжайлауда тау курортын салу жоспары қоғамда кең резонанс тудыруын жалғастыруда. Экологтер мен қоғам белсенділері жобаны іске асыруға қарсы шығып, құрылыс орны толмас экологиялық зардаптарға әкелуі мүмкін екенін мәлімдеуде. Олардың бағалауынша, құрылыс тау экожүйелерінің тозуын жеделдетіп, шатқал аумағындағы температураны жоғарылатуы, мұздықтардың жағдайына кері әсер етуі, сондай-ақ жануарлардың мекендеу орындарының жойылуына және орман алқабының бір бөлігінің кесілуіне әкелуі ықтимал.
Әлеуметтік желілерде алматылықтар шатқалды және жаяу туризммен айналысу мүмкіндігін сақтап қалуға шақырып, тауларда құрылыс жүргізуді одан әрі жалғастыруға қарсы шығып жатыр. Олардың пікірінше, Көкжайлауда ең алдымен экологиялық туризмді дамытып, табиғи аумақты болашақ ұрпақ үшін сақтау қажет.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Space Days Kazakhstan 2026 Астанада ғарыш саласының сарапшыларының басын қосты
Сурет: gov.kz
Астанада Nazarbayev University алаңында мемлекеттік органдардың, халықаралық ұйымдардың, ғарыш агенттіктерінің, ғылыми қауымдастықтың, технологиялық компаниялар мен инвесторлардың өкілдерін біріктірген Space Days Kazakhstan 2026 халықаралық форумы басталды, деп хабарлайды ҚР Жасанды интеллект және цифрлық даму министрлігінен.
Форум ғарыш саласын дамытуға, жаңа технологиялар мен оларды іс жүзінде қолдануға арналған. Қатысушылар сондай-ақ ғарышты игеру саласындағы халықаралық ынтымақтастық мәселелерін талқылайды.
Форумның ашылуында сөз алған премьер-министрдің орынбасары - жасанды интеллект және цифрлық даму министрі Жаслан Мәдиев деректерді, технологияларды және кадрларды Қазақстанның ғарыш саласын дамытудың үш негізгі бағыты деп атады.
"Деректер, технологиялар және адам капиталы - Қазақстанға бәсекеге қабілетті ғарыш өнімдері мен қызметтерін жасауға мүмкіндік беретін үш негізгі бағыт. Біз форумның нақты нәтижелерге, нақты келісімдерге және жаңа бірлескен жобаларға жол ашатынына сенеміз", - деді Мәдиев.
Оның айтуынша, 2030 жылға қарай тоғыз спутниктен тұратын Жерді қашықтан зондтаудың халықаралық спутниктік тобын құру жоспарланып отыр. Оның құрамына Қазақстанның алты спутнигі, сондай-ақ Моңғолия, Конго Республикасы және Нигерияның ғарыш аппараттары кіреді. Жаслан Мәдиев Қазақстанның жаңа серіктестермен ынтымақтастыққа ашық екенін және алдағы уақытта спутниктік топтаманы 14 спутникке дейін кеңейту мүмкіндігі бар екенін атап өтті.
Сонымен қатар, Қазақстан KazSat-3 спутнигін жаңа KazSat-3R ғарыш аппаратына ауыстыру жұмыстарын жүргізіп жатыр. Бұл ұлттық спутниктік байланыс жүйесінің тұрақты жұмысын қамтамасыз етіп, оны заманауи технологиялық талаптарға сай дамытуға мүмкіндік береді.
Форумның алғашқы күні қатысушылар ғарыш саласын дамытудың негізгі бағыттарына арналған панельдік сессиялар өтеді. Қатысушылар спутниктік байланыстың еліміздің цифрлық тәуелсіздігін қамтамасыз етудегі рөлін, спутниктік инфрақұрылым негізіндегі қызметтер нарығын дамыту және спутниктік деректерді су ресурстарын басқару үшін пайдалану мәселелерін талқылайды
Жекелеген сессиялар ғарыш жүйелерінде жасанды интеллектіні қолдануға, өңірлік ғарыш агенттіктерінің өзара іс-қимылына, халықаралық ғарыш туризміне және әлемдік ғарыш саласының перспективаларына арналады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Миллиондаған зерттеу мен мыңдаған науқас: отандастарымыз Сібірдегі ірі ауруханалардың біріндегі қызмет барысымен бөлісті
Орталық Азия елдерінен келген журналистер Новосібірдегі ірі ауруханалардың біріне баспасөз туры аясында барды, деп хабарлайды агенттік тілшісі.
Іс-шара аясында отандастарымыз - Ресейдің еңбек сіңірген дәрігері, хирург Анатолий Юданов пен хирург-эндоскопист Дмитрий Полежаев жұмыстары туралы әңгімелеп берді.
"Мен Өскеменде дүниеге келдім. Әрдайым спортпен айналыстым және Қазақстанның барлық өңірін араладым. Бұл ел менің жүрегімде ерекше орын алады", - деп мәлім етті Юданов.
Дмитрий Полежаев Семейде оқып жүрген кезінде-ақ хирург болуға шешім қабылдап, эндоскопия бағытын таңдағанын айтты.
"Менің отбасым осында тұрады, сондықтан Новосібірге көшіп келдім. Қазақстандағы медицина университетінің бірінші курсынан бастап хирург болатынымды білдім. Мен таңдаған эндоскопия қарқынды дамып келе жатқан бағыт болып саналады", - дейді білікті дәрігер.
Оның айтуынша, Қазақстан тұрғындары медициналық көмек алу үшін Новосібір облыстық ауруханасына тұрақты түрде жүгінеді.
"Біздің ауруханада көптеген отандастарымыз емделеді. Сондай-ақ, мұнда тексеруден өту үшін де көп адам келеді", - деді Полежаев.
Новосібір облыстық клиникалық ауруханасы барлық медициналық қызметтерді біріктіреді. Медициналық мекеме құрамында барлық бейіндегі терапиялық, хирургиялық және педиатриялық бөлімшелер бар. 2021 жылдан бастап аурухана құрылымына облыстық перинаталдық орталық та кіреді.
Перинаталдық орталықтың жаңа туған нәрестелерге арналған реанимация бөліміне жыл сайын қарқынды терапияны қажет ететін 300-ге жуық сәби түседі.
Кішкентай пациенттердің жанында тоқылған сегізаяқ ойыншықтары жатады. Олар кіндік бауын еске салып, сәбилерге инстинктивті түрде олардан ұстап жатуға мүмкіндік береді. 2024 жылы орталықта осындай 49 бала болған.
Жыл сайын Новосібір облыстық ауруханасында 55 мыңға жуық пациент медициналық көмек алады, ал диагностикалық орталықтарда 3,8 млн-нан астам зерттеу жүргізіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Батумиде "Абай. Қара сөз" пластикалық қойылымы көрерменге жол тартты
Сурет: ҚР СІМ
Түркістан музыкалық драма театры Грузияның Батуми қаласында Абай Құнанбайұлының философиялық және әдеби мұрасына арналған "Абай. Қара сөз" пластикалық қойылымын ұсынды, деп хабарлайды ҚР СІМ баспасөз қызметінен.
Қыркүйек айының 2-3 күндері Батуми қаласының Илья Чавчавадзе атындағы Батуми мемлекеттік драма театрында өткен қойылым қала тұрғындары мен қонақтарының үлкен қызығушылығын тудырып, грузин көрермендерінің ыстық ықыласына бөленді. Ұлы қазақ ақыны және ойшылы Абайдың философиялық және әдеби мұрасына негізделген қойылымда оның адамгершілік, білім, рухани даму және жалпыадамзаттық құндылықтар туралы ой-толғамдары көрсетілді.
Сонымен қатар, гастрольдік сапар аясында келушілерді Қазақстанның мәдени мұрасымен таныстыруға арналған көрме ұйымдастырылды.
Экспозицияда қазақтың дәстүрлі киімдері мен ұлттық әшекей бұйымдары, тұрмыстық заттар мен ыдыс-аяқ, халық музыкалық аспаптары, сондай-ақ қазақстандық суретшілердің туындылары ұсынылды. Көрме қонақтарға қазақ халқының төл мәдениетімен, дәстүрлері және өнерімен жақынырақ танысуға мүмкіндік берді.
Іс-шараға жергілікті билік органдарының, Грузияның қоғамдық және мәдени ортасының өкілдері, қазақ диаспорасының мүшелері, сондай-ақ Аджария тұрғындары мен қонақтары қатысты. Гастрольдік сапар Түркістан облысы әкімдігінің, Қазақстан Республикасының Грузиядағы Елшілігінің, Қазақстан Республикасының Батуми қаласындағы Құрметті консулының және Art Fest Group қолдауымен ұйымдастырылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қорғалжында Flamingo Fest фестивалі өтті
Сурет: gov.kz
Ақмола облысының Қорғалжын ауылында екінші мәдени-туристік Flamingo Fest фестивалі өтті, деп хабарлайды аймақ әкімдігінің баспасөз қызметінен.
Фестивальге Ақмола облысы, Астана және еліміздің басқа өңірлерінің тұрғындары келді. Қонақтар Қорғалжын өңірінің мәдениетімен және табиғатымен танысып, қызғылт қоқиқаздар мекендейтін жерлерді аралады.
Фестиваль аясында Flamingo Art көрмесі өтіп, онда Ақмола облысы суретшілерінің өңір табиғатына арналған туындылары ұсынылды. Сонымен қатар, сәндік-қолданбалы өнер шеберлерінің жәрмеңкесі ұйымдастырылып, онда қонақтар қолөнер бұйымдарын тамашалап, жергілікті шеберлердің шығармашылығымен таныса алады.
Фестивальдің негізгі шараларының бірі - осы құстар мекендейтін жерлерге экскурсиялар. Қатысушыларға тәжірибелі гидтер мен қорық мамандары жетекшілік етеді. Сапар барысында олар жергілікті экожүйенің ерекшеліктері, қоқиқаздардың мекендейтін орындары және табиғи аумақта өзін ұстау ережелері туралы әңгімелеп берді.
Естеріңізге сала кетсек, Flamingo Fest алғаш рет Қорғалжын ауданында өткен жылы өтті. Фестиваль мәдениетті, экологиялық ағартуды және туризмді дамытуды ұштастырады. Биыл ол екінші рет ұйымдастырылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Шақырымдарға созылған кептелістер: алматылықтар қала жолдарындағы ахуалға наразылық танытуда
Қала тұрғындары күндіз қала қозғалысын тұралатып тастаған жол кептелістеріне шағымдануда, деп хабарлайды агенттік тілшісі.
Қаланың орталығында көлік кептелісі күшейіп, Төле би, Тимирязев көшелерін, Абай және Әл-Фараби даңғылдарын, сондай-ақ Сейфуллин - Сәтбаев және Мұқанов - Шевченко көшелерінің қиылыстарын қамтыды.
Әлеуметтік желі қолданушыларының жазуынша, Құлжа тасжолында Алматыға қарай бірнеше шақырымға созылған кептеліс те пайда болған.
Кептелісте тұрған тұрғындар жолдағы жағдайға наразылық білдіріп, видео түсіруде.
Қыркүйекте мектептерде оқу басталып, студенттер қалаға оралған кезде көлік қозғалысының қиындауы үйреншікті жағдайға айналғанына қарамастан, тұрғындар бұған көбіне дайын болмай шығады. Ал, қала билігі тарапынан алдын ала берілетін ақпарат көп жағдайда жеткіліксіз болады.
Биыл жол жөндеу мен көшелерді қайта жаңғырту жұмыстары жағдайды одан әрі қиындата түскен.
Қыркүйек айында билік қала тұрғындарына мүмкіндігінше жеке көлікпен жүруден бас тартып, қашықтан жұмыс істеуге көшуді ұсынды. Алайда бұл шара кептеліс мәселесін шеше алмады. Сонымен қатар қала тұрғындары жаппай метроға ауысып, станцияларда да ұзын-сонар кезек пайда болды.
Алматыда көлік кептелісі мәселесі ең өзекті проблемалардың бірі болып отыр.
Polisia.kz-тің өткен жылғы мәліметі бойынша, күн сайын мегаполис көшелеріне басқа өңірлерден келетін көліктерді қоса алғанда, 1,5 миллионнан астам көлік шығады. Сондай-ақ, Алматыға облыстан күн сайын көптеген көлік кіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.