Димаш Құдайберген «Алтай – түркі әлемінің алтын бесігі» фестивалінде өнер көрсетті
Сурет: ШҚО әкімдігі
Шығыс Қазақстан облысының Катонқарағай ауданында өткен «Алтай – түркі әлемінің алтын бесігі» халықаралық фестивалі аяқталды, деп хабарлады облыс әкімдігі.
Фестивальдің қорытынды гала-концертіне Қазақстаннан және шетелден келген 50 мыңнан астам көрермен жиналды.
Кештің басты оқиғасы Қазақстанның халық әртісі Димаш Құдайбергеннің өнер көрсетуі болды. Оның концерті екі сағаттан астам уақытқа созылып, Башқұртстан, Моңғолия, Тыва, Әзербайжан, Қарақалпақстан, Мажарстан, Өзбекстан, Қырғызстан және Түркиядан келген өнерпаздар қатысқан халықаралық концерттік бағдарламаны қорытындылады.
Димаштың сахнаға шығуын көрермендер зор қошеметпен қарсы алды. Мыңдаған адам оның әндерін бірге орындап, ұялы телефондарының шамдарын жағып, концертті естелікке бейнетаспаға түсірді.
«Бұл кеште түркі әлемін біріктірген ең қуатты тіл – музыка болды. Ал сол музыканың елшісі, қазақ өнерінің мақтанышы, миллиондаған тыңдарманның сүйікті әншісі – Қазақстанның халық әртісі, әлемге әйгілі әнші Димаш Құдайберген болды», – деп атап өтті ұйымдастырушылар.
Ұйымдастырушылардың айтуынша, Димаш Құдайбергеннің концерті фестивальдің шарықтау шегіне айналып, әртүрлі жастағы және түрлі ұлт өкілдерін біріктірді. Көптеген қонақ үшін дәл оның өнер көрсетуі Катонқарағайға келудің басты себебі болды.
Бірнеше күн бойы фестиваль қонақтарды түркі халықтарының мәдениетімен, музыкасымен және салт-дәстүрімен таныстырды. Ал, Димаш Құдайбергеннің гала-концерті осы ауқымды мәдени шараның жарқын қорытындысына айналды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Атырау облысында лотос фестивалі ашылды
Сурет: Gov.kz
Құрманғазы ауданына қарасты Теңіз ауылында "LOTUS FEST-2026" мәдени-туристік фестивалінің салтанатты ашылу рәсімі өтті,- деп хабарлайды Өңірлік коммуникациялар қызметі.
Фестиваль лотос алқабының табиғи ерекшелігін танытып, өңірдің мәдени және туристік әлеуетін кеңінен насихаттауға бағытталды.
Бұл іс-шара - лотос алқабының табиғи сұлулығын көпшілікке танытып қана қоймай, өңірдің туристік әлеуетін арттыруға мүмкіндік береді. Әсіресе, осындай ерекше табиғи нысандарды туристік бағытқа айналдырып, Атырауға келетін қонақтар санын көбейтуге жол ашады,- деді аудан әкімі.
Мерекелік шара концерттік бағдарламамен жалғасты. Көрермендер алдында "Sarmad" этно-фольклорлық ансамблі, "Жайық қызы" халықтық би ансамблі өнер көрсетіп, эстрада жұлдызы Қуандық Рахым ән шырқады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан полициясы тұрғындарға "тәуекелсіз инвестиция" деген желеумен алаяқтардың құрығына түсіп қалмауды ескертеді
Сурет: ЖИ
Қазақстан полициясы әлеуметтік желілер, мессенджерлер мен интернет-платформалар арқылы өзін брокер немесе қаржы сарапшысы ретінде таныстырып, инвестициядан пайда табуды ұсынатын алаяқтардың әрекеті туралы ескерту жасады.
Қаскөйлер жоғары табыс, "кепілді пайда" және "тәуекелсіз инвестиция" уәде етеді. Алдымен адамға аз мөлшерде қаражат салуды ұсынады. Кейін жалған сайтта немесе қосымшада оның капиталы өсіп жатқандай көрсетеді.
Осыдан кейін алаяқтар жәбірленушіні "инвестиция көлемін ұлғайту", "комиссия төлеу" немесе "шотты бұғаттан шығару" деген сылтаулармен қайта-қайта ақша аударуға көндіреді.
Адам ақшасын шығарып алуға әрекеттенген кезде сайт жұмысын тоқтатады, аккаунт бұғатталады, ал "кеңесші" байланысқа шықпай қояды.
"100 пайыз кепілдік беріп, жоғары табыс уәде ететіндерге сенбеңіздер. Бірнеше күннің ішінде ақшаңызды бірнеше есе көбейтуді ұсынатындардан сақ болыңыздар", - деп ескертті полиция.
Азаматтарға бейтаныс адамдардың нұсқауымен ақша аудармау, банк картасының деректерін, CVV-код пен SMS-кодтарды ешкімге бермеу ұсынылды. Сондай-ақ, күмәнді сілтемелерге өтпеу және белгісіз қосымшаларды орнатпау қажет.
Полиция әңгімелесуші шешім қабылдауға асықтырып, ақшаны дереу салуды талап етсе, сақ болуға кеңес береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыдағы Канье Уэстің концерті блэкаутқа қарамастан өтеді
Алматыдағы Канье Уэстің концерті қалада электр энергиясының жаппай өшуіне қарамастан, кестеге сәйкес өтеді, деп хабарлайды First Media Group маркетингтік холдингі.
"Концерт кестеге сәйкес өтеді, әртіс сахнаға сағат 21:00-де шығады. Қазірден бастап жолға шығуды және жолға кететін уақытты, жолдағы кептелістерді, стадионға кірердегі тексеру мен алаңға кіру рәсімдерінің алатын уақытын алдын ала ескеруді сұраймыз. Барлығы штаттық режимде жұмыс істеп тұр. Стадионда күтеміз!" - деп мәлімдеді баспасөз қызметінен.
Сонымен қатар, "Алатау Жарық Компаниясы" Алматыдағы Канье Уэстің концерті кезінде электр энергиясы болатынына қатысты нақты жауап бере алмады.
"Нақты жауап бере алмаймыз, өйткені электр энергиясы әлі толық берілген жоқ", - деп хабарлады компания өкілі.
Сонымен қатар, АЖК-де алдағы іс-шараның техникалық параметрлері мен энергия тұтыну көлемі туралы ақпарат жоқ екенін де атап өтті.
"Алатау Жарық Компаниясы" АҚ-да Канье Уэстің қатысуымен өтетін концерттің техникалық параметрлері мен энергия тұтыну көлемі туралы ақпарат жоқ. Осыған байланысты оның энергия шығынын және қаланы электрмен жабдықтауға ықтимал әсерін бағалау мүмкін емес", - деп хабарлады АЖК.
Kazakhstan Today дереккөздерінің мәліметінше, концерт өтетін алаңда электрмен жабдықтауда іркіліс болған жағдайда пайдаланылатын генераторлар қарастырылған.
Бұған дейін Алматыда электр энергиясы жаппай өшкен болатын. Соның салдарынан метро жұмысы уақытша тоқтатылып, жекелеген аудандарда сумен жабдықтауда да қиындықтар туындап, бағдаршамдар жұмыс істемей қалған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ақтөбедегі триатлон саябағында жүзден астам ағаш заңсыз кесілген: қылмыстық іс қозғалды
Ақтөбеде триатлон саябағы аумағында 100-ден астам ағаш заңсыз кесілгеннен кейін қылмыстық іс қозғалды, деп хабарлайды «31 арна».
Белгілі болғандай, жекеменшік компания өкілдері өздеріне тиесілі учаскеде ағаштарды кескен. Алайда олар учаске шекарасынан шығып, қалалық қорға тиесілі шамамен 3 мың шаршы метр аумақтағы ағаштарды да кесіп қойған.
Ағаштардың кесіліп жатқанына алғаш болып экобелсенділер мен жергілікті тұрғындар назар аударды.
«Қаламызда ағаштарды кесу мүлдем дұрыс емес деп есептеймін. Әсіресе мұнда, триатлон саябағында бұлай жасауға болмайды. Бұл — оттегіге бай жалғыз орын және мұнда бәрі адамдар үшін жасалған», — деді Ақтөбе тұрғыны Динара Құрғанбаева.
Жағдайға жергілікті билік, табиғат қорғау прокуратурасы және полиция араласып, ҚР Қылмыстық кодексінің «Ағаштар мен бұталарды заңсыз кесу, жою немесе зақымдау» бабы бойынша қылмыстық іс қозғалды.
Еске сала кетейік, Бұтақты шатқалында Алматы тау кластері жобасын іске асыруға байланысты жұмыстар аясында 125 ағашты кесу жоспарланып отыр.
Маусым айында Көкжайлау шатқалына апаратын бағыт бойындағы ағаштарға таңба салынғаны туралы ақпарат қоғамда кең резонанс тудырды. Сол кезде тұрғындар таңбаланған ағаштардың көпшілігі сау көрінетінін және олардың қураған белгілері жоқ екенін айтқан болатын.
Кейінірек «Іле-Алатауы» мемлекеттік ұлттық табиғи паркі Көкжайлаудағы болашақ туристік курортқа апаратын ұзындығы 6,02 шақырым автомобиль жолын салу үшін 2627 ағашты кесу жоспарланып отырғанын растады.
Шілде айында Көкжайлау аумағында құрылыс жұмыстары басталды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Канье Уэст Қазақстанда алғаш рет өнер көрсетеді: Алматыдағы концерт туралы не білу керек
Сурет: ЖИ
Бүгін Алматының Орталық стадионында америкалық рэпер Канье Уэстің концерті өтеді. Бұл - әртістің Қазақстандағы алғашқы өнер көрсетуі, деп хабарлайды агенттік тілшісі.
Концертке байланысты қала орталығында көлік қозғалысы уақытша шектеледі. Жолдар сағат 16:00-ден түн ортасына дейін жабылады деп күтілуде.
Нақтырақ айтсақ, Абай даңғылы мен Сәтбаев көшесінің Байзақов көшесінен Сейфуллин даңғылына дейінгі бөлігінде, сондай-ақ Байтұрсынов көшесінің Шевченко көшесінен Тимирязев көшесіне дейінгі бөлігінде көлік қозғалысы жабылады.
Қоғамдық көліктің жұмысы да өзгереді. Яғни, 26 автобус және алты троллейбус бағыты уақытша сызбалар бойынша қатынайды. Билік жолаушыларға қала орталығы арқылы өтетін жолдарын алдын ала жоспарлап, жол жүру уақытының ұзаруы мүмкін екенін ескеруді ұсынады.
Концерт аяқталғаннан кейін көрермендердің үйлеріне қолайлы жетулері үшін қалалық көлік өз жұмысын жалғастырады. Метроның жұмыс уақыты да ұзартылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Үй жануарларынан бас тарту оларды асырау міндетінен босатпайды
Қазақстанда үй жануарларын ұстау қағидалары өзгертіледі. Иелері үй жануарынан жай ғана бас тартып, оны асырау жөніндегі міндеттерінен бірден босатыла алмайды. Үй жануарларын ұстау және серуендетудің үлгілік қағидаларына өзгертулер енгізілді.
Егер иесі бұдан былай үй жануарын асырай алмаса, оны одан әрі орналастыруға қамқорлық жасауға тиіс. Жануарды панажайға, уақытша ұстау пунктіне немесе оған қажетті жағдай жасай алатын басқа адамға не ұйымға беруіне болады.
Нақтырақ айтсақ, жануар уақытша ұстау пунктіне берілген жағдайда иесінің міндеттері сақталып қалады. Ол үй жануарының құқықтық тағдыры анықталғанға дейін оны асырауды қамтамасыз етуге тиіс.
Сондай-ақ, өзгеріс енгізілген қағидаларда жануардан бас тарту оның иесінің немесе жауапты тұлғаның міндеттерін тоқтатпайтыны жеке бекітілген. Бұл міндеттер үй жануары жаңа иесіне немесе панажайға берілгенге дейін, не уақытша ұстау пунктінде оның құқықтық тағдыры анықталғанға дейін сақталады.
Осылайша, енді жануарды уақытша ұстау пунктіне жай ғана қалдырып, ол үшін жауапкершіліктен босау мүмкін болмайды.
Тиісті өзгерістер 2022 жылдың 20 мамырындағы үй жануарларын ұстау және серуендетудің үлгілік қағидаларын бекіту туралы бұйрыққа енгізілді.
Бұйрық алғаш ресми жарияланған күннен кейін күнтізбелік он күн өткен соң күшіне енеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Caspian Sea Action Week Маңғыстауда сегіз елдің волонтерлерінің басын қосты
Сурет: gov.kz
Маңғыстау облысында "Caspian Sea Action Week - 2026" халықаралық волонтерлер апталығы аяқталды, деп хабарлайды ҚР Мәдениет және ақпарат министрлігінен.
Жабылу рәсіміне сегіз елдің, яғни Қазақстан, Әзербайжан, Ресей, Иран, Түрікменстан, Тәжікстан, Өзбекстан және Қырғызстанның өкілдері, сондай-ақ, мемлекеттік органдардың өкілдері, халықаралық сарапшылар, экологтер, волонтерлер мен жастар көшбасшылары қатысты.
Апталық аясында "Бір Каспий - бір болашақ" сараптамалық сессиясы, "Caspian Clean Challenge" халықаралық экологиялық марафоны, "Достық аллеясының" ашылу рәсімі, сондай-ақ экологиялық, мәдени-ағартушылық және жастарға арналған бірқатар іс-шара өтті.
Апталықтың басты оқиғаларының бірі - халықаралық "Caspian Hackathon" байқауы болды. Оған қатысушылар экология және орнықты даму салаларындағы жобаларын ұсынды. Жабылу рәсімінде байқау жеңімпаздары жарияланып, үздік шешімдердің авторлары марапатталды.
Сонымен қатар іс-шара барысында волонтерлердің "Volunteers of the World" халықаралық гимні алғаш рет таныстырылды.
Естеріңізге сала кетсек, 7 тамызда Ақтау қаласында Каспий экожүйесін сақтауға арналған халықаралық іс-қимыл апталығы басталған болатын. Іс-шара Каспий теңізінің экожүйесін сақтау және экологиялық ынтымақтастықты дамыту жолында волонтерлер мен халықаралық ұйымдардың күш-жігерін біріктіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.